蔡天鳳疑遭殺害碎屍案周三（14 日）進行第 16 日審訊，蔡的丈夫譚方駿繼續作供。譚憶述，在妻子失蹤當日，他傍晚到加多利山單位尋妻不果，李瑞香認為是綁架，曾稱「人哋可能想要錢啫」。譚事後回想覺得李想拖延他報警，掩蓋「佢哋一家做過啲事」。
譚又提到，事發兩天後，他與鄺港傑與警員到大埔尋找妻子下車位置，離開後他接到警員來電指「極度懷疑」鄺家涉案，提醒譚「快啲離開佢」；譚稱當時「危機意識先湧上嚟，又指「我開始諗返我同佢嘅對話⋯其實好似呃緊我、瞞緊我」，他庭上飲泣及深呼吸。
Day15｜譚方駿：目睹鄺球粗言罵及衝向妻 妻為子女平等營造鄺家不錯假象
第四年，我們仍在現場。
支持《法庭線》，讓我們走得更遠。
譚方駿：妻最後訊息 14:06 發出
主控、資深大狀郭莎樂針對 2023 年 2 月 21 日、蔡天鳳遇害當日情況提問。譚方駿供稱，當日他在中環「九頭鳥米線」工作，他早上起床時蔡仍在睡覺，隨後兩人以電話聯絡，控方展示兩人的 WhatsApp 對話。譚確認，蔡的最後一個訊息在當天下午 2 時 06 分發出。
2023.2.21 胖🐷老婆👸
14:02 蔡語音訊息：今日忙唔忙呀 bb
14:02 譚轉發友人語音訊息：譚公子譚公子轉身未呀
喂，想問吓你今晚有冇期呀，我哋去食辣蟹， 因為我今日 6 點半、7 點我有個細 function仔，8 點鐘左右同呀Kenny，你同太座得唔得閒去食辣蟹，喺尖沙咀
14:03 譚語音訊息：8 點約 Kenny⋯尖沙咀
感覺上冇尋日咁忙
14:06 蔡文字訊息：OK
蔡語音訊息：你又出咗去食煙煙豬呀？
14:51 譚語音訊息：我依家係廁所 啱啱 book 咗興記
16:13 譚文字訊息：What’s wrong with your phone?
16:21 譚文字訊息：I thought something wrong with your iPhone
16:26 譚文字訊息：？
16:39 譚文字訊息：你電話俾人執左 ？
17:27 譚文字訊息：😩？
18:10 譚文字訊息：？
19:25 譚文字訊息：？
2023.2.22
13:31 譚文字訊息：？
2023.2.23
20:33 譚文字訊息：？
2023.2.24
15:22 譚文字訊息：？
譚提到，他發現自己發訊息予妻，訊息由單剔變成雙剔，他理解當時妻子「部電話至少開返過」，他感不尋常，便使用「Life 360」程式查看，顯示蔡手機位於大埔、最後時間為 4 時 18 分。譚指當時非常擔心，他一直使用程式，晚上曾到所顯示的位置尋妻。
譚：李瑞香欲轉移視線
指有人綁架蔡
譚方駿憶述，他當日亦曾致電鄺港傑查問妻子行蹤，但鄺表示不知道，鄺曾指蔡在大埔中心附近下車。譚指，他事後跟鄺港傑回到有關位置，「佢話畀我聽，佢邊度落車」，語畢大力呼氣。
譚形容，平時蔡甚少不回覆訊息，當天他亦不斷致電蔡，但無人接聽，指妻子當日應該要接子女後回到加多利山單位。譚指他當天傍晚 6 時下班，6 時半回到加多利山單位，嘗試找蔡但不果，而鄺港智、鄺港傑、李瑞香則在單位，「我印象鄺球應該唔喺度」。
