蔡天鳳疑遭殺害碎屍案周五（16 日）進行第 18 日審訊，蔡的家翁、譚仔米線創辦人譚澤均開始作供，指兒子與蔡生活「非常開心」，而他亦「非常鍾意」媳婦，又指與妻子皆認為蔡有前夫與小孩無問題。
譚方駿早上完成作供，他在鄺港智一方盤問下稱沒見過鄺使用暴力，亦重申沒見過或聽過鄺會對蔡天鳳使用暴力。
Day17｜譚方駿指表面上與鄺港智維持關係 確認父就被追數找鄺球幫忙
編按：報道涵蓋庭上描述的案件過程細節，或會引起不安。
第四年，我們仍在現場。
支持《法庭線》，讓我們走得更遠。
12:04 譚父：將錢交兒子與媳婦投資
不少於 8000 萬、媳婦管理得不錯
譚澤均指，家住曼克頓山單位時，蔡天鳳已與譚家同住，一家人之後再搬到九龍塘海棠路。他指，約於 2018 年將曼克頓山單位贈予兒子及蔡天鳳，登記在蔡名下。譚又確認為兩人舉辦婚宴。
主控郭莎樂問，他給予蔡母 400 萬元禮金？譚稱「準確應該係 399 萬，因為呢個係中國人嘅幸運數字」。
譚澤均指，搬到海棠路後，他在經濟上支持兒子一家，每月平均予 20 至 25 萬元蔡及兒子，「有時啲旅行、過年，會另外畀多啲⋯⋯要出門，要訂機票、酒店，會另外畀多啲錢」。
郭莎樂問，如果兒子及蔡要求更多錢，譚澤均也會支付？譚稱「特別嘅，佢開到口通常都會畀」。他指，家人的車主要由他購買，「買咗屋企用，屋企有兩部車」，當然蔡與兒子也可使用。
郭莎樂問，蔡的衣服、珠寶由誰購買？譚澤均指，「咁佢自己用錢買，平時家用有淨咪攞嚟買囉」，又指送過手袋予她，妻子則會買飾物予蔡，「一般首飾未必好貴，有冇貴嘅嘢，我太太先答到你」。
郭莎樂問，譚澤均買的手袋值多少元？譚稱：「準確數字唔記得，25 萬，3、40 萬呀，每生一個小朋友，我都好高興，我都會送禮物畀佢」。譚提到小朋友時笑一笑。
他又指，會給錢兒子及蔡投資，「憑記憶唔會少過 8000 萬」，並非一次過付款。郭莎樂問，錢落在誰手？譚稱是蔡，因為「我個仔冇 Abby 咁成熟」。而以他印象，「（錢銀）係管理得唔錯嘅」。郭莎樂問，譚澤均有否限制蔡投資甚麼？譚稱沒有，「基本上我畀佢哋兩個揸主意，佢哋兩個商量完，由 Abby 出手囉」，他亦不知道蔡會投資甚麼。
譚父指，之前曾建議兩人買舖位收租，並帶兩人睇樓盤，「回報率我諗佢哋認為太低」，最終沒有購入。
11:58 蔡天鳳家翁譚澤均開始作供
控方傳召譚方駿的父親譚澤均，他穿深綠色西裝外套進入法庭。書記稱「證人請過嚟呢度」。譚揚手回應：「呢度？好！」宣誓後坐低。
譚澤均確認，譚方駿是他的獨子，而譚方駿與蔡天鳳是夫妻關係，但兩人未有註冊，因蔡未辦好離婚手續。他們一家住在九龍塘海棠路獨立屋。主控郭莎樂問譚父，蔡與譚方駿關係幸福？他指「非常開心」；郭莎樂問譚父喜不喜歡蔡？他指「非常鍾意」。
郭莎樂問譚父，他對於兒子與蔡一起也感開心？譚稱「佢自己揀嘅，我冇意見⋯⋯冇唔高興，因為佢都有同我講，Abby 有個前夫、有小朋友，我同我太太都聽過」，指自己跟太太認為沒問題。
郭莎樂指，譚澤均有營運餐廳「譚仔」，2018 年退休及賣盤？譚同意，「成盤生意賣咗 10 億港幣」。郭莎樂問，他將生意賣盤後，再將錢折現購買海棠路豪宅？譚同意。
11:50 譚完成作供離開法庭
主控郭莎樂最後問及熊熊雞蛋仔店。譚方駿指，蔡天鳳沒提及為何開設雞蛋仔舖，但據他理解是小投資，而鄺港傑是主要打理人，但好像因他回大陸疏於打理而結業，最後店舖蝕錢。
郭莎樂指，鄺港傑除了管理雞蛋仔店、擔任蔡的司機外，有否見過他上班？譚稱沒有。譚方駿完成 4 日作供。
暫委法官祁彥輝向譚指，對他失去妻子感遺憾，他可以留下旁聽或離開。譚拿着紙巾、握緊在手，離開證人枱時吸了一口氣，行到門口重重嘆了一口氣、眼有點紅。被告欄的鄺港傑則望着譚離開法庭。
11:23 小休
10:59 蔡遇害當日曾向譚說
