蔡天鳳疑遭殺害碎屍案周二（13 日）進行第 15 日審訊，控方傳召蔡天鳳的丈夫譚方駿作供。譚供稱與鄺港智是同學，約於 2013、2014 年透過鄺認識蔡天鳳，當時鄺與蔡已婚。鄺港智其後突然失蹤，蔡告訴他：「人安全嘅，但唔知佢喺邊度。」譚指，之後常與蔡外出、一起照顧小朋友，漸生感情，二人於 2015 年底拍拖，約一個月後結婚，並確認至今仍有照顧鄺、蔡的兩名子女。
另外，辯方大狀 Trevor Beel 上周盤問蔡母張燕花時，提及有警員前一晚以微信聯絡她。偵緝警員高恩祺今供稱，因審訊出現有關黃埔花園物業的新資訊，須向張索取資料作出調查，強調自己沒與對方商討案情，是張主動提及早前作供出錯。
Day14｜蔡母完成作供 否認蔡、鄺港智助還賭債 官指部分屬傳聞證供
編按：報道涵蓋庭上描述的案件過程細節，或會引起不安。
訂閱／贊助／購物，支持《法庭線》報道香港，記錄香港。
15:40 譚：蔡不想長子女被比下去
營造鄺家「唔需要靠人」錯覺
小休後，譚方駿再解釋蔡天鳳的投資情況。譚供稱，當時他只知道「佢（蔡）用咗筆大嘅錢投資物業，我唔知咩嚟、有冇佢名、喺邊，所以之後我喺會所見到鄺球個名，我冇乜特別大驚訝、特別去問佢，係因為我冇諗到」。譚又指，及後蔡遭鄺球襲擊，蔡當晚才告知他，她所買的物業「就係呢度」。
譚補充，「以前 Abby somehow 係會包裝到佢哋屋企（鄺家）係唔錯」，因為當時蔡會告訴他，「佢哋一家人（鄺家）都搵到錢、都唔錯㗎」，讓譚家一方有此錯覺。
譚指，所以當他在會所見到加多利山單位業主是鄺球時，他只以為是鄺自己的物業，「當時見到佢（鄺球）名冇驚訝、特登問佢，因為我覺得好正常啫，你買住嗰度」。
譚又解釋，因為當時蔡離婚後，「帶住兩個小朋友，唔係我嘅親生小朋友⋯我哋屋企都叫條件唔錯，喺佢（蔡）角度，唔想喺我哋啲小朋友相處時，佢啲小朋友冇咁矜貴，即係會被比下去，所以佢營造呢個效果畀我哋一家睇，其實原來佢哋（鄺家），好似佢哋（鄺家）過得唔錯啵」，直到及後出現爭執。
主控郭莎樂續指，譚家富有，而蔡離婚後亦帶着兩名長子長女，相較蔡與譚家所生的兩名子女，孩子之間財政上亦有大差別，令蔡感到擔心？譚確認。
郭莎樂提到，當時蔡希望 4 名子女可以平等相處？譚指，當時「佢（蔡）包裝佢哋（鄺家），令到我哋產生一個錯覺，令到我哋覺得佢哋（鄺家）都唔需要靠人、唔需要乜嘢，佢哋都搞得掂自己，呢個錯覺」。郭莎樂問，當時實際上由誰供養鄺家？譚指他有猜測，但當時不肯定，譚亦未曾見鄺家的人工作。
15:25 小休
15:00 譚方駿：鄺球兩次衝向蔡
其中一次由譚隔開
譚方駿續提到，當時鄺球先後兩次衝向蔡，第一次衝前時，「Abby自己避啦，唔係完全避開到嘅」。第二次衝前時，譚上前隔開兩人。譚於庭上示範當時的情況，指鄺球撲向蔡，蔡想避開鄺球，但亦被碰到上半身。
譚憶述，當時鄺港傑協助拉開鄺球，隨後繼續嗌交，當時譚及鄺家其他人亦叫鄺球先行離開，隨後鄺球便帶同其隨身物品離開單位。譚指當時蔡仍非常生氣。
譚憶述，隨後蔡對他說「老公呀，我哋真係要盡快離開呢一家人啦，佢哋越嚟越恐怖，唔識感恩」。蔡便向譚交代加多利山單位的情況，譚才知道該單位屬於蔡。
譚指他本身亦認為單位屬蔡，但及後又曾看到文件，該文件提到單位業主為鄺球，而當時譚亦沒有了解蔡以誰的名義購入單位。
