身在現場 見證記錄

47人案求情.九西超區衞服|無罪李予信旁聽:喺度一齊面對 何啟明友:出面等你

47人案求情.九西超區衞服|無罪李予信旁聽:喺度一齊面對 何啟明友:出面等你

分享:

李予信進入法院旁聽(Tszhei Chan 攝)

李予信凌晨排隊旁聽:希望喺度,一齊面對

早上約 7 時,有約 50 人排隊輪候,現場突然下雨,排隊人士紛紛開傘及避雨。法院於 8 時後安排人群進入法院,至少 10 名警員在正門「一字排開」戒備。

早前獲判無罪的李予信,凌晨 1 時半抵達法院外排隊。他表示不適宜說太多,「好唔想有任何 specific 原因去俾人猜測,總之一句講晒,希望喺度,一齊面對」。

黃碧雲丈夫、李卓人妻子、前職工盟總幹事鄧燕娥、「劉公子」劉定成、社民連主席陳寶瑩、前民陣召集人陳皓桓亦到庭旁聽。邵家臻右手放在左胸前,微微鞠躬後進入法院。

« of 18 »

陳皓桓:無論出面定係裡面,大家都唯有頂埋落去

前民陣召集人陳皓桓表示,「(47 人案被告)基本上全部都係我啲朋友嚟,唔係朋友就係戰友,唔係戰友,都會成日約出嚟食吓飯、傾吓偈或者合作」,過往曾前來旁聽數次,「我覺得無論支持又好,或者甚至係同佢哋同行又好,都係一件重要嘅事」。

陳皓桓指,當中與前黨友岑子杰熟稔,看到有報道形容他「體型增大不小」,「我諗佢聽完會更加開心…人哋坐監越嚟越瘦㗎嘛、或者大隻㗎嘛,佢係越嚟越體積龐大,都係一件開心嘅事,好少有㗎嘛」。

陳皓桓再指,全部被告狀態不俗,「好少話邊個狀態好差」。他稱,很多人擔心毛孟靜狀態,「但其實我一直知道 Miss Mo 嘅狀態係好 OK 嘅,咁佢今日出庭反應又好、又好開心,見到我仲喺咁同我 say hello」。

他希望各人「頂埋落去」,「因為今時今日,無論係我哋出面嘅人又好,定係裡面嘅人又好,或者依家面對緊好多唔同官司嘅人都好,大家都唯有頂埋落去㗎啫,尤其是天氣咁熱,頂埋落去囉」。

何啟明教會朋友:何心態正面 沒意志消沉

清晨 5 時到場的李先生,表示是何啟明的教會朋友,兩人相識 20 年,見證對方投身政圈。李指,希望到場支持何啟明,指他多年來是一位很好的議員,「過去咁盡心盡力服侍街坊,咁佢值得去受到鼓勵」。他又形容何的心態正面,「面對不幸事件,都唔需要意志消沉」。

何啟明另一友人黃先生指,他們在神學院認識,認為何「係個非常之風趣幽默嘅人」,「任何一個場合都可以搞到氣氛,even 上堂、放 break 都可以」,於保釋期間都依然「嘻嘻哈哈」,希望何加油,「我哋喺出面等你」。

何啟明的神學院朋友黃先生。(Tszhei Chan 攝)

「姜糖」想見毛孟靜、岑敖暉
盼被告知「出面啲人冇忘記佢哋」

約早上 7 時到場排隊、社民連成員曾健成(阿牛)的義工 Simon 表示,「主要係嚟支持吓啲朋友,呢班朋友都識咗好耐」,認為各被告「喺民主上嘅努力同付出,令人印象難忘」,他們所做的事「係普通人做唔到」,惟對他們過往 3 年的待遇感到憂傷,指「未來嘅日子仲好艱辛,希望佢哋加油」,「最緊要健康」。

「姜糖」莫小姐約於 8 時來到庭外,早上太陽猛烈,她排隊時撥著印有姜濤的扇子。莫小姐曾旁聽 47 人案開審、裁決,至求情階段亦已旁聽 3 次,今次是她第四次旁聽求情。在九龍西初選被告一批,莫稱特別想見到毛孟靜、岑敖暉,形容兩人「正派」。

莫小姐稱,自己是支持而非鼓勵,「鼓勵唔到,純粹畀佢哋知道出面啲人冇忘記佢哋」。她又指,姜濤的歌曲《濤》有代表性,「(反修例)運動唔成功,都激起個浪濤呀嘛,起碼全世界都知道香港發生咩事」。

「姜糖」莫小姐(Tszhei Chan 攝)

鄧燕娥:知黃碧雲罪成後「一路都好唔安樂」

前職工盟總幹事鄧燕娥表示,黃碧雲還押已一個多月,至今都無法探望對方,故今早提早一小時出門,前來旁聽,認為黃還押後外貌不變,「唔覺佢瘦咗,都係好事嚟嘅」。

鄧指,自己與黃碧雲相識約 30 年,「喺 80 年代末認識碧雲,當時一齊搞婦女基督徒協會」,認為「佢個人好爽快」,心態「一路都係樂觀」,「因為佢對於呢個制度仲有啲信心,(判決前)都覺得可能會無罪」。

鄧表示,自己得知黃被判罪成後,「個心一路都好唔安樂」,希望黃「好好照顧自己,其他唔好諗咁多」。

陳寶瑩:呢班朋友根本唔應該喺呢個法庭到

社民連主席陳寶瑩指,與岑子杰相識約 10 年,認為岑「係個好就得人嘅人」、「真心待人」,相較大部份社民連成員處事都較「硬掘掘」、「好直不甩」,岑較有親和力,過往亦未聽過有與他合作的人,對其有負面評述。

陳續指,「呢班朋友根本唔應該喺呢個法庭到」,認為「曾經投過票嘅香港人都好難接受」各被告現時的處境,冀他們能夠「撐住」。

被告友:有機會再一齊食嘢

阿修表示,他代表一眾朋友見其中一位被告,但不欲透露對方身分。他指,兩人相識 7 年,「friend  搭 friend 識」,形容對方很會做菜,常常吃對方製作的美食,例如清酒煮花甲。他又指,常常與對方打麻雀,新年觀看《嚦咕嚦咕新年財》。

他形容友人很有原則、「有時好惡…佢會好執意去解決朋友嘅難題,佢好講件事公唔公平」,但私下亦十分搞笑。阿修說,這段時間甚少與友人聯絡,但從其他友人口中得知,對方個性比以前平靜,「佢有準備好面對要面對嘅嘢,(希望)有機會再一齊食嘢,一齊出去食嘢」。

不願出鏡的 T(化名)表示,岑敖暉是其朋友的好友,因此他與岑在不同活動上見過,昨日到收押所探訪其他朋友時,也剛巧碰到岑,「精神幾好,有打招呼」。T 又指,以往不時在社會運動場合見到岑子杰,盼本案早點判刑,「叫做有個望見家鄉、放返出嚟嘅時間,基本上困 3 年好唔合理」。

阿修(Tszhei Chan 攝)

HCCC69/2022、HCCC70/2022
焦點
最新文章
最新專題影片