前立法會議員林卓廷與另外 6 名「非白衣人」，被控參與 721 元朗站暴動，周四（9 日）在區院展開第 43 天審訊，控方續盤問第五被告鄺浩林時，以「領袖風範」形容林卓廷，問是否僅林一人有風範，鄺否認稱「真係唔係好覺」。
主控、高級檢控官程慧明昨回答法官時，稱「確認唔到」鄺在片段中向白衣人舉出的手指，是食指抑或中指。程今再主動提及手指爭議，稱「我都認為係中指嚟」，又指鄺同時向閘外說粗言。鄺否認。
控方亦質疑鄺稱留現場欲了解事發，問「呢啲事你知嚟做乜？你又唔係警察」。另鄺確認曾 4 次擲物，亦有向白衣人招手，稱為阻嚇，並非想傷人。案件周五續，料第六被告將開始作供。
周三報道：
721非白衣人案｜第五被告開始作供 稱曾舉食指 官：我睇到係中指
鄺指第七被告扶助傷者 控方質疑
第五被告鄺浩林昨開始作供。他周四續繼續接受盤問，第七被告楊朗的代表大律師曾敏怡甫開庭補充，有數條問題要盤問鄜，獲法官陳廣池批准。
鄺主問時供稱，721 當晚下班到元朗站乘車回家，看到女士「個頭流哂血」。他在曾敏怡盤問下，確認當時有人討論如何處理受傷女子，稱看到 3 至 5 名男女將女傷者扶入女廁。鄺確認，其中一人為第七被告楊朗。
控方接續盤問，質疑因楊朗多次在付費區內走動，指鄺未必可以肯定楊是其中一人協助傷者。鄺答稱，對楊扶助傷者的畫面有印象，重申並非在其他地方見到楊而有混淆。
控方問是否僅林卓廷「有呢個領袖風範」？
鄺在主問時供稱，在大堂內曾聽到有人提及已聯絡元朗區警方，並稱站外有很多黑社會人士，著大家不要出閘，現知悉該人為林卓廷，而自己當時不認得林，僅知悉其名字。
控方問鄺，當時有否留意林的說話或行為？鄺稱僅記得以上的說話，沒留意林之後的行為。控方問，林「主動同圍觀嘅人講報咗警唔好出去，係咪得佢一個人有呢個姿態？」鄺稱是。
控方再問，「係咪得佢一個人，有呢個領袖風範？」在被告席的林卓廷聞言發笑。鄺則稱，「真係唔係好覺。」
鄺：沒感覺林具領袖風範
官追問，即不認為林有領袖風範？鄺稱，「其實真係冇呢個感覺。」控方其後問鄺，對林有何認知。鄺先稱，「男人」。林卓廷隨即大笑，旁聽席亦傳出笑聲。
鄺再稱，「剩係知佢係男性…知佢係議員…」。在官澄清下，鄺指「當時知佢係議員，但當晚嘅我，唔知呢位男人係林卓廷先生。」
控方再問，「721 當晚都唔知第一被告就係你認知嘅林卓廷？」鄺確認。鄺亦在控方追問下稱，當晚沒看到林有用咪高峰說話，亦沒留意其行為，因當時僅留意閘外白衣人。
鄺指留現場了解 控方：知嚟做乜？
鄺在盤問下解釋當晚面對的情況，指白衣人到場後「群情洶湧」，且襲擊靠近欄杆的人，現場危急，需要應對「突發事件」，因「唔知下一秒會發生咩事」，且是發生在他身上，有機會被襲擊。
控方問，鄺稱想四圍看發生何事、了解女士為何無故被襲，「呢啲事你知嚟做乜？你又唔係警察。」鄺稱，作為普通市民都可以了解，舉例指有人被打劫，會想知發生何事。控方聞言稱「我唔會」。鄺指，「至少我會想知發生咩事。」
官：你求知慾都幾高
官打斷稱，「相當嚟講，你求知慾都幾高㗎喎？」鄺稱，「睇吓邊方面。」官追問，「邊方面令你求知慾咁高？」鄺稱，「其實好難一一數出嚟邊度」，在追問下稱「一啲我唔知嘅知識…都係啲九唔搭八嘅嘢，好多好雜嘅嘢。」
