身在現場 見證記錄

47人案求情|岑敖暉與余慧明友:只想你仍安好 岑子杰友:LGBTQ朋友好多謝佢

47人案求情|岑敖暉與余慧明友:只想你仍安好 岑子杰友:LGBTQ朋友好多謝佢

分享:

警員繼續在西九法院門外「一字排開」。(Tszhei Chan 攝)

岑敖暉、余慧明的朋友 David(Tszhei Chan 攝)

岑敖暉友引歌詞「只想你仍安好」

早上約 7 時,西九龍法院外有約 40 人排隊,較昨日少約 10 人。社民連主席陳寶瑩、前主席黃浩銘、前民陣召集人陳皓桓、支聯會前常委徐漢光、前區議員韋少力及李志宏到庭旁聽,年屆 101 歲的「大黃伯」亦撐著拐杖及雨傘步入法庭。

清晨 5 時許到場的 David 表示,在大學時期認識岑敖暉,後在工作期間認識余慧明,指「同 Winnie 都曾經話走過一段路,當中都有好多高高低低,有好多唔同情緒」,冀在如此艱難的時期,到法庭旁聽讓他們知道「仲有好多人記掛住佢哋」。

David 憶述與岑敖暉在大學的時光,指岑每當聽到《歲月的童話》一曲時,都會被歌詞感動,而 David 近期再聽此曲時,都會想起岑,希望向「入面的朋友,或者喺其他地方嘅朋友」說,「起碼有日都可以『為對方拍拍滿身的塵土』,但現時則『只想你仍安好』」。

余慧明的筆友 Zoe(Tszhei Chan 攝)

余慧明筆友:佢好勇敢

清晨 5 時 20 分到達法院、余慧明的筆友 Zoe 表示,自余開始從政及組織工會才認識她,認為余「好勇敢」,「因為醫護要從政係好難嘅事,我哋都從來冇經驗去做呢樣嘢」,惟余當時「抱住好想保護香港」的心態,「就行出嚟做呢件事」,「相信佢當時係邊學邊做」。

Zoe 形容余慧明為「貓奴」,指余每次來信,都會提及其「主子」,稱「好掛住佢啲貓」,亦會「畫公仔,畫好多貓」,余又透露很掛念家人,希望「希望佢所愛嘅人能夠健健康康,等佢可以安心」。

周嘉發:冀能成功入庭見岑子杰

社民連外務副主席周嘉發,則於凌晨 3 時半抵達法院外排隊,他指知道岑子杰將求情,惟過往前來旁聽的情況都不太順利,「今次覺得唔信邪,希望可以和平咁嚟一次旁聽」,「見到咩事都最主要處變不驚,唔好咁容易俾人激嬲自己」,冀能成功進入庭內,「睇吓有緣見到邊個啦」。

周稱,雖與岑子杰的接觸不多,但視其為「社運前輩」,又形容岑是個「好認真、幾浪漫,又好有趣嘅人」,相信岑能坦然面對審訊。周約於 8 時 15 分進入法院。

周嘉發進入法院。(Tszhei Chan 攝)

岑子杰友:好佩服佢

同志運動者 Louis 指,認識岑子杰 10 多年,視其為 LGBTQ 運動的前輩,認為岑是個很平和的人,但其得意之處為「保持自己嘅棱角同時,同到唔同嘅人相處」。

Louis 續指,自己曾於 2018 年申請司法覆核,而岑身處獄中仍堅持申請覆核,「好佩服佢」、「呢條係條好唔容易嘅路」,但因他的挺身而出,令到很多同性伴侶受惠,「好多 LGBTQ 嘅朋友都好多謝佢做呢樣嘢」。

岑子杰的朋友 Louis(Tszhei Chan 攝)

陳皓桓:岑子杰之後會減返肥

前東區區議員韋少力表示,她與岑子杰相識逾 10 年,同曾為民陣召集人,指岑是「同好多人都能夠聯繫嘅人,搵佢做嘢肯去幫手」。韋指,岑還押期間都有探望岑,形容他「心態幾好,會同我講知道日子一定要過,開心又要(過),唔開心又要(過),佢反而會安慰返我哋」。她希望岑好好照顧自己,「佢每次寫 message 都係關心我哋,希望佢多啲照顧自己」。

陳皓桓續往法庭旁聽,提到前黨友岑子杰還押期間,體型增加不少,他補充「佢之後會減返肥」。陳昨日旁聽後,指毛孟靜很精神、健康,又笑指黃碧雲「好民主黨呀,正正經經去聽審,我哋呢啲唔會,我哋呢啲求其㗎啦 ,佢好認真」。另外,他透露仍未能探訪黃碧雲,「入咗名一個月都未批,希望快啲批,有多啲人探佢」。

韋少力(Tszhei Chan 攝)

陳皓桓(Tszhei Chan 攝)

岑子杰義工:留喺香港就係共同進退

戴著綠色口罩的林太表示,曾任梁國雄、岑子杰的助選義工,指岑「講嘢好有說服力、好討好、好得人信賴」,後來因岑獲較多人幫忙,她幫忙一至兩次後,改為替其他較弱勢的候選人助選。

林太稱,近年沒見過岑子杰及其他被告,「因為我哋唔係親屬冇機會見,只有去法庭先見得到…希望見得幾多就幾多」。林太希望以旁聽為鼓勵,「香港人都係好關心佢哋,唔放棄佢哋…大家共同進退嘅,留喺香港就係共同進退㗎啦」。

曾任梁國雄、岑子杰助選義工的林太(Tszhei Chan 攝)

黃浩銘(Tszhei Chan 攝)

HCCC69/2022、HCCC70/2022
焦點
最新文章
最新專題影片

HK$180 歡迎自由定價!

同時推出兩套自家出品Postcard
新書《公民司法認知》即日起公開發售!

售價:HK$180(歡迎自由定價)
同時推出兩套自家出品Postcard(每套四款);每套售價:HK$60