鄺港傑「奸狡」、「個心幾唔好」
主控郭莎樂問及譚方駿與鄺港傑的關係。郭莎樂指，鄺港傑接手成為加多利山單位的司機？譚稱是 2022 年底。郭莎樂引述辯方指，譚、蔡與鄺港傑都是親近朋友，譚稱「當時係」，然後嘆一口氣。郭莎樂指，友好關係直至 2023 年 2 月？譚同意。
郭莎樂問，一位朋友成為受聘的司機是否好主意？譚稱「唔認為係，其實」，指撇除鄺港傑跟小朋友有親戚關係，「作為朋友去畀錢佢做嘢，呢件事係有啲 odd 嘅」，而譚曾向蔡提過此事。郭莎樂問，那為何仍聘用鄺港傑？譚指，當時鄺港傑只是「臨時做住先」，亦沒太大不滿。
郭莎樂問，鄺港傑在 2023 年 1 月成為司機後，與蔡、譚關係如何？譚指「個感覺係好似佢係工作緊囉，好多時候係」。郭莎樂指，即鄺港傑受聘後，大家關係有變？譚同意。
郭莎樂指，鄺港傑受聘如何令到關係有變？譚指，「當然佢個作息時間，就完全唔同晒，因為佢要就返小朋友嘅返學時間」，又指大家相處減少，「即係就好似一個職員囉」。
郭莎樂問，譚知悉上任司機阿信（音譯）離職後有否感驚訝？譚稱有，他聽聞阿信被解僱的原因是「態度唔好」，以及賭波欠債。郭莎樂問，誰告訴他？譚稱在客廳聽到，當時蔡、李瑞香、鄺港傑在場。郭莎樂問，鄺港傑有否提及司機一事？譚稱不清楚。
譚指，鄺港傑會接女兒放學，蔡經常也會，而譚自己則每周一至兩次。
郭莎樂展示蔡與譚於 2023 年 2 月 21 日（蔡遇害當日）的語音訊息謄本，蔡稱：「轉頭得閒同你講啲嘢，你睇吓，Damon（鄺港傑）幾奸狡吖，呢啲人個心幾唔好呀，一陣同你講嘅嘢」。譚稱，不知道蔡想跟他說甚麼。
郭莎樂指，當蔡提及鄺港傑奸狡、「心唔好」時，譚有否驚訝？譚稱「要用到呢個形容詞，我覺得係（驚訝）」，同意是蔡首次這樣形容鄺港傑。郭莎樂問「呢啲人」是指誰？譚稱是鄺家。
郭莎樂繼續展示兩人對話，蔡向譚稱「你望吓，你一返工，個個好似好唔抵得咁」、「Damon 連續 3 日（問）：『咦今日返工咩』、『今日返工咩』、『係唔係真係返工呀』」，當時譚正工作，不能送小朋友返學，而蔡跟鄺港傑在車上的情況？譚方駿同意。
10:38 譚：妻告知給錢鄺港智炒錶時
感到「俾人瞞」、不快
主控郭莎樂問及譚方駿與鄺港智的關係。譚確認，在學期間與鄺港智為好友，當他在澳洲留學後回港，亦與鄺、蔡天鳳為好友。譚指鄺港智失蹤後，他與鄺的感情降低，曾跟蔡帶子女回內地與鄺見面一次，又指跟鄺維持關係的最重要原因是小朋友。
郭莎樂指發燒爭執事件後，蔡天鳳告訴譚，關於鄺港智的甚麼事情？譚稱，妻子說有給錢鄺港智炒錶，但譚不知道總額，而以他理解至少過千萬元。郭莎樂，資金來源是甚麼？譚稱是譚家的錢。
郭莎樂問，譚知悉後有何反應？譚稱聞訊感驚訝，「即係又去攞去畀佢哋屋企嘅人，去攞去投資呀？」、「嗰下係打咗個突囉」。郭莎樂問，當時他對鄺港智的感覺有轉變？
譚稱有，「雖然我知道，我太太之前有同佢（鄺港智）交易鐘錶呢啲事，但係都總會有啲俾人瞞嘅感覺，因為我唔係好清楚，我太太點解當時會咁樣啦，即係會搵佢（鄺港智），咁所以唔開心就一定有嘅」。
郭莎樂問，他對誰感不開心？譚稱「老實講，係對兩個人都有唔開心嘅嗰陣」。郭莎樂指，譚仍跟鄺港智維持關係是因小朋友？譚稱是「最主要係啦」。
郭莎樂問，為何要跟鄺港智維持關係？譚稱表面上視他為好友，「目的係，想攞返屬於自己屋企嘅嘢」。郭莎樂問，那麼實際上？譚問「實際上，即係個心入面呀？」郭莎樂指「你的心入面」，譚稱「此情不再」，補充「I would say the friendship」（我是指友情）。
10:27 譚：父親找鄺球幫忙處理還償
鄺球向父稱涉「偏門嘅人」需 100 萬「茶水錢」
主控、資深大狀郭莎樂開始覆問譚方駿。就償還 500 萬元一事，郭莎樂問有誰牽涉在內？譚稱「我 Daddy 同埋鄺球」，指以他印象，父親「寫咗張票畀鄺球」。郭莎樂問，即鄺球是譚父及賭場之間的中介人？譚指，父親找鄺球幫忙，「搵渠道搵返正確嘅人或者公司去還」，也無法知悉騷擾者是否債主一方。