譚補充，他在 2022 年的「小插曲」前，曾在加多利山的禮賓部看到每個單位業主的名字，即鄺球的名字。譚指，當時亦沒有特意去問蔡，他亦不知道蔡的投資情況，「因為好多投資嘅嘢係佢（蔡）搞嘅」。
法官關注，當時譚沒有追問為何單位登記在鄺球的名下，而譚亦不知道蔡如何處理譚父給蔡投資用的金錢？譚回應，他知道蔡有投資，但不知道是加多利山單位，「之後見到（單位登記在）鄺球名時，我冇特登問，因為佢（蔡）話畀我聽，佢哋屋企（鄺家）一直係唔錯，但我知係假象，我依家知係假象，係佢哋一路營造緊出嚟」。
14:45 譚方駿：目睹鄺球衝前打蔡天鳳
主控郭莎樂提到，當「譚仔」售予日本公司後，當時譚家變得非常富有？譚方駿同意。他指，及後蔡天鳳選擇加多利山單位，把兩名長子長女搬過去。
譚方駿又形容，他的父親與蔡天鳳的關係「十分良好」。郭莎樂指，譚父對蔡亦非常大方？譚方駿確認，指父親會每月提供 20 至 30 萬元作為生活費，讓他與蔡應付生活，包括子女學費、補習費及旅行支出等，「全部都係 Abby（蔡）搞」。
譚又提到，父親另會給錢予蔡投資，父親曾給予蔡有 7,000 至 8,000 萬元。至於蔡如何運用該 7,000 多萬元，譚指「唔係樣樣我都會知道」，但譚知道蔡買下加多利山單位。
郭莎樂追問譚如何得知？譚憶述，2022 年暑假前，約 6、7 月，「當日喺加多利山時候有個小插曲」，指蔡的長女在家發燒，蔡到單位探望女兒，譚亦有前往加多利山單位，而當時鄺港智亦在場。
譚續指，他一開始在客廳，聽到長女的房內有人討論發燒的問題，他隨後亦進入房間。譚憶述，當時見到蔡、鄺港智、鄺母李瑞香亦在場，「講緊啲小朋友發燒嘅事情」。譚供稱，當時蔡對李瑞香說，「做人父母喺咁㗎啦，個個仔女發燒都會去睇，驚咩惹到呀？你個仔就係仔，我個女就唔係女呀？」而鄺港傑及鄺球亦在場。
譚解釋，當時李瑞香曾着鄺港智「你唔好哄咁埋去」、「一陣間惹到你呀」。隨後譚便聽到蔡對李說，「你個仔就係仔呀，我個女就唔係女呀，做老豆老母，小朋友病咗，就自然會去睇佢、照顧佢㗎啦，就算病咗又點呀？」
譚庭上指，以他的理解，當時蔡認為李是重男輕女。而蔡當時情緒高漲，感到不開心及生氣。至於在場的鄺港智，譚指「唔記得佢有出咩聲」。
譚又指，當蔡與李瑞香爭執時，「嗌到越嚟越火烈嘅時候，我哋全部人都入咗去睇咩事，然後就我諗係 Abby 情緒太高漲，鬧緊李瑞香嘅時候，我就見到鄺球衝埋嚟打 Abby」。譚形容，當時鄺球「係制止唔到嘅」。鄺球亦罵蔡「我屌你老母臭閪、鬧我老婆！」鄺重複數次。而蔡當時亦有反罵鄺球，鄺球又罵「你係啲乜嘢嚟啫，你係生仔機器嚟咋」。
14:30 蔡與前夫子女遷居原因、單位租或買
譚方駿指不清楚
蔡天鳳丈夫譚方駿繼續作供。主控郭莎樂問，蔡遷入與譚家同住後，為何把她與鄺港智的兩名子女遷居到海逸豪園？譚回應指，因為當時蔡與鄺正進行離婚手續，兩子女交由女傭照顧，但為何兩子女搬家到海逸豪園，「咁我唔係好清楚」。
譚又指，曼克頓山單位與海逸豪園的車程約 15 至 20 分鐘。至於海逸豪園單位的費用由誰支付，是否租借或購入，譚表示不清楚，又指該單位當時與譚家沒有關係。
