2023 年 3 月，退休婦及一名男子，被指為兩名正在荔枝角收押所還押的男子，冒簽傳訊令狀，協助他們入稟向警務處索償、指被警員毆打。4 人被控串謀製造虛假文書等罪，兩名探監者早前認罪，兩名還押者不認罪，周四（2 日）在西九龍裁判法院開審。
庭上播放收押所錄音顯示，被告向探監者提到，自己被警員毆打、踩斷腳，導致他中度抑鬱，要求對方幫忙入稟，向警方索償 350 萬元。翌日，另一名探監者著被告向福利官提交令狀。案件周五（3 日）續審。
翻查資料，本案中兩名不認罪被告，為「口岸爆炸品案」的被告，兩人至今已還押超過 4 年。
控方由外聘大律師梅松代表，案件由裁判官彭亮廷審理。被告張家俊被問及是否認罪時，表示「絕對不認罪」，左眼戴上黑色眼罩的何卓為則表示「never」。
荔枝角收押所懲教主任蘇景豪供稱，探訪人士向在囚人士存入文件，一般需時 2 至 3 個工作天，另設有緊急申請，在囚人士可即日取得文件。蘇指，根據 2023 年 3 月 1 日至 6 日紀錄，兩名被告交接文件時，沒作出緊急申請。
蘇在盤問下確認，兩人於 3 月 1 日申請兩日後，將已簽署、有關民事索償的法律文件交予前來探訪人士。
庭上播放錄音
「就嚟過期、冇得告」
控方庭上播放，2023 年 2 月 21 日、認罪被告顏學健探訪張家俊時的錄音：
張：你幫我出面搞……告政府嗰啲嘢
顏：要點搞㗎
張：你幫我同林明姨講呀，3 月 7 號前，因為就嚟過期啦、冇得告啦⋯唔使搵律師啦，你訴訟咗先啦，幫我畀錢，幫我話「張家俊身份證乜乜」，告香港特區政府同香港警務處處長，擬控告人係呢兩個
張：嚟緊我攞錢㗎啦屌，之前我啲收入乘返 12 個月呀、心理障礙呀、PTSD 呀，搞到我呢度中度抑鬱呀、搞到我又喺度自殺呀，全部我攞嚟 claim 錢⋯幫卓為搞埋，卓為就少過 300 萬嘅，同埋幫呀文仔
張：我預袋 350 萬嘅，唔係，係 claim 350 萬，但係佢哋一定八折㗎啦，庭外和解呀佢哋。冇所謂我要錢啫，你要我簽保密協議冇問題，畀張支票我，我即刻去銀行攞晒做現金，屌佢老母，使政府錢最開心，不過要完咗單嘢，唉
張：跟住我係控方嗰邊，跟住我上庭作供，點樣俾佢踩斷隻腳呀，俾佢哋喺廁所濕我，跟住講出得啲名﹐其實已經玩完㗎啦佢哋
顏：你記唔記到啲名？
張：記到，仲要串撚到我喺醫院嗰陣時，佢哋去醫院拎份嘢畀我呀嘛，「嗱律政司依家告你，你睇定啲呀」，打我嗰條友就係條白頭佬囉，屌你老母，打得我咁撚爽
顏：都係政府賠啫
張：唔係呀，嗰啲 claim 唔到㗎啦，一句話你自招嫌疑，又 ban 鳩你㗎啦。我告嗰啲係人身傷害囉，攞住嗰張驗身報告，反你一棟囉，攞住幾球嘢跟住買領展供股
庭上播放錄音
「有個 number 可以用一年」
控方亦播放翌日，林明儀探訪張家俊的錄音：
林：好緊要呀好緊要，睇清楚啲呀，OK？呢度⋯講畀你聽，呀吳律師唔可以幫你接嘅，你今日好急呀吓，你今日叫福利官幫你交嗰個告票，你告 3 個，警務處長、香港政府、警員，你今日一定要叫福利官幫你交，你明唔明呀……一定有 deadline 日期呀，唔好過 3 月 7 號
張：唔係搵人出去……
林：唔得呀，你聽我講，叫福利官幫你搞交呢啲表，你聽日做咗呢 part 嘢先啦，你叫阿卓為……我星期六入其他資料畀你哋……你依家搵律師幫你搞都唔夠時間啦，唔夠時間，你要自己做先，OK？攞咗告票之後，最緊要個 number，有個 number 可以用一年
同案兩被告認
為還押者冒簽令狀判囚
控罪書顯示，案件由國安處負責，本案共涉 4 名被告，依次為林明儀（64 歲，退休人士）、顏學健（33 歲，外賣員）、張家俊（33 歲，報稱無業）、何卓為（39 歲，報稱無業），被控兩項串謀製造虛假文書及一項妨礙司法公正罪。
控罪指，林明儀、顏學健、張家俊於 2023 年 3 月 1 日至 3 月 6 日期間，串謀製造一份有虛假簽署的傳訊令狀，意圖由其本人或他人藉使用該文書，誘使另一人接受該文書為真文書，因而作出或不作某些作為，以致對該另一人或其他人不利；林明儀、何卓為被控於或約於同年 3 月 6 日，干犯相同控罪。
林明儀另被控於 2023 年 6 月 8 日，在荔枝角收押所探訪室內，接觸一名名為梅銘鋒的人士，要求他傳達訊息給何和張，要求他們虛假地聲稱傳訊令狀是他們所簽署的，從而阻撓及妨礙警方調查及相關的刑事訴訟程序。林明儀與顏學健早前認罪，分別判囚 5 個月及 2 個月。
WKCC2577/2023