譚又指當時感疲倦，躺在客廳沙發上睡覺。他亦有向鄺家查問妻子行蹤，「李瑞香有同我講過，人哋可能想要錢啫，你咁快報咗警，人哋點會畀錢你呀？」
譚認為，事後回想，李當時欲轉移視線，指有人綁架蔡，譚補充「呢個係我今日睇嘅眼光，佢可能想搵啲嘢冚住，佢想搵啲嘢，自己甩身囉叫做」，想掩蓋「佢哋一家做過啲事」。
譚指當時他亦有提到報警。郭莎樂指，但李瑞香覺得太快報警？譚稱：「你問返我，我感覺返，佢好似係拖住我咁」。
譚：問妻行蹤時鄺家表現平淡
「完全唔似擔心」
譚形容，當他詢問鄺家，蔡的行蹤時，「佢哋（鄺家眾人）表現係平淡，但內容基本上問佢哋 Abby 喺邊度，咁佢哋係表現平淡之餘，係表達唔知嘅⋯⋯完全唔似擔心」。譚指：「我當刻係覺得有啲驚訝，點解唔係好着緊嘅，我唔會估到係你哋一家做㗎嘛」。
譚續指，知道手機顯示最後位置後，晚上駕車到該位置找蔡不果，當晚亦有繼續赴飯局。譚指「嗰餐飯食得好快，返屋企諗住佢喺屋企」，惟回家後仍不見蔡。他便打給蔡母張燕花，張稱不知道蔡位置，「我同佢講話，真係成個人唔見咗，電話冇訊息、又冇消息，我哋係咪應該要報警」，兩人遂前往長沙灣警署報警。
譚稱，聽到張燕花致電鄺港智，他聽不到鄺的說話，但聽到張斥：「你仆街呀，你先仆街呀，我個女依家唔見咗，我報警好正常啫」。譚又指，張亦嘗試找鄺球、鄺港智問蔡的位置。
譚：警通知懷疑鄺家
着盡快離開身旁的鄺港傑
控方引述 2023 年 2 月 22 日（蔡遇害翌日）下午 3 時 23 分，譚方駿與鄺港傑的訊息，當中譚向鄺查問蔡的準確下車位置，鄺當時回應「可能要兜返去附近先記得」，又指「冇特別記得」位置。譚庭上稱，對鄺所言感懷疑，認為鄺「帶緊我遊花園」。
翌日，譚與鄺港傑、失蹤人口調查組警員到大埔找蔡；鄺展示蔡下車位置，譚與鄺隨後按原定日程接子女放學。但當鄺港傑駕車駛經馬場時，譚收到警方來電，而當時「Madam 喺電話同我講，我哋依家極度懷疑，佢哋一家人、鄺家一家人，包括坐我隔籬嘅鄺港傑，佢問我有冇方法依家返嚟大埔，我哋頭先離開個位」。
譚指，他當時向鄺港傑稱「Madam 要你返現場協助」，而女警當時告訴他「你可以叫到佢返嚟就叫，同你快啲離開佢」。譚之後接手駕車接小朋友放學，並為鄺港傑召 Uber 返回大埔現場，鄺及後被捕。
譚：回想覺鄺港傑
「好似呃緊我、瞞緊我」
在代表鄺港傑的大狀 Trevor Beel 盤問下，譚形容當他收到女警來電後，「我危機意識先湧上嚟，唔係身邊嘅人就冇事，原來有啲咁嘅事發生緊，即係佢哋係疑犯」。譚又指，「我開始諗返我同佢嘅對話，一直都係引我去另一個位，其實好似呃緊我、瞞緊我」。譚作供期間亦有飲泣、深呼吸。
Beel 則指出，譚記錯 2023 年 2 月 21 日發生的事，指譚到加多利山的單位時，當時可能只有女傭在家，沒有其他人。譚解釋，當時他下班回家後，先到梳化睡覺休息，但他已忘記眾人是在他睡着前已在家，抑或睡醒時才到家。
譚補充，因為當時他重約 183 磅、患嚴重脂肪肝，「我係好需要休息，工作咗 7 個鐘，所以我瞓咗。」