郭莎樂問，支票是多少錢？譚稱父親告訴他是「590 幾萬左右」，但他未見過該支票。郭莎樂指，如譚還錢予騷擾者，已可了結事件？譚稱「完全識別唔到呢班人，講真定講假嘅」。郭莎樂指，所以他找鄺球調查？譚稱「當時係」。
郭莎樂關注甚麼是「茶水錢」，譚稱據他理解，「搵黑道嘅人做啲嘢，畀啲錢佢哋打通關係，因為賭場係偏門嘢啦，可以搵啲賭錢偏門嘅人，咁去幫我哋搵返嗰間（債主）公司」。
郭莎樂問，是誰收「茶水錢」？譚稱是以他所知是「黑道嘅人」。法官祁彥輝問，「以他所知」是基於甚麼？譚稱是「基於成長嘅一個認知」。
郭莎樂問，譚方駿有否直接跟鄺球溝通？譚稱，跟父親、蔡天鳳、鄺球吃飯時，「我 Daddy 同鄺球講，我哋俾人騷擾，有冇方法解決呀，佢意思係還返錢畀人」。他指，知道鄺球是前警員，「黑白兩道都識」，事前有「出嚟同佢哋交代下」，收錢後再沒有。
郭莎樂問，除鄺球外，譚方駿沒法接觸到「偏門嘅人」？譚稱沒有。郭莎樂問，是鄺球跟譚說，「偏門嘅人」要 100 萬元？譚稱是後期從父親得知，「鄺球係咁樣同佢講」，又指還錢後沒再被騷擾。
10:00 譚：沒見過鄺港智使用暴力
代表鄺港智的大狀安華暉繼續盤問譚方駿。譚日前供稱，蔡天鳳 2022 年 6 至 7 月因長女發燒一事與鄺球爭執，而他與鄺港傑曾阻止鄺球衝向蔡。譚同意，鄺港智當時只說話，而鄺一貫不會動手。
安華暉指，鄺港智是一貫不會動手，他也很細膽？譚指，「我噚日都講過，我冇見過或者聽過，佢對蔡天鳳使用暴力」。安華暉指，鄺港智對其他人亦一樣？譚稱沒見過他使用暴力。
代表鄺港傑的大狀 Trevor Beel 針對譚方駿借 500 萬元賭博一事補問。Beel 指，譚借 500 萬元，而與追債者商討後，最後還了 600 萬元？譚稱「應該係」。Beel 指，他錄口供也是這樣說？譚同意，還款比原本金額多 100 萬元，「係好多所謂茶水錢、跑腿（錢）」。
Beel 指簡單而言，大部分向財務公司借錢都有利息？譚稱不同意，因對方是澳門賭廳，不是一間真正財務公司，「佢出咗 100，你畀返 100 佢，冇一個利息喺嗰度」，指多出的 100 萬元是「茶錢」，「呢度亦都可以問返我 Daddy，因為呢個最後係佢同佢（追債者）交涉」。
Beel 指，但他知道向賭場借錢要還利息？譚不同意，指涉龐大金額，「點解要搵呢啲人交涉，因為從中可以同佢講，600 萬變 500 萬得唔得呀？」
Beel 指，譚同意借了 500 萬，還了 600 萬？譚稱「我同意亦都唔同意」。Beel 指，但譚已承認在口供也是同一說法？譚稱「所以我依家要解釋返，多咗 100 萬係所謂嘅茶錢，請人飲吓茶，幫手搞返掂呢單嘢」。Beel 重複問題，譚稱「數字上你可以咁睇，係」。
3 人被控謀殺、阻止合法埋葬
被告依次為鄺港傑（31 歲，司機）、鄺球（65 歲，退休人士）及鄺港智（28 歲，無業）。鄺港傑由大狀 Trevor Beel、劉奕勤、李宣儀代表；鄺球由大狀戴奧偉（Oliver Davies）及羅天祺代表；鄺港智由大狀安華暉（Andrew J. Raffell）、劉皚淇及鄧樂齊代表。
控方由外聘資深大狀郭莎樂（Charlotte Draycott）、高級助理刑事檢控專員梁育珩、高級檢控官林曉敏、吳希樂與檢控官尹培軒代表。案件由暫委法官祁彥輝（Brian Keith）審理。
3 人否認謀殺罪；鄺港傑、鄺港智承認阻止合法埋葬屍體罪，鄺球則不認罪。謀殺罪指，3 人在 2023 年 2 月 21 日，在大埔龍尾村 56B 地下謀殺蔡天鳳；阻止合法埋葬屍體指，3 人於 2 月 21 日至 23 日期間，在香港阻止蔡天鳳的屍體被合法埋葬。
HCCC198/2025