郭莎樂再問及譚家的背景，譚方駿指曼克頓山的單位是其父母持有。郭莎樂再指，譚的父母則擁有譚仔餐廳集團，隨後售予日本公司。譚指公司於 2018 年以 10 億元出售，而譚的父母及姑丈與姑媽 4 人均為公司股東，4 人平分收益，每人佔 25%，但譚不知道家人是否有債務要償還。
譚指，隨後一家人由曼克頓山搬到九龍塘海棠路的獨立屋，價值比曼克頓山單位更高。至於蔡的兩名長子長女，譚指當時該兩名長子長女由海逸豪園搬到維港‧星岸，及至 2019 至 2020 年間，該兩名子女搬到加多利山單位。至於誰支付維港‧星岸的單位，是否購入單位或租用單位，譚對此不清楚。
郭莎樂追問，當時為何兩名長子長女會搬到加多利山單位？譚解釋，因為與九龍塘的單位距離近，是 5 分鐘車程，「方便佢兩邊睇」。譚指當時亦沒有看到鄺港智，但譚曾在維港‧星岸見過鄺的母親李瑞香，李長時間住在單位，「我諗佢 Daddy 都喺嗰度住，但嗰個時間可能係一個禮拜住幾日」。對於由誰支付該兩子女的開支，譚亦不知道。
13:02 午膳
12:42 蔡天鳳丈夫譚方駿開始作供
蔡天鳳的丈夫譚方駿開始作供。郭莎樂問，譚何時認識蔡？譚指是 2013 年底、2014 年初，透過蔡的前夫、即鄺港智認識蔡，並確認當時與鄺是同學，「我哋香港讀書時，佢仲未同 Abby 一齊」。
譚續指，他之後赴澳洲讀書，放假返港期間，鄺港智透過 Facebook 約他見面，「然後佢介紹埋太太出嚟」，因而認識蔡。郭莎樂問，第一次見蔡時她已婚？譚指：「據我所知，當時已經結咗婚」，兩人住在黃埔花園，譚亦會上門到訪，也見過蔡的家人。
譚指，他於 2015 年回港，照常跟蔡、鄺見面，之後有一日得悉「鄺港智唔知去咗邊度」。他曾問蔡發生何事，蔡稱「人安全嘅，但唔知佢喺邊度」。譚稱，「完全唔知咩事，聯絡唔到呢個人，由嗰一日搵唔到佢開始，就冇見過呢個人，跟住之後佢完全消失咗」，直到 2022 年再次見到鄺。
譚指，蔡確認鄺港智的情況後，他沒再去找鄺，「因為我相信佢（蔡）聯絡到佢（鄺），我亦都冇去 found out 佢咩事」。
譚指，之後跟蔡經常外出，「照顧埋啲小朋友一齊，久而久之就發生咗感情」，2015 年 12 月 8 日正式拍拖。大約一個月後、即 2016 年初，兩人商量「想行落去」，於是結婚。一個月至個半月後蔡懷孕，譚的親女同年 9 月出生。
譚指，兩人拍拖一個月後，蔡從黃埔花園搬往曼克頓山，蔡、譚、親女兒與譚父母同住。蔡、鄺的兩名子女與家傭則居於海逸豪園，指「我太太當時每日都會上去」。
譚續指，自己會視乎情況前往海逸豪園，「好多時都會上去」，蔡母則不時前往。他指，當時沒在海逸豪園見過鄺港智父親，但「一段時間會見到（鄺母）一次」。
郭莎樂問，鄺港智失蹤後，譚都有照顧蔡、鄺的兩名子女？譚同意，「直至去到今日」。
11:56 涉案七人車車主作供
稱借出車輛逾兩周未還
據控方開案，本案牽涉兩輛豐田 Alphard 私家車，一輛是蔡天鳳購買用作接送子女，車牌為 AA3383；另一輛是鄺港智向友人借的私家車，車牌為 VY9157。
控方傳召私家車 VY9157 車主伍登輝（音譯）。郭莎樂指﹐伍登輝透過公司擁有一部豐田 Alphard 汽車？伍確認是有關公司的董事。