Beel 引述 2023 年 2 月 24 日、3 月 23 日譚向警方錄取的口供，提到他於 6 點半到達加多利山單位時，他先到梳化睡着，而鄺港智、鄺港傑、李瑞香及鄺港智的長子到達單位。
譚庭上重申無法記得當時情況，「嗰一刻我唔會好記得，當時我唔會知道呢單嘢，係佢哋一個人、定佢哋一齊做」。Beel 再引述譚當時的口供，譚於 7 時 20 至 25 分離開單位，到警署報警，之後再返回加多利山單位，隨後李瑞香再質疑他報警。譚確認口供內容。
辯方展示蔡、鄺港傑相處片段
Beel 另針對譚方駿與鄺港傑的關係提問，譚指，印象中鄺家搬到維港‧星岸居住後，才第一次認識鄺港傑，並確認自己是透過蔡天鳳而認識對方。譚指，蔡曾提及鄺港傑曾在美國，鄺亦提及美國經歷。Beel 提到，鄺港傑曾在 University of California Irvine 讀書，修讀經濟學。譚指不知道。譚另確認，鄺港傑於 2022 年 11 月暫時擔任司機。
Beel 形容，鄺港傑、蔡及譚曾經關係緊密，2020 年後經常一同出門、用膳，亦有共同朋友？譚同意。Beel 指，外出費用七成由譚支付，三成由鄺港傑支付？譚回應，「佢（鄺）真係揞卡揞錢，可能有但我唔知，但你問返我眼光，可能係 85%（譚）同 15%（鄺）」。
Beel 播放 3 段來自鄺港傑電話的片段，均於 2021 年 8 月拍攝。首段片段是鄺港傑拿着電話，跟蔡在港的子女視像通話，鄺叫她起床，稱「你肯起身未呀天鳳姐」，蔡發笑。
第二段是鄺港傑準備扣上安全帶玩「笨豬跳」，蔡稱：「我驚你肥得濟條繩斷咗呀」、「好勇敢呀大伯真係」；第三段是鄺在餐廳拍攝蔡，「你忍唔住去賭呀嘛」，蔡笑：「我都唔想」。
譚確認，曾與蔡、鄺港傑曾到澳門賭錢，他或蔡借 500 萬元賭博。Beel 指，2022 年 1 至 2 月，有追數的人曾於譚住所外出現？譚確認，指蔡亦知道此事。Beel 指，當時司機駕車時，蔡要躲在車內？譚指不清楚。Beel 再指，鄺港傑於 2022 年 2 月向蔡提供 60 萬元處理澳門債務？譚指不知道。
Beel 指，鄺港傑與蔡曾開設雞蛋仔店，因蔡的長子長女喜歡吃雞蛋仔？譚同意雞蛋仔店以長子名字命名，但只不是因為子女喜歡而開店，又確認因疫情關係，該店只維持一年。
Beel 問，蔡是否為人較強硬、喜歡作主？譚不同意，指蔡處理事情能力強，「尤其是小朋友嗰方面，跟住投資嗰方面，佢比我認識更加多、更加多，我係一無所知」。
辯方質疑蔡沒針對鄺港傑
譚不同意
就譚方駿周二供稱，2022 年暑假前蔡因長女發燒一事與鄺球爭執，曾兩次衝向蔡。Beel 指，當時鄺港傑與譚曾介入，鄺當時比譚強壯，他當時控制鄺球，帶他離開房間？譚指：「我同意佢當時真係大隻過我，佢嘅意圖佢點樣我唔知道，我淨係知道，我當時係心切保護我太太啫」。Beel 再問，鄺港傑與譚一同阻止鄺球衝向蔡？譚同意。
Beel 指，譚引述蔡指「我哋真係要盡快離開呢一家人啦，佢哋越嚟越恐怖」，並不包括鄺港傑？譚指，蔡是指「姓鄺嘅全家，越嚟越恐怖」。Beel 質疑，但在 2022 年 7 月後，蔡天鳳與鄺港傑仍有社交？譚確認。
