支聯會與時任正副主席李卓人、何俊仁及鄒幸彤煽動顛覆罪成，分別被判囚 5 年 2 個月至 7 年 3 個月。家屬離庭時神情哀傷，指李卓人及鄒幸彤均會就定罪及判刑上訴。其中李卓人妻子鄧燕娥表示，對判決感到很傷心，「判 7 年實在太重」，但她知道李卓人「心安理得」，並希望丈夫「撐住！撐到底！」
鄒幸彤母親則指，選擇自辯嘅鄒幸彤曾對她說：「我終於可以除低件大狀袍，痛痛快快咁代表自己講真話，原來係咁爽㗎」。彤媽形容，女兒非並稱職大狀，「佢只係一個出色嘅被告！」，又稱要「感謝」把女兒帶上被告欄的人，「將六四真相、近幾年香港發生嘅事，幫手寫入香港法庭嘅紀錄」。她寄語眾人切勿灰心、內疚，「大家一定要好好生活。」
鄧燕娥：傷心及憤恕 但知道丈夫心安理得
散庭後，前區議員陳劍琴、李卓人妻子鄧燕娥、鄒幸彤媽媽、前支聯會常委劉家儀、關振邦一同步出法院，大批警員上前包圍，指示到法院對面的庫務大樓外才可受訪。
鄧燕娥受訪時神情哀傷，對於丈夫被判囚 7 年，鄧形容李卓人於庭上神情平靜，相信他已做好最壞準備，又指其身體情況尚可，「但始終坐多日都係唔啱」。
她提到，李卓人由 2021 年至今已還押 5 年多，仍須服刑 3 年，形容 7 年刑期「實在太重」。「不過我知道李卓人係心安理得，但我哋都係無可奈何，好嬲、好傷心。」
她認為法庭完全沒有考慮丈夫的證詞，「我覺得好唔公平，一定要上訴，定罪、判刑都會上訴」，並寄語丈夫「撐住！撐到底！」
鄧燕娥又指，過去多年來有數以百萬計市民曾參與六四晚會，「所以判刑係對好多人嘅一個刑罰，係好難接受。」她認為，香港的「言論自由」已成過去，指即使李卓人、鄒幸彤及何俊仁沒使用非法手段，仍被重判，「已經對佢哋所講嘅嘢、只不過係發聲作咗判決。」
彤媽：女兒不是稱職大狀，只是出色被告
鄒幸彤媽媽則提到，女兒多年前曾表示「終有一日，我要喺法庭上，同佢哋好好辯一辯」。隨後，鄒因多宗案件被捕，彤媽拜託朋友為女兒尋找代表律師，但朋友說「冇人可以代表阿彤，因為阿彤要嘅，唔係贏，唔係贏官司啊！」
鄒最後於案中自辯。彤媽憶述，在其中一次法庭激辯過後，前往探望女兒，「佢好開心咁話，好爽！佢話，我終於可以除低件大狀袍，痛痛快快咁代表自己講真話，原來係咁爽㗎，所以呢大家，佢唔係一個稱職嘅大狀，佢只係一個出色嘅被告。」
彤媽：「感謝」拘捕女兒的人 協助翻開六四記憶
彤媽諷刺道，「行到今日、嚟到今日，佢（鄒）做到佢多年嚟想做嘅嘢，我唔知應唔應該多謝嗰啲拉佢上被告欄嘅人，真係要多得佢哋，多得佢哋翻開六四嘅記憶、多謝佢哋幫手呀。係佢哋幫手，將六四真相、近呢幾年香港發生嘅事，幫手寫入香港法庭嘅紀錄之中。」
她指，真正要感謝的，是一群不計較輸贏、金錢，仍願意為無權勢者打官司的法律人員，伸張正義，努力守護法律底線，「當然我仲多謝所有同行嘅人，唔單止係留下來嘅人， 仲有身處喺世界各地嘅朋友，感謝你哋逆風同行。」
彤媽：毋須灰心、內疚 要好好生活
她希望各方不要太難過， 「唔好灰心，更加唔可以有任何嘅內疚，因為內疚係分化嘅毒藥」，寄語「大家一定要好好生活」。
彤媽最後展示身穿的上衣，印有一個拳頭，以及舉起尾指和姆指的手勢。她指希望為大家打氣，並以尾指作比喻，稱「呢個（尾指）代表乜嘢？好差啦、唔掂啦，冇料呀。」