伍指，鄺港智是胞弟伍登浩（音譯）的朋友，胞弟介紹鄺港智予他認識。伍稱，跟胞弟視像通話時，鄺港智在旁邊。鄺港智從內地回港後，他亦跟對方吃過一次飯，「都係閒話家常」，沒跟鄺港智生意來往，胞弟介紹鄺港智是從商。
郭莎樂問，伍的胞弟現在哪？伍稱加拿大或大陸，指他不接電話，「成日都十問九唔應」。
伍稱，胞弟在 2023 年向他稱，鄺港智的私家車正維修，需要借一輛車兩星期，接送子女上學。伍指，該車屬家庭所擁有，「我 Daddy 話 OK」，故同意借出，但要求鄺盡快歸還，因他的太太懷孕。
伍稱，該車最終借出逾兩星期，故催促胞弟，指胞弟稱「我會追」。
控方展示 2023 年 2 月 7 日晚上 7 時伍樓下停車場的情況，確認曾借車。他指，見到有人來取車，遂問對方是否鄺港智的朋友，對方指是「Alex（鄺港智）嘅司機」﹐又指車上有另一位司機。
辯方安華暉問，若鄺港智有跟伍胞弟投資，胞弟不會告訴他？伍稱，胞弟與鄺港智是朋友多於生意拍檔，每次他找胞弟時，兩人都正在一起。安華暉問，但可以同時是朋友及生意拍檔？伍同意。
11:35 小休
11:15 調查警覆問下進一步解釋職責
郭莎樂覆問指，張向高傳訊息，高顯得不欲介入？高稱，因為當時已經有其他隊伍接手調查。郭莎樂指，兩人最後對話是張問是否 45 日審訊「日日都要去」，高回應不用？高同意。
郭莎樂問及高的職責，高指會搜集證據，包括法證證物、CCTV，包括鄺球租龍尾村單位的片段。他指，「我係冇落手落腳參與，我係同案件主管一齊、一路記錄，搜集返嚟嘅證據」。
郭莎樂指，本案牽涉大量 CCTV，由誰觀看及整理？高指是證物警 9682，但其他警員包括自己，都有幫忙看 CCTV，再由 9682 整合。郭莎樂問，用了多少時間看 CCTV？高稱「多到不能計算」。
10:50 辯方：蔡母有否持物業屬重要議題
調查警：我唔覺得係最主要嗰點
代表鄺球的大狀戴偉奧問，針對張的物業，有何供詞要澄清？高恩祺稱：「針對依個唔係謀殺案嘅重點，就算有需要都係之後，因為當時查謀殺案，有好多證據要處理，嗰啲證據，比佢是否有物業更有力」。
戴偉奧指，本案主要議題是為何加多利山單位登記在鄺球名下，而非蔡天鳳或張燕花名下。高稱：「係其中一點，我唔覺得係最主要嗰點」。戴偉奧續指，是重點議題，高稱「可能你覺得重要啦」。
戴偉奧指，張燕花在購買加多利山單位時，是否持有物業是重要。高稱：「我唔認為係重要嘅事情，比其他重要證據⋯⋯重要得嚟比較次要少少」。
戴偉奧指，議題重要到在張作供期間，高需要向她索取黃埔花園地址？高同意，「因為呢個係新嘅資訊，所以我按指示做查冊」。戴偉奧問，高在 3 年半調查期間，曾問過張有否物業？高稱沒問過，亦不知道其他人有否問過，「呢份口供係另一警員同證人索取，可能佢會有問到，但我冇」。
官問，高知否因張持有物業，所以加多利山單位要登記在他人名下？高稱：「我唔知道㗎，都係從事實去判斷」。
戴偉奧問，高為何索取黃埔花園地址？官打斷指，是上級要求。郭莎樂亦站起欲解釋原因，官再度打斷指：「你不是證人」。戴偉奧問，高的上級有否告訴他，為何要黃埔花園地址？高稱沒有。
戴偉奧完成盤問，代表鄺港智的大狀安華暉沒有盤問。
10:34 蔡母向警透露被追數 160 萬
強調 7 年前已跟對方互不相欠
2 月 2 日，張燕花、高恩祺在微信部分對話如下：