Beel 再指，當時蔡其實是針對鄺球及李瑞香？譚回應，爭執事件是針對兩人，但蔡稱「佢哋一家人，冇指名道姓佢老豆又點，佢阿媽又點，佢係話『佢哋一家人』一直以嚟點樣做」。
Beel 追問，為何譚知道蔡同時針對鄺港傑？譚回應「因為好簡單，如果唔想講嗰個人，佢可以講『佢哋一家除咗』，但佢一直講緊佢哋成家」。Beel 指譚只是假設包括鄺港傑在內，因為蔡稱「成家人」。譚回應「佢咁樣同我講，我咪咁樣認為」。
譚：蔡曾稱鄺港傑「OK」
「但始終都係姓鄺」
譚續指，蔡曾向他交代「人物關係圖」，「覺得佢哋呢家最恐怖係邊個啦，跟住都有講，我哋同 Damon 係 OK 有啲嘢，但佢始終都係姓鄺嘅，佢哋先係一家人，所以佢哋自己一家人、就係一家人，佢意思係有咩事佢哋會攬住大家」。
Beel 追問，即因為鄺港傑與他們是一家人，所以亦有問題？譚指，蔡亦有留意到鄺港傑的表現，「如果佢係幫理不幫親，大家都會見到，但 Abby 睇到就係咁嘅現象」﹐又指鄺港傑「有咩事佢都會企返佢屋企人，至少係佢 Daddy 媽咪嗰邊」。
Beel 多次要求譚舉例，譚指是管教子女方面，蔡與李瑞香有不少分歧，即使「Damon 可能明白到教育問題，佢可能覺得 Abby 啱，咁 Abby 動完氣之後，佢會為佢媽咪求情，佢會覺得媽咪都係咁諗啫」。
譚：蔡不滿鄺家帶子女見鄺球
Beel 指，2022 年 7 月衝突事件後，蔡天鳳不容許鄺球再上加多利山單位，亦不喜歡鄺球與她的子女接觸，例如蔡發現兩子女於 2022 年 10 月參加李瑞香的生日會、翌月出席鄺球生日會，蔡均感不高興。譚方駿一概同意，「佢（蔡）當時冇被通知，作為一個母親，『我同你講過唔可以見，但你帶咗去見』」。
Beel 再指，及至 2023 年 1 月農曆新年，譚陪蔡到法國巴黎參加時裝展。蔡於年初一欲與子女視像通話，但發現兩名子女不在李瑞香身邊，而是跟鄺球在一起。
譚指，蔡當時先後致電鄺港智、鄺港傑及李瑞香詢問子女蹤影，但他們「一個推一個」，「幾經辛苦打咗幾個電話，最後先知道自己對仔女喺邊度」。Beel 指，蔡回港後控制子女行蹤，確保他們不再見到鄺球？譚確認。
Beel 問，最令蔡不滿鄺家的是他們撫養子女的方式？譚同意，「因為小朋友係佢最最最 value 嘅人，同埋佢作為一個母親，佢係花好多心機喺小朋友身上，佢都幾嚴謹，因為唔只係知識，仲有品行，Abby 同佢哋好多爭拗，係關於佢哋三觀，即係世界觀、人生觀，呢啲觀念性、道德性嘅嘢執得好正」。
Beel 關注，蔡與鄺的兩名子女撫養權在蔡，為何不一起住？譚指，他與家人都曾提議，呢個想法係十分之正常，我同佢所有小朋友一齊住，一家六口一齊住」。不過，當時兩名幼子女長期與譚父、譚母一起住，蔡不同意長子女搬到譚家居住，「咁樣搬埋嚟住，咁人哋啲孫點呀⋯⋯即係人哋爺爺嫲嫲點呀？」
散庭前，Beel 向譚展示多張蔡與鄺港傑於 2020 年至 2022 年的合照，包括鄺出席蔡生日派對的相片，周四將繼續展示。
HCCC198/2025