蔡天鳳疑遭殺害碎屍案，周四（12 日）第 36 日審訊，鄺港傑供述弟殺蔡後的行程（見內文圖）。他稱按父指示搬載着蔡的膠箱入村屋，父叫他與弟盡快離開，他沒問弟去向，而自己「漫無目的」出市區，在大埔超級城棄置蔡的手機。他晚上與父再會合，回村屋見滲血物體料蔡遭肢解。
辯方多次問為何沒報警，鄺指事發時車內「兩個都係屋企人，我當時嗰刻冇諗過呢個方向」，而將蔡搬到村屋後都沒報警，因「當時唔識點樣處理」，其後他清潔車廂；他稱，曾問父親有否報警。他又說，直至警察告知尋獲蔡的殘肢，「（對蔡死亡的感覺）嗰一刻先湧出嚟」，他之後在警署哭泣。
Day35｜鄺港傑指證胞弟殺蔡 稱蔡車上罵弟其後沒反應 胞弟崩潰大哭
訂閱／贊助／購物，支持《法庭線》報道香港，記錄香港。
傑：回想當時
應報警或叫救護車
首被告鄺港傑昨指證胞弟鄺港智殺害蔡天鳳，並供述事發時車上情況，提到胞弟大哭、無法溝通，而他致電父親鄺球後，父親着他到大尾篤停車場會合。
他周四第四日作供，於辯方大狀 Trevor Beel 主問下供稱，他駕車往大尾篤時，想到尚未有人接蔡的長女放學，遂數次致電母親李瑞香，但對方沒有接聽電話。
Beel 追問，現時回看，他當時應該致電予誰？鄺港傑停頓數秒，說：「我至少應該⋯⋯報警或者 call 白車。」Beel 再問，為何他當時沒有這樣做？鄺再停頓數秒，稱「因為車後邊嗰個，兩個都係屋企人，我當時嗰刻冇諗過呢個方向」。
Beel 又問，現時回看，你如何看當時的決定？鄺港傑停頓約 10 秒後回應「我認為應該⋯⋯勇敢啲、同埋理智啲⋯⋯如果嗰時理智啲，嗰腦冇咁空白，件事可能冇咁惡劣」。
傑：父上車嘗試觸碰蔡
鄺港傑續指，當他駕駛 AA3383 七人車到達大尾篤停車場時，把車泊在父親鄺球的 VY9157 七人車旁邊，而父親走上 AA3383。而胞弟鄺港智則繼續坐在車廂的地上、「發緊吽哣咁樣」。
鄺港傑指，他在司機位往後望時，看見「Abby 瞓咗喺度，但我睇唔到佢面容，因為披頭散髮」，又指父親嘗試觸碰蔡，「嘗試睇吓有冇心跳之類嘅動作」。而他持續致電母親，「冇再敢望向後邊」、當時「好心急」，「因為嗰時妹妹已經放咗學一陣，但係仲未有人去接佢」。父親則着他先到龍尾村村屋，故他們駕駛兩車到龍尾村。
傑：按父指示搬膠箱
蔡沒反應料已死亡
辯方庭上播放 CCTV 片段，顯示鄺球駕駛的 VY9157 及鄺港傑駕駛的 AA3383 到達村屋外空地。鄺港傑供稱，下車後應父親指示把 VY9157 內的膠箱放在村屋門外地下，他形容當時「發生咗好多事，當刻我只係倚賴住爸爸⋯⋯佢做啲乜，我就跟住去做」，形容想法「一片空白咁樣、當機咁樣、hang 機咁樣」。
他又指，當時父親沒有直接告知他如何使用膠箱，「但我嗰刻嘅意識，我猜測到⋯⋯我估係可能想將 Abby 擺喺嗰箱度，搬咗入屋⋯⋯先搞後續嘅嘢，離開咗架車先」。
鄺形容，當時胞弟「已經冇頭先咁崩潰⋯⋯但係個人都好呆滯咁嘅」。隨後父親着鄺港傑把膠箱放入 AA3383 內。