高：管理層指派咗反黑組跟進案件 張：以前大家都係好朋友，佢都經常嚟我屋企食飯，但係以前呢啲麻雀數。即係呢今日我打贏佢，佢就爭我嘅，聽日佢打贏我，大家都可以講後數後數。但係已經 7 年前已經講咗，大家已經互不相欠⋯⋯ 跟住佢話佢新義安，佢幫胡西收錢，我話我都冇爭錢收咩錢呀，跟住佢就話仲爭 160 萬，我話冇冇。我冇爭佢錢呀，我話呢 7 年幾，我哋都有時打麻雀，成日都有見面，從來冇提過件事。就係呢兩個禮拜，跟住又俾佢貼街招呀，話爭錢唔還，跟住又搵黑社會嚟恐嚇、叫做勒索，而家啲法治社會，點可以咁樣恐嚇勒索我呀
Beel 問，張一時稱跟「胡西」6 至 7 年沒聯絡，一時稱「呢 7 年幾，我哋都有時打麻雀」，兩者有矛盾？高同意。
同日對話繼續如下：
張：佐敦嗰個金沙麻雀館，我都幫襯佢好多⋯⋯我一個人呀，我打金沙嗰度都輸咗幾千萬
Beel 問，高當時知悉張輸很多錢，關注到有人向張追數？高稱「未關注到」。Beel 指，但高早前回覆，管理層關注張收到恐嚇勒索的情況﹐又指反黑組正調查，他有否問反黑組調查結果？高稱沒問、不知道調查情況，「案件進度如何不需要通知我嘅」。
Beel 問，張提到「輸咗幾千萬」是真實還是誇大？高稱無從得知，其次，張所指的「輸幾千萬」，「係咪正如佢所講，有輸有贏，一段時間底下，儲埋落嚟嘅一個數呢？咁究竟輸咗嘅呢一嚿數，有冇即時、或按遊戲規矩找清，都好取決於佢輸幾千萬，係真定作大」。
同日對話繼續如下：
高：花姐，你維港星岸是否有個地址？
高庭上解釋，「記憶中同賭錢案有關」。Beel 質疑，此部分與張的口供矛盾，張口供提到：「我現時在香港沒有任何物業，只有海南有地皮及大約港幣一千萬現金」。高指，張是指「現時」。
Beel 又指，張在口供提到「在香港沒有任何物業」，同時又表示，因自己跟蔡天鳳名下都有物業，所以加多利山單位登記在鄺球名下，他不覺得兩者有矛盾嗎？高指：「講緊 2023 年，佢話嗰時冇物業嘛，但加多利山唔係 2023 年買」。
官指，辯方是問他有否留意兩部分有矛盾？高指：「我想表達呢兩段，再加埋時間分別，我睇唔到有矛盾地方」。
10:20 蔡母向警談及今年初被騷擾
有人貼街招、座駕被淋紅油
代表鄺港傑的大狀 Trevor Beel 盤問時指，高恩祺為刑事調查人員，現駐守西九龍重案組。高確認，指已任職十多年，駐守西九龍重案組 6 年多。Beel 指，高會調查三合會案件？高同意調查涉及過三合會。
Beel 展示高與張燕花的微信紀錄。今年 1 月 28 日，張要求跟高通話。掛電後，張傳送一張橫額相片，當中有「蔡天鳳生母 花姐 借錢唔還 見字速電」等字眼。
2 月 1 日，張再傳送一張座駕被淋紅油的相片，發語音訊息：「我架車而家淋油，而家報警」、「唔同嘅性質啦，因為我又冇爭人錢，你唔明唔明呀？咁樣做呢，即係我嗰日講係我個鄉里嗰件事⋯⋯而家係勒索恐嚇」。
同日，高、張兩人部分對話如下：
高：我管理層想知道對方所講既錢銀，係同咩有關？ 張：胡西個人呢，我哋之間已經有成六七年冇聯繫㗎喇 高：即係無終（中）生有？你之前提及上一次嘅瓜葛什麼？ 張：佢就話佢係新義安⋯⋯我哋之前都係好朋友，佢又爭我，我又爭佢，佢冇錢我又借畀佢，但係最尾呢大家都互不相爭嘅。7 年前已經對咗數，已經冇爭錢㗎啦 兩個禮拜電話又騷擾，又貼街招呀，跟住又貼到屋企就係咁樣呀，跟住打電話去話係新義安，要收條數，如果唔畀條數，就會斬我，咁我話我冇爭你錢，你攞證據嚟啦，就係咁樣 高：花姐，如果你講同呢個鄉里，六七年錢銀糾紛已經解決咗嘅話，咁有咩原因最近佢會搵返你，都係同六七年前嘅錢銀糾紛有關？還是有其他新事情？因為管理層想知多少少，他們覺得事情不合理
