蔡天鳳疑遭殺害碎屍案周三（14 日）進行第 16 日審訊，蔡的丈夫譚方駿繼續作供，他指在妻子失蹤當日，他傍晚下班後到加多利山單位尋妻但不果，當時鄺港傑、鄺港智與李瑞香都在單位，而李瑞香認為是綁架，曾稱「人哋可能想要錢啫」，譚又指，事後回想覺得李想拖延他報警。
庭上亦展示 2023 年 2 月 21 日，即蔡遇害當天，蔡與譚的訊息。譚確認，妻子最後一則給他的訊息是下午 2 時 06 分發出。兩人原定晚上一起吃飯。
Day15｜譚方駿：目睹鄺球粗言罵及衝向妻 妻為子女平等營造鄺家不錯假象
編按：報道涵蓋庭上描述的案件過程細節，或會引起不安。
第四年，我們仍在現場。
支持《法庭線》，讓我們走得更遠。
14:45 譚確認與妻、鄺港傑到澳門賭錢
與妻曾借 500 萬元
至於蔡天鳳的投資情況，辯方大狀 Trevor Beel 指譚方駿亦不太清楚？譚確認。
Beel 問，蔡天鳳是否為人較強硬、喜歡作主？譚回應，「我唔同意佢鍾意話事」，指因為蔡「處理好多嘢都好好，尤其是小朋友嗰方面，跟住投資嗰方面，佢比我認識更加多、更加多，我係一無所知，你問佢係咪鍾意話事、要處理，我覺得係佢能力可嘉，所以好多小朋友、投資方面都由佢處理」。Beel 形容，因為蔡有能力，所以由她處理投資及照顧小孩？譚確認。
Beel 再指，鄺港傑與蔡天鳳開設雞蛋仔店，因為蔡的長子長女喜歡吃雞蛋仔？譚否認，「絕對唔係因為小朋友鍾意食雞蛋仔，鍾意到開呢間舖」。Beel 另提到，雞蛋仔店以長子的名字命名，最終店舖只維持一年，因為疫情關係生意不佳。譚確認。
Beel 另提到，蔡曾着鄺港傑留意店舖，而鄺及後亦回到中國內地。譚指鄺當時「有話返大陸，佢話去幫手」，但不知道鄺是否做生意。
Beel 續指，鄺港傑在中國內地一段時間後，譚與蔡於 2021 年 8 月亦到澳門，3 人於澳門見面，逗留 3 周，隨後 3 人到廣州。Beel 再指，譚隨後逗留 2 至 3 周在廣州？譚回應「我有留喺度一陣」。
Beel 再指，3 人隨後於 2021 年 10 月 5 日由私家車從深圳灣口岸回港。譚指沒有印象，稱「如果我哋 3 個去完玩、坐車返嚟，係一件事正常到不得了嘅事」。
Beel 於庭上播放來自鄺港傑電話的片段，拍攝於 2021 年 8 月。首段片段顯示蔡天鳳躺在床上，另有男聲稱「你叫佢好快起身就好快起身」。Beel 庭上解釋，當時鄺港傑拿着電話拍攝蔡的片段，再與香港的子女視像通話。
庭上再播放另一片段，顯示有白衣男子準備扣上安全帶玩「笨豬跳」，片中傳來女聲「我驚你肥得濟條繩斷咗呀」。譚庭上指白衣男為鄺港傑，女聲為蔡。譚確認當時鄺港傑玩「笨豬跳」，譚亦在場，但他「唔夠膽」，所以沒有玩。
Beel 播放第三條片段，顯示在一間餐廳內拍攝蔡，有男聲指蔡「你都受唔住誘惑」。
Beel 問，當時鄺港傑形容蔡「忍不住去賭」？譚不同意，指當時鄺對蔡說，「忍唔住吖嘛」，而蔡亦有笑，鄺又稱「忍唔住去賭，唔關我哋事，係你吖嘛」。
Beel 解釋，並非指控他們有賭博問題及習慣，只是指 3 人曾到澳門賭錢，而當時譚或蔡亦有借 500 萬元賭博？譚確認。
Beel 續指，隨後於 2022 年 1 至 2 月，有負責追數的壞份子曾於海棠路的單位外出現？譚確認，而蔡亦知道此事。
