宏福苑大火聽證會周二（24 日）踏入第三日，各方完成開場陳詞，下午傳召 3 名居民講述逃生經過。他們均稱事發時聽不到警鐘聲，不少居民仍在單位內，憶述期間不住飲泣落淚。
其中一人居於宏昌閣低層，指當日聽見有人喊火燭後落樓查看，途經隔鄰單位時知道一位婆婆與外傭在內，但當時沒拍門，因「冇諗過咁大件事」，打算有需要再上樓通知；惟走出大堂回望時，已見天台如火爐焚燒、棚架如火球掉下。
她飲泣稱「當時我好自責，但我上唔返去。」另一名作供居民亦指逃生時未有通知鄰居，「我自己都好後悔，我冇拍過一個門⋯⋯你哋係咪可以做得好啲，搵返個真相出嚟呢？」
相關報道：
政府代表：ICU被指「打龍通」毫無客觀根據、嚴重偏離事實
居民梁浩軒：火災時警鐘沒響 靠親戚 WhatsApp 通知
首名作供居民為宏盛閣居民梁浩軒，有份申請成為涉事方。他與母親同住宏盛閣 303 室。他指事發當日自己在家休息，至下午 3 時 10 分，收到親戚 WhatsApp 訊息才得知宏福苑起火。梁憶述，他早已聽到雜物掉下來的聲音，但當時從單位看不到火源，僅以為有工人走動。至下午約 3 時半，他開電視發現沒有訊號，當時未聞到燒焦氣味，亦聽不到火警鐘。
他見隔籬的宏昌閣起火，尚未意識到要即時離開，但他透過大門上「貓眼」，見有兩人嘗試拉喉轆，但沒有水流出。梁打開客廳窗戶後，開始聞到煙味，立即離開單位。他指打開門離開時，「煙已經攻到我上半身」，他立即從逃生樓梯跑落大堂，當時約為 4 時許，「我跑到地下大堂好暗，已經冇燈」。他見地下火光熊熊，決定沿大堂跑出公園，當時見到棚網不斷墮落，並按警方指示前往安全地方。梁又提及，在大維修工程進行期間曾聞到煙味，與其他街坊討論，但沒作出投訴。
梁：曾盼完成裝修重見天日 籲珍惜眼前人
杜提問完畢後，梁指「我都想趁呢知機會⋯⋯講之後心路歷程」。他提到，自己於宏福苑長大，「在場居民都有問過，點解係我哋，明明好多時候我哋都有投訴過，有人去投訴食煙啦。大維修之前，有人關注 3 億維修，我本人因為呢件事處理法律文件⋯⋯我哋冇辦法喺業主大會投票，俗稱係『硬食』」。
梁又指，原本預計於今年 3 月完成裝修，可重見天日，「望返我哋生活嘅家園」，現時「大家要各散東西，之前見過嘅街坊，之後未必再有交集，我曾經有機會去改變呢個事實。呢件事發生咗，亦都冇辦法再改變，希望大家珍惜眼前人，唔好令自己有後悔嘅事」。
居民謝玉華：聽到巨響未意識起火
第二名證人謝玉華居於宏昌閣 204 室，其單位與懷疑起火光井平台較接近。謝供稱，她與丈夫居住上址十多年，在大維修期間工人吸煙是常態，當時曾擔心會否火燭，她沒有投訴，但知道很多街坊已投訴。她又指，搭棚前天井平台已有大量垃圾堆積，而進行𠝹窗邊工序後，亦製造很多垃圾，剩下的發泡膠垃圾仍留在窗邊。
謝憶述，其單位於 2024 年 9 月 30 日已被封窗，而封窗前幾日單位突然被粉塵飄入、「煙霧瀰漫」，曾就此致電管理處，對方著她離開單位。但她家中有兩隻年老的貓，未能離開。
起火當天，她下午正打算洗衣時，在廚房聽到如「山泥傾瀉」的聲音，因其乾衣機接駁至外牆，故不敢開乾衣機。隨後又聽到天井位置嘈吵，再聽到廚房傳來「嘭」一聲，當時未意識到火警，以為遇上粉塵，隨即關上廚房門。謝致電管理處，對方表示派人上樓視察。謝又拍片打算傳給承建商宏業，拍片後見煙向上，並不是粉塵，「覺得有啲唔尋常，都未意識到火燭」，她亦開始咳嗽。
謝：管理員喊火燭 捧貓籠下樓查看
謝之後打開大門欲通風，探頭一望「覺得矇矇地」，後來聽到微弱急促敲門聲：「火燭呀，快啲走」，見到管理員身影離開。謝形容，「當時我心諗，火燭？應該唔會啩，因為警鐘冇響，應該唔會火燭」。謝致電丈夫，對方着她下樓查看，她立即把兩隻貓放在籠內離開。
謝指，隔鄰住有一位媽媽與兩名小朋友，本打算着對方一同離開，但門外聽不到聲音，相信小朋友未放學。她遂捧著貓籠離開。謝憶起當時情況開始落淚，指見到 2 號單位仍開着門，便告知鄰居火燭，籲一同下樓，「我冇諗過咁大件事，純粹諗住睇吓咩事」。