至於蔡天鳳的情況，鄺港傑稱，「我見到有個物體，Abby 瞓喺度喇，但我啲視角唔係好見到佢啲面。」又提到在約半小時的時間，「我目擊唔到，亦都察覺唔到任何反應。即係你在生、會呼吸會盛吖嘛。佢（蔡）冇反應，所以我當刻，我會自己去諗，可能佢已經過咗身、死咗。」
傑：父將蔡放膠箱
弟開車門 料為遮視線
片段顯示，鄺港傑及後走入 AA3383 車內的乘客位。他庭上憶述，「我記得佢（父）誒⋯⋯已經從後座攞緊一個平時畀小朋友冚住瞓覺嘅薄被鋪，嘗試包裹緊 Abby。」
CCTV 片段顯示，他曾與胞弟對話。他庭上形容，「其實當時個人係好騰雞嘅，我嘗試喺度同佢扮傾偈，其實有啲語無倫次嘅」。他續指，及後父親着他打開車廂趟門，「見到用被鋪包住嘅物體，我覺得係 Abby 嚟嘅」。而胞弟隨後打開 AA3383 司機位的車門，鄺稱「我諗係遮住個視線啩」。
鄺港傑續指，及後「我睇到爸爸將個被鋪、即係 Abby 瀡咗落膠箱入邊」，父隨後指示他搬起膠箱走入屋內。他在屋內問父親：「而家究竟點做，你會唔會報警或者 call 白車之類？」又指父親「諗咗一諗，只係叫我同細佬盡快離開，佢會盡快處理㗎喇」。
Trevor Beel 追問，當時鄺港傑為何沒有報警？
他形容「我當時唔識點樣處理」，及後他見車內「有啲狼狽、即係有啲亂」，「我認為鑑於啱啱嗰 45 分鐘入邊發生嘅所有嘢，應該清理咗成個車廂，起碼中排（座位）先，因為仲有啲雜物喺度」，包括蔡的衣物、袋。
他亦提到胞弟隨後換衫，「佢（智）喊到成身濕晒咁滯喇，佢覺得污糟」，但他沒有看到胞弟的衣服上有血跡。
鄺港傑及後成功與母親通電話，她當時與朋友打麻雀，他着母「即刻搭的士去湊妹妹放學」，告知母親「唔好問咁多，總之而家即刻去接妹妹喇」。
傑：我覺得要抹到好乾淨
好似冇發生過任何事咁樣
從 CCTV 片段可見，鄺港智離開事發車廂時，拿着白色及紅色膠袋。鄺港傑指，白色袋為胞弟的衣物，而當時鄺港傑用濕紙巾清潔車廂，紅色袋內有用過的濕紙巾。
鄺港傑庭上稱，他當時認為「要抹到好乾淨，好似冇發生過任何事咁樣」，而車內「其實冇啲可視、可見到嘅污糟或者咩嘢，其實我係成個車廂喺度抹」。
至於法醫作供時提及，蔡天鳳所受的傷會令她內、外出血。鄺港傑形容，當時車內「我冇見到有啲咩特別好似法醫講嘅，好多血咁樣⋯⋯但係我見到喺個中控台手枕後邊，有好少嘅血痕⋯⋯所以我亦都有抹埋⋯⋯我唔知血定污跡嚟嘅」，而他沒有在車內發現武器。
鄺港傑及後從車廂取出地墊，因為「我想成個車廂中間，好似冇發生過嘢咁樣，清空咗佢先，我覺得咁樣安全啲」，即有「安全感」，「始終啱啱 45 分鐘我知道發生咗事情」。他將地墊放入村屋內，父親「企喺個客廳度諗緊嘢，我形容佢係諗緊嘢囉，load 緊」。
片段又顯示，鄺港智其後離開現場。鄺港傑指當時不知道胞弟的去向，但對方離開時曾「好輕輕咁講話，『我走喇』」。
傑：警說發現蔡殘骸
感覺「嗰一刻先湧出嚟」
CCTV 片段顯示，鄺港傑其後走上 AA3383、停留約 6 分鐘才駕車離開。他在庭上指，當時應在回想「點解會搞成咁？點解會發生事情？」
Trevor Beel 詢問當時鄺港傑對胞弟、蔡的感受。鄺稱對胞弟行為感不解，「嗰段時間佢有啲陌生，因為我未見過佢咁嘅狀態」。