Beel 再指，當時司機駕車時，蔡要躲在車內？譚指不清楚。Beel 再指，鄺港傑 2022 年 2 月向蔡安排提供 60 萬元處理澳門的債務問題？譚指不知道。
14:30 譚同意
鄺港傑與他及蔡曾經關係緊密
辯方大狀 Trevor Beel 續問及譚方駿與鄺港傑的關係。Beel 指明白譚現時對鄺的想法與過往有不同，但希望譚先放下現時的想法，而講述以前對鄺港傑的想法。
Beel 指，譚於 2016 至 2017 年認識鄺港傑？譚回答第一次見面並非 2016 至 2017 年，「我印象中係佢哋搬咗去維港‧星岸住，我先第一次見鄺港傑呢個人」，並確認他是透過蔡天鳳而認識鄺港傑。
Beel 另提到，鄺港傑於 2011 年至 2015 年曾居於美國？譚指蔡曾提及鄺曾在美國，而鄺港傑亦「有講佢喺美國啲事跡出嚟」。
Beel 再提到，鄺港傑曾在 University of California Irvine 讀書，修讀經濟學。譚指不知道。Beel 再問譚本人大學主修，譚指他修讀文學院的心理學等課程。
Beel 形容，鄺港傑、蔡及譚曾經關係緊密，在 2020 年後，3 人曾經常一同出門、一同用膳，而且 3 人亦有共同朋友？譚同意。Beel 再指，鄺港傑並非居於任何由蔡租用或持有的物業？譚確認。
Beel 再指，鄺港傑居於荃灣？譚回應，鄺港傑曾表示住在海之戀，「但我知佢唔係住喺嗰度」，指自己當時已有所懷疑，但沒有與鄺對質，沒有問「喂你係咪真係住喺呢度㗎」。
Beel 另提到，譚曾與鄺港傑、蔡 3 人一同到澳門賭博。譚確認。Beel形容，鄺港傑賭博時贏錢較輸錢多？譚指「我唔夠膽同意」，「佢輸幾多我可能睇唔到呢，佢贏幾多我可能睇唔到呢」，但見鄺亦有「贏下輸下咁」。
至於 3 人日常出門用膳的情況，Beel 指約七成費用由譚支付，三成由鄺港傑支付？譚回應，「佢（鄺）真係揞卡揞錢，可能有但我唔知，但你問返我眼光，可能係 85%（譚）同 15%（鄺）」。
Beel 問，譚於 2015 年從澳洲畢業回港後，一直到 2022 年均沒有工作？譚不同意，指他會在父親的舊公司工作，及後出售公司後，亦會協助父親處理租務、物業事宜，「開會處理啲瑣碎事」。譚同意當時於家族生意工作。
14:15 鄺港傑一方質疑譚方駿
記錯蔡遇害當天事情
譚方駿作供前，法官祁彥輝提到，很抱歉譚今早感到傷心，希望他現在準備好繼續作供。譚回應「相信可以」。
代表鄺港傑的大律師 Trevor Beel 繼續盤問譚，指出譚記錯 2023 年 2 月 21 日發生的事。Beel 指，譚於當天 6 點半到加多利山的單位時，當時可能只有女傭在家，沒有其他人。譚解釋，當時他下班回家後，先到梳化睡覺休息，但他已忘記其他人是在譚睡着前已在家，抑或睡醒時才到家。
譚補充，「點解個人唔見咗，我又好似瞓咗着咗咁」。譚解釋，當時他重約 183 磅、患嚴重脂肪肝，「我係好需要休息，工作咗 7 個鐘，所以我瞓咗，所以你話 6 點半我放工返嚟見到（鄺家），定係瞓醒之後見到，我唔記得。」
Beel 引述 2023 年 2 月 24 日、3 月 23 日譚向警方錄取的口供，當中提到他於 6 點半到達加多利山單位時，他先到梳化睡着，而鄺港智、鄺港傑、李瑞香及鄺港智的長子到達單位。譚重申無法記得當時情況，「嗰一刻我唔會好記得，當時我唔會知道呢單嘢，係佢哋一個人、定佢哋一齊做」。