謝：天台如火爐、棚架如火球掉下
她再經過 7 至 8 號單位，知悉一位婆婆與外傭仍在單位內，但因捧著籠無法拍門，當時想「應該唔會好大件事嘅啫，我落去睇吓，有咩事我可以再上來叫佢哋」。她遂下樓，在樓梯碰見一名婆婆，跟對方說：「好似火燭喎，不如你同我一齊落去睇吓咩事啦」。
兩人到達宏昌閣地下，見到火勢很大，「成個環境都係火，好多煙湧入嚟，個牆好熱」。謝帶住婆婆衝出大堂，「嗰刻我意識到，大件事，因為冇人知，因為成個過程得我同婆婆，成個走廊都冇人，出面個火原來咁大火」。
她本想把貓籠放下後，再跑上樓叫其他鄰居離開，但棚架「燒到火球咁」、不斷掉下，遂捧住貓籠與婆婆趕快離開，之後再回望「成個宏昌閣出晒煙，個天台好似火爐咁，我衝出去，我亦都冇辦法行返入去，嗰陣時我呆咗，我已經做唔到任何嘢，淨係知啲鄰居仲喺上面」。
謝：自責未能帶鄰居離開
謝補充，當時大廈沒有響警鐘，「成棟大廈冇人走，我已經意識到，個情況會係好差」。當她抵達公園時，另一位鄰居衝過來，說丈夫仍在單位睡覺，「當時我好自責，但我上唔返去叫佢哋，我知道佢地喺上面，我真係冇諗過係咁嚴重」。
謝留在公園「睇住場火燒，棚網不停燒」，目睹隨後有起火棚網被風吹至宏盛閣的棚網，「一點火開始著」，想起朋友的家翁、家婆居於宏盛閣，遂通知朋友，最後知道兩人安全離開。
謝哭著稱，「希望我今次出來，幫到我啲鄰居，因為我知我同層啲鄰居，除咗當日可以自己離開之外，一係消防員救咗，一係已經離開咗，希望宏福苑事件，真相可以出嚟。」
主席陸啟康向她說：「唔好太責怪自已，好多嘢都係一剎那，你出嚟作供已經好勇敢。」
居民高以蕾：一度以為燒焊未有離開
第 3 名居民高以蕾則居於宏昌閣 2405 室，父母居於宏志閣。高憶述事發當天她在家中工作，突然「聞到𤓓味」，打開窗不見有煙及火，以為只是燒焊氣味。惟不久後發現「𤓓味」越來越重，「諗緊又煲燶嘢」，打算下樓通知保安。當她一開門，便發現「成個走廊都係煙」，當時約下午 2 時 55 分。
高形容，走火通道已「白濛濛」，只得趕快乘升降機下樓。抵達大堂時，現場保安當時似乎未知情，管理處職員則跑來表示「大件事喇」。她在過程中亦沒有聽到警鐘聲。
高離開大堂後，再轉身望向大廈，見到「『一咋煙』向天⋯上面『一咋火』」，她拍下照片，當時為 2 時 57 分，並致電居於宏志閣的父母，着父母離開。
委員會代表大律師杜淦堃詢問，高曾否關注維修期間的大廈火警安全問題。高指，她本人未曾投訴，但維修期間曾被工人鑽穿牆，又因尚未舖上紙皮石，導致打風後外牆滲水而「起晒水泡」，曾要求宏業跟進問題。
高：後悔沒拍門通知鄰居
高又指，留意到打風後不少棚網損毀，部分被換成較淺綠色的新棚網。她亦不時見到有工人吸煙，知悉有不少居民投訴仍無效。
杜提問完畢後，高最後垂下頭，沉默片刻，緩慢地哽咽稱：「我聽到好多⋯⋯消防系統全部閂晒呢樣嘢。我想像唔到當時啲人幾無助，我覺得自己只係好彩，走到落嚟搭到𨋢，但我自己都好後悔，我冇拍過一個門⋯⋯我自己嗰座，好多我認得嘅人，我都見唔到喇，而我自己都做得唔好。你哋係咪可以做得好啲，搵返個真相出嚟呢？⋯⋯我希望大家都珍惜，因為唔係咁容易，一瞬間望住啲嘢發生⋯⋯」
主席陸啟康著高不要怪責自己，強調會方會以最公開、公平地找出真相。
梁庭外指盼講述事件還原真相
兩名作供居民於會場外回應傳媒提問。當中梁浩軒指願意作證，因為想有人「講當日實際上發生咩事」，怕若不作供之後沒有機會再講。
他又指，希望聽證會能找尋事件真相，提到若當時火警鐘有響或大維修時使用合規棚網，火災或不會蔓延至 7 座大廈，「呢件事已經發生咗，大家都冇辦法改變⋯⋯我唔知點解係揀咗我哋宏福苑，但至少希望我哋已經係最後一個，會因為咁樣而受到災害嘅一個屋苑或者一班人。」
另一名居民高以蕾亦指，「個個部門都話唔關自己事，聽唔到個真相出嚟，同埋你所有消防系統冇 work 嘅，咁你點走啫？太多人犧牲咗，唔單止我自己走嗰陣做得唔好，原來係好多人為都做得唔好。」