高庭上解釋，根據紀錄及其記憶，最早於 1 月 28 日知悉張被騷擾，其後在 2 月 1 日知悉，張遭受兩星期電話騷擾、街招騷擾。
Beel 問，高在對話提到事情不合理，質疑對方隔 6 至 7 年才追債？高指，同意有機會不只跟 6 、7 年的錢銀瓜葛有關，「我亦都想話畀證人聽，等佢自己回想一次自己所講嘅嘢，因為等佢諗一次先能夠準確，等警方知道點樣去介入事件」。
10:00 調查警：聯絡蔡母因有新資訊須調查、沒商討案情
辯方大狀 Trevor Beel 上周三（7 日）盤問蔡天鳳母親張燕花時提及，有警員前一晚以微信聯絡她。
跟張聯絡的偵緝警員高恩祺繼續作供。控方資深大狀郭莎樂提到，高恩祺在張首日作供當晚，向張傳送微信訊息：「花姐 不好意思，打擾你一下，你今天作供說，你和你先生，蔡生，早年於黃埔花園的物業，黃埔花園物業的地址是哪裏？」
高周一確認，他負責就黃埔花園地址查冊。郭莎樂周二問，他本不應在審訊期間跟證人聯絡？高同意。
高解釋，張當日作供提及一個黃埔花園地址後，他看看能否找到有關地址，惟翻查案件紀錄不果，只能找到張早年居於黃埔花園。他指：「鑑於佢呢個係新資訊嚟，我需要就新資訊作出調查」，因此晚上詢問張的黃埔花園地址。
郭莎樂問，高問及張的地址，他是否同意不應聯絡張？高稱：「我唔接納，我係唔可以同佢商討案情，喺法庭期間我都要一直聯絡佢，包括每日出入，我重申，聯絡佢係有新嘅資訊要調查，得到相關資訊去完成我嘅工作」。
郭莎樂指，即高將對話限制於詢問地址方面？高同意。郭莎樂續指，張在對話自發表示：「今天生氣，我最清楚阿女加多利山是大寶貝了，今天生氣，黃埔花園時間長了，當時以為是連名，很多年了，說錯了」？高同意，指沒問及有關資訊，「呢個都唔係我期望佢答我嘅答案嚟」。
郭莎樂問，高為何每日要聯絡張？高稱：「係審訊期間每日嘅出入，包括提醒佢需要到法庭嘅時間」。郭莎樂問，高本身是否本案證人？高稱「我應該唔喺（證人）列表裡面」。
3 人被控謀殺、阻止合法埋葬
被告依次為鄺港傑（31 歲，司機）、鄺球（65 歲，退休人士）及鄺港智（28 歲，無業）。鄺港傑由大狀 Trevor Beel、劉奕勤、李宣儀代表；鄺球由大狀戴奧偉（Oliver Davies）及羅天祺代表；鄺港智由大狀安華暉（Andrew J. Raffell）、劉皚淇及鄧樂齊代表。
控方由外聘資深大狀郭莎樂（Charlotte Draycott）、高級助理刑事檢控專員梁育珩、高級檢控官林曉敏、吳希樂與檢控官尹培軒代表。案件由暫委法官祁彥輝（Brian Keith）審理。
3 人否認謀殺罪；鄺港傑、鄺港智承認阻止合法埋葬屍體罪，鄺球則不認罪。謀殺罪指，3 人在 2023 年 2 月 21 日，在大埔龍尾村 56B 地下謀殺蔡天鳳；阻止合法埋葬屍體指，3 人於 2 月 21 日至 23 日期間，在香港阻止蔡天鳳的屍體被合法埋葬。
HCCC198/2025