Beel 再指，譚錄取口供時與事發距離較近，記憶比現在好？譚確認。Beel 再引述譚當時的供詞，當中提到譚見到鄺家回加多利山後，沒有在意他們，繼續睡覺，譚於 7 時 20 至 25 分離開單位。譚確認。Beel 再指，及後譚到警署報警，之後再返回加多利山單位，隨後李瑞香再質疑他報警。譚確認。
12:37 休庭午膳
12:00 譚：警通知懷疑鄺家
包括當時在旁的鄺港傑
控方播放 2023 年 2 月 22 日（蔡遇害翌日）下午 3 時 23 分，譚方駿與鄺港傑語音訊息：
譚：Damon（鄺港傑） 我想問你有冇佢準確落車個位置
鄺：可能要兜返去附近先記得，我都係順路
我淨係記得好多商場，大埔太多商場，周圍都係，佢想落車，唔係真係想去邊個商場，擺低咗佢就搞掂咗，冇特別記得，因為我唔熟嗰邊
譚：會唔會係大埔中心，會唔會有機會
使唔使接妹妹
因為你出車嘅話，你去接呢，可以同你去一去大埔睇吓，影一影個 video
譚庭上稱，對鄺港傑所言感懷疑，因即使不記得準確位置，也會記得哪條街道，「但佢帶緊我遊花園」。
翌日，譚與鄺港傑、失蹤人口調查組警員到大埔找蔡；鄺展示蔡下車位置，譚問女警是否「走得」後，便按原定日程接小朋友放學。
譚稱，鄺港傑駕駛到馬場時，譚收到警方來電，「Madam 喺電話同我講，我哋依家極度懷疑，佢哋一家人，鄺家一家人，包括坐我隔離嘅鄺港傑，佢問我有冇方法依家返嚟大埔，我哋頭先離開個位」。
譚指，他向鄺港傑稱「Madam 要你返現場協助」，而「Madam 都有同我講，你可以叫到佢返嚟就叫，同你快啲離開佢」。譚之後接手駕車接小朋友放學，並為鄺港傑召 Uber 返回大埔現場，鄺及後被捕。
代表鄺港傑一方的 Trevor Beel 開始盤問。
Beel 問譚，他收到鄺港傑的訊息後有否感不合理、懷疑？譚稱有，「同埋好似帶我兜緊圈」，又指在鄺港傑等人被捕後，他向警方表示曾對鄺港傑感懷疑。
譚續指，車駛到馬場、他收到電話之後，「我危機意識先湧上嚟，唔係身邊嘅人就冇事，原來有啲咁嘅事發生緊，即係佢哋係疑犯」。譚又指，「我開始諗返我同佢嘅對話，一直都係引我去另一個位，其實好似呃緊我、瞞緊我」。
官指，譚只需回答律師問題，毋須提及其他資訊。譚指，他是補充、憶述，警員告訴他鄺港傑有份後的情況。譚其後飲泣、深呼吸，官下令小休。
11:40 譚方駿：問蔡行蹤時鄺家表現平淡
「完全唔似擔心」
主控郭莎樂指，鄺港傑在蔡天鳳遇害當日接載蔡？譚方駿同意，指他當日下午有致電鄺港傑，印象中多於一次，「我有問過佢知唔知道 Abby（蔡）喺邊度」，鄺港傑稱不知道。
郭莎樂問，譚有否問鄺港傑，當時他們正前往接女兒，他們到了哪裡？譚稱當日有問，但不記得鄺港傑怎回答，但之後有指蔡在大埔中心附近下車。譚指，翌日跟鄺港傑回到有關位置，「佢話畀我聽，佢邊度落車」，語畢大力呼氣。
郭莎樂問，鄺港傑有否告訴他，蔡大埔中心下車後由誰接女兒？譚稱，印象中是鄺港傑着李瑞香接。
譚指，當日傍晚回到加多利山單位後，當他問到蔡的行蹤，「佢哋（鄺家眾人）表現係平淡，但內容基本上問佢哋 Abby 喺邊度，咁佢哋係表現平淡之餘，係表達唔知嘅⋯⋯完全唔似擔心」。譚指：「我當刻係覺得有啲驚訝，點解唔係好着緊嘅，我唔會估到係你哋一家做㗎嘛」。