鄺同意，沒親口問受傷女士或其他在場市民，解釋指自己比較「怕醜」，「怕同人講嘢」，故只聽他人討論。控方質疑「但嗰晚你同白衣人好多對話喎」，鄺稱「嗰方面唔屬於社交，對我嚟講。」
控方質疑鄺不離開現場
控方指，鄺聲稱要保護自己，但最有用方法是離開。鄺稱，因白衣人「一班人揸晒架生，凶神惡煞」，指白衣人襲擊閘內人，才萌生保護自己的想法。
控方質疑，鄺留在現場拍攝，「你又唔係警察，又唔係記者，點解拍片重要過保護自己？」鄺稱，當刻沒逼切到要立刻走；又指當時有人已報警，認為警方很快到。
控方問，鄺在被捕前有否將當日拍攝的片段交予警方。鄺指有印象有交，但忘記是哪種形式。
鄺否認與其他黑衣人與白衣人對峙
控方另問鄺不斷作出手勢、擲物目的為何？鄺答「為咗阻嚇」。控方則指出，鄺的目的並非阻嚇，而是與其他黑衣人恃著人多勢眾，與白衣人對峙，包括指罵及作白衣人作出攻擊；指鄺加入黑衣人群體，壯大聲勢，與白衣人對立及作出攻擊。鄺一概否認。
鄺昨供稱曾打算上月台離開，但樓梯站滿人，亦有人稱「上面冇車走」。控方播放相關閉路電視片段，指鄺當時是在樓梯附近徘徊，不見他試圖上月台。鄺同意，並指當時相信他人的說法，沒刻意上月台查證。
控方再提手指爭議 稱「認為係中指」
另控方播片，再問及鄺向閘外白衣人群舉出手指一事。主控程慧明請鄺伸出手指，稱「我想確認你 5 隻手指都齊全啫」，接着質疑鄺不是指向手機，認為其手指當時與電話有 4 至 5 吋距離。鄺不同意。
控方再播片段，稱「雖然睇埋動作，我都認為係中指嚟嘅…睇唔睇到個距離？」鄺則認為在電話附近。
控方再播片，著鄺留意聲音，指是他向閘外說粗言「又走呀？傻閪！」、「屌你老母傻閪！」鄺否認兩句是由他說出。
鄺確認曾擲物 4 次 稱非為傷人
控方另播閉路電視片段，指鄺曾 4 次擲物，首次是擲向一名粉紅色衫男子，其後再擲了一次，第三、四次則擲向林觀良「懵良」。
鄺同意曾經 4 次擲物；但更正最後兩次是擲閘機及「懵良」的方向。控方問，「個閘機都冇得罪你 ，點解要掉閘機？」鄺稱，「我都唔可以笠亂傷害人哋，我目的係掉閘機，製造聲響阻嚇佢哋，我唔係為咗傷害人。」
鄺覆問時解釋，第二次擲物是因白衣人將雪糕筒擲入閘內，他差點被擲中，故作阻嚇。
鄺否認參與暴動
控方另稱，鄺擲物後向白衣人作出招手，上下擺動。鄺同意，「其實都係阻嚇佢哋。」官問，「招手點阻嚇？」鄺稱「當時冇深思熟慮點做」。
控方最終向鄺指出案情，指他加入黑衣人群體，藉著留守向黑衣人提供支持、壯大聲勢；向白衣人挑釁、指罵、互相攻擊；以及與本案被告與他人參與暴動。鄺均否認。
鄺浩林完成一連兩天作供。案件周五續，料第六被告將開始作供。
7 人被控在元朗站參與暴動
被告依次為，時任立法會議員林卓廷（43 歲）及另外 6 人，包括庾家豪（35 歲）、陳永晞（37 歲）、葉鑫昇（31 歲）、鄺浩林（26 歲）、尹仲明（48 歲）及楊朗（26 歲），7 人被控一項暴動罪。
控罪指，7 人於 2019 年 7 月 21 日在港鐵元朗站大堂，及其他身分不詳的人參與暴動。
本案由法官陳廣池審理，控方由律政司高級檢控官程慧明、岑頴欣代表。各被告的代表依次為：大律師黃錦娟、大律師李百秋、資深大律師潘熙、大律師鄭凱霖、大律師周慶澎、大律師黎建華、大律師曾敏怡。
DCCC1106/2020