她續指，有些情況下「尾指」看似高高在上，但這些「冇料」的「尾指」之所以能高高在上，「係因為大多數嗰啲（手指）冇趷起身咋」，令「尾指」以為自己比姆指更高。她形容，舉起尾指的手勢違反自然、「捱唔到好耐」。
鄒幸彤前年曾稱在本案結束前不會剪髮。前支聯會常委劉家儀陪同彤媽離開時打趣說：「阿彤會剪髮啦，今日之後，彤媽都剪。」彤媽拉起長長的馬尾，稱「由佢開始話唔剪之後，我就跟佢一樣，同行。」
劉家儀：3 人靈魂自由
前常委劉家儀確認，鄒幸彤及李卓人均會提出上訴，形容「呢一件係坐一日都嫌多嘅案件，今日無論係判幾多，我哋都已經係覺得過重。」
她指作為前常委，支聯會過去一直重視言論自由，並代幾位被告感謝「天安門母親」，過去一直堅持真相，亦希望向「每一個曾經，無論係喺香港或者喺海外點起燭光、堅持我哋嘅良心嘅每一位朋友，講聲多謝。」
劉又指，即使 3 人被判囚，「困禁咗佢哋 7 年嘅軀體，但佢哋嘅靈魂係自由嘅，仲有樣嘢我哋好相信，香港人爭取自由嘅靈魂，唔會消失」，亦會等待每一名被告出獄，「我哋一齊等佢哋平安回家，希望佢哋都能夠身體健康。」
鄧岳君：冀大眾關注六四 直至獲公正評價
前常委鄧岳君攜同魯迅作品《吶喊》到庭，散庭後受訪稱，2021 年 9 月 25 日，支聯會召開大會表決解散議案，同日亦是魯迅生忌，而支聯會前主席司徒華亦尊祟魯迅。他說，魯迅在《吶喊》自序中有關「鐵屋子」的比喻，令他感到身受，認為在這時代下只能發出「無聲吶喊」。
由支聯會各人在 2021 年 9 月被捕，至周五判刑事隔約 5 年，鄧岳君指，「終於有一個了結，當然依件事未完，念茲在茲都係希望大家將焦點放喺八九民運呢個歷史事件」，又指「支聯會喺唔喺度都好，六四事件未解決⋯⋯呢件事有冇支聯會都好，希望大家繼續關注，直至得到公正嘅歷史評價為止。」
鄧岳君其後到上環中華基督教青年會，提到魯迅曾於 1927 年在該處演講，主題是《無聲的中國》，呼籲年青人發聲。鄧指，「曾幾何時香港係一個代中國發聲，尤其是六四呢件事情上，依家都要收聲喇、唔係諷刺嘅，不過唏噓。」
他強調，法庭沒有裁定悼念六四違法，而他每年 6 月 3 日晚亦有到維園悼念，默念死難者名單，期間未受干預。他認為，當不再有公開集體的六四悼念，便需靠每一位有心人的行動，「總之有好多方方面面活動，如果純粹悼念的話，大家都有空間去做。」
吳敏兒完成服刑首開腔：長期還押難以形容
去年 7 月就 47 人案完成服刑的前職工盟主席吳敏兒，周五亦有到庭旁聽，亦是她獲釋後首度開腔。她說，得悉何俊仁、李卓人及鄒幸彤的刑期後，心情沉重、難受，「我好想佢哋快啲可以出嚟，但而家呢個快啲，都要超過一年時間⋯⋯我自己都經歷過長期還押，嗰種唔開心同無奈，係好難形容畀人聽。」
但她說，作為過來人，亦會希望盡快知道確實刑期，「希望見到完嘅日期慢慢、慢慢近自己，就可以返屋企喇。」她指剛才在庭內看不到幾位被告，但仍希望在精神上為他們打氣，「希望佢哋捱過呢段日子，最後⋯⋯（哽咽）終有一天會出返嚟，同屋企人團聚。」
民主黨前主席劉慧卿亦形容這天是「好多香港人好悲痛嘅日子」，而香港曾有上千萬名市民參與支聯會活動，過往六四晚會亦獲政府提供維園進行活動，「依家突然間又話唔掂、犯法，市民都𢯎晒頭」。
HCCC155/2022