譚續指，知道手機顯示最後位置後，晚上駕車到該位置找蔡不果，當晚亦有繼續赴飯局。譚指「嗰餐飯食得好快，返屋企諗住佢喺屋企」，惟回家後仍不見蔡。
譚稱，他之後打給蔡母張燕花，張稱不知道蔡在哪，「我同佢講話，真係成個人唔見咗，電話冇訊息、又冇消息，我哋係咪應該要報警」，兩人遂前往長沙灣警署報警。
郭莎樂問，當時張燕花都正在找蔡？譚指張感擔心，表示也正找蔡，「佢諗住微信啲語音遲啲先聽，但之後都冇回覆過」。譚稱，聽到張致電鄺港智，他不清楚電話另一端說甚麼，但張回答：「你仆街呀，你先仆街呀，我個女依家唔見咗，我報警好正常啫」。譚又指，張亦嘗試找鄺球、鄺港智問蔡在哪。
11:16 小休
10:52 譚方駿：事後回想
感覺李瑞香想拖延報警
主控郭莎樂問，譚方駿發送予蔡天鳳的「What’s wrong with your phone?」訊息是藍色雙剔，當時他有否看到藍色雙剔？譚稱：「依家要憶述我唔清楚」。控方又指，當天 4 時 13 分前的訊息都是藍色雙剔？譚稱「好難記」，只記得是雙剔。
譚重申，當日見到訊息由單剔變成雙剔，令他感不妥，「即係部機開返，訊息係發到畀佢嘅」。郭莎樂指，譚認為蔡的電話從 4 時 18 分起關機？譚同意。
郭莎樂問，蔡很少不回覆？譚同意，「我有係咁打電話畀佢嘅，但係冇人聽」，指妻子當日應該要接小朋友回到加多利山單位。譚 6 時下班，6 時半回到加多利山單位嘗試找蔡但不果，而鄺港智、鄺港傑、李瑞香則在單位，「我印象鄺球應該唔喺度」。
譚方駿指，當日好像在單位見到蔡與鄺的兒子，但不見他們的女兒；譚又指自己感疲倦，躺在客廳沙發上。他當時有就妻子行蹤不明跟鄺家對話，「李瑞香有同我講過，人哋可能想要錢啫，你咁快報咗警，人哋點會畀錢你呀？」
譚指，理解李瑞香當時轉移視線，但以李的意思而言，「佢話畀我聽，我意思係佢個人唔見咗，人哋又未聯絡你，你又去報咗警」。郭莎樂問「人哋」是甚麼意思？譚稱李瑞香認為是綁架，「佢哋」是「綁咗佢（蔡）啲人」。
郭莎樂問，譚為何覺得是轉移視線？譚指，「呢個係我今日睇嘅眼光，佢可能想搵啲嘢冚住，佢想搵啲嘢，自己甩身囉叫做」。
郭莎樂問「冚住」甚麼？譚稱「佢哋一家做過啲事」。郭莎樂問，譚有否告知鄺家會報警？譚指「絕對會有，因為佢（蔡）唔見咗」。郭莎樂指，但李瑞香覺得太快報警？譚稱：「你問返我，我感覺返，佢好似係拖住我咁」。
10:25 譚方駿：WhatsApp 訊息初時單剔
用手機程式發現妻在大埔 之後沒訊號
主控郭莎樂問，譚方駿當日為何緊張？譚指，WhatsApp 傳送訊息分成一個剔及雙剔，一個剔「就係 send 咗去 server，send 唔到出嚟啦」，記得當日他傳送「I thought something wrong with your iPhone」的訊息（見下）時，顯示一個剔，但後來變成雙剔，因此再傳送訊息。
郭莎樂問，當時只有一個剔，即蔡仍未閱讀訊息？譚稱：「我諗佢喺嗰個狀態，係完全未收到我嘅訊息」，又指電話沒電、關機的情況都會顯示一個剔。
譚指，當日下午 4 時多，他見到自己發出予妻子的訊息變成雙剔，「即係部電話至少開返過」。法官指，也可能是充電？譚同意。譚指，與蔡有使用「Life 360」程式，以各自分享位置，故見到蔡電話的最後位置。