至於對蔡天鳳的感受，鄺沉默數秒後指，「我記得嗰刻，我冇諗到呢個 point 嘅，好複雜吖，嗰刻冇諗到咁仔細」。Beel 追問，當時他為何沒有想到蔡。鄺回應，「應該咁講，我唔係冇諗到佢，我嗰刻太多嘢同一時間發生」。
Beel 再問鄺對於蔡已死一事有何感受？鄺回應，「我呢個感覺係直到⋯⋯直到我喺差館⋯⋯警察同我講，喺村屋入邊搵到佢（蔡）嘅殘肢，嗰一刻先湧出嚟嘅⋯⋯我記得嗰時我就開始喊出嚟。」Beel 追問，當時是蔡遇害後，鄺首次哭？鄺指，「喊成咁樣係，我記得喺差館，就淨係識得喊，警察問我嗰啲嘢，我都冇答佢」。
鄺又指，「我好記得喺 QE 驗傷返去差館，得知警察搵到 Abby 嘅殘肢，咁由嗰時開始（喊）囉」，當時他已被捕。但當時「我唔係諗自己被人拉，而係嗰刻之前，我形容為仲呃緊自己件事冇發生過，直至警察同我講，喺村屋搵到屍體。理智先同我講，係真正發生咗呢件事」。
傑：大埔超級城棄置蔡手機
Trevor Beel 指，鄺港傑離開龍尾村屋後，到了大埔超級城。
他庭上憶述，「我當刻係想離開嗰個 area 先，我就一路駛返去市區。我想逃離嗰個 area，我唔想再喺嗰度，所以我漫無目的咁去返市區先。然後我知道嗰度附近有個商場喇，我想去個洗手間冷靜吓，所以就去咗嗰度」。
他續稱，在商場泊車後檢查車廂，發現蔡的手機，「我驚吖嘛，就熄咗個電話，我本身諗住去廁所洗面冷靜，就順手抌埋個電話去垃圾桶度」。鄺隨後致電胞弟問其位置，先到尖沙咀接載弟，再往銅鑼灣與母親李瑞香及蔡的長女 X 會合，一行人返回加多利山單位。
鄺稱入屋後，蔡的丈夫譚方駿在梳化睡覺，他沒與譚對話，亦沒有向母親提及蔡的情況。他指，母親有問為何臨時要她接 X 放學，而他回應「Abby 唔得閒，約咗人呀」。
傑：夜晚返龍尾單位
見被鋪滲血料蔡遭肢解
鄺港傑指，晚上 7 時 35 分離開加多利山單位，打算回家時接到父親來電，着他到大埔一間茶餐廳會合；鄺遂乘的士前往，他指，有點菜但最終沒有吃飯，因為「冇胃口」。
據承認事實，CCTV 片段顯示兩人 10 時許返回龍尾村單位。鄺港傑供稱，入屋後「我就問爸爸：『誒⋯⋯諗住點樣樣、點處理呢件事？有冇報警？」。父沒有回應，並打開大房的門，而他看見地下有帆布，有帳篷、膠箱。
鄺港傑憶述，「個箱係透明㗎嘛。我見到、我見到有個被鋪包住嘅物體，其中一段有啲血滲出嚟」，另亦看見電鋸，形容電鋸「刀片上面有少少血」。
他表示，當時太過驚訝，沒有就此事詢問父親鄺球，「我認為 Abby 個屍體有某部分，應該被肢解咗，因為我見到個被鋪嘅一端有血吖嘛」，形容「張被係滲咗好多血㗎」，當時「我嗰刻冇做任何嘢」。
Trevor Beel 展示龍尾單位內，舖有藍白間帆布的照片。
鄺港傑表示，是他把帆布貼在牆上，當時是跟從父親吩咐，「我喺門口見到呢個情況，爸爸拖咗個膠箱出廳，嗰時嘅帆布係好 roughly 咁樣鋪嘅，然後爸爸叫我鋪好啲、用膠紙痴好佢，然後我就痴咗」。
鄺港傑形容當時，「冇思考咁多、思考唔到咁多嘢，我見到嗰個畫面，我已經、我已經好震撼，blank out 咗咁樣」。案件周五續審。
HCCC198/2025