郭莎樂問，當日譚見到蔡的電話關機，馬上打開「Life 360」程式？
譚稱，「我冇停止用過呢個程式嗰日」、「見到有啲唔尋常」，一看到訊息變成雙剔，馬上打開程式，查看蔡的位置。郭莎樂問，譚何時開始使用程式？譚指是 4 時多，其後看到 4 時 18 分蔡位於大埔，之後再沒訊號，非常擔心妻子。「我一路有用住（程式）嘅，去到夜晚直情根據呢個位置，去埋個地方去搵佢」。
10:00 庭上展示蔡遇害日與譚方駿訊息
譚方駿繼續作供，主控、資深大狀郭莎樂問及 2023 年 2 月 21 日、蔡天鳳遇害當日情況。
譚供稱，當日是他在中環九頭鳥米線工作的第二日，上班時間為早上 11 時，他於早上 10 時 15 分起床，當時蔡仍在睡覺。
譚指，出門口前跟蔡「面對面講嘢」，之後兩人下午 2 時以電話聯絡，因當晚有朋友約他食飯，他再問蔡「O唔 OK，跟住佢答 OK，我 book 餐廳」。譚指，2 時 40 分至 50 分預約餐廳後，告知蔡地點、時間，「佢係知道夜晚要食飯嘅」，但之後沒再回覆。
控方庭上播放兩人 WhatsApp 對話。譚確認，蔡最後一個訊息在當天下午 2 時 06 分發出。
2023.2.21 胖🐷老婆👸 14:02 蔡語音訊息：今日忙唔忙呀 bb 14:02 譚轉發友人語音訊息：譚公子譚公子轉身未呀 喂，想問吓你今晚有冇期呀，我哋去食辣蟹， 因為我今日 6 點半、7 點我有個細 function仔，8 點鐘左右同呀Kenny，你同太座得唔得閒去食辣蟹，喺尖沙咀 14:03 譚語音訊息：8 點約 Kenny⋯尖沙咀 感覺上冇尋日咁忙 14:06 蔡文字訊息：OK 蔡語音訊息：你又出咗去食煙煙豬呀？ 14:51 譚語音訊息：我依家係廁所 啱啱 book 咗興記 16:13 譚文字訊息：What’s wrong with your phone? 16:21 譚文字訊息：I thought something wrong with your iPhone 16:26 譚文字訊息：？ 16:39 譚文字訊息：你電話俾人執左 ？ 17:27 譚文字訊息：😩？ 18:10 譚文字訊息：？ 19:25 譚文字訊息：？ 2023.2.22 13:31 譚文字訊息：？ 2023.2.23 20:33 譚文字訊息：？ 2023.2.24 15:22 譚文字訊息：？
3 人被控謀殺、阻止合法埋葬
被告依次為鄺港傑（31 歲，司機）、鄺球（65 歲，退休人士）及鄺港智（28 歲，無業）。鄺港傑由大狀 Trevor Beel、劉奕勤、李宣儀代表；鄺球由大狀戴奧偉（Oliver Davies）及羅天祺代表；鄺港智由大狀安華暉（Andrew J. Raffell）、劉皚淇及鄧樂齊代表。
控方由外聘資深大狀郭莎樂（Charlotte Draycott）、高級助理刑事檢控專員梁育珩、高級檢控官林曉敏、吳希樂與檢控官尹培軒代表。案件由暫委法官祁彥輝（Brian Keith）審理。
3 人否認謀殺罪；鄺港傑、鄺港智承認阻止合法埋葬屍體罪，鄺球則不認罪。謀殺罪指，3 人在 2023 年 2 月 21 日，在大埔龍尾村 56B 地下謀殺蔡天鳳；阻止合法埋葬屍體指，3 人於 2 月 21 日至 23 日期間，在香港阻止蔡天鳳的屍體被合法埋葬。
HCCC198/2025