大埔宏福苑 7 幢受災大廈的居民，周六（23 日）繼續第二輪上樓。住在宏泰閣 40 多年的莊小姐形容，原址重建是幻想，又指「業權你唔賣都唔得㗎啦，我哋冇得選擇，唯有話自己唔好彩啦，咁多人做錯咗咁多嘢，唔肯好好地做好自己嘅本分，呢個又唔理想，嗰個又唔理想，咪搞成咁，都冇辦法。」
住在宏新閣的印傭 Sholikah 則與僱主一家上樓，指在宏福苑照顧婆婆 11 年，「唔捨得都有，唔捨得都一定要捨得」，又指婆婆會回憶在宏福苑感舒服、方便，兩人經常散步的畫面。
宏泰莊小姐：原址重建是幻想
宏仁閣、宏新閣和宏泰閣居民周六（23 日）第二輪最後一日上樓。住在宏泰閣 27 樓的莊小姐表示，居於宏福苑 40 多年，指其單位完好、沒熏黑，上一次上樓取回相簿等重要物品，今次取回其他物品。
莊小姐說，希望拍下窗外風景，「因為（以前）成日都望到，可以懷緬吓」，指難免不捨但沒辦法。她說：「喺牆上寫咗（單位） number 多謝佢，喺心裡面多謝佢，畀我哋喺度咁多年，畀一個家我哋，仔女喺度大，多謝個家。」
她指，最想開業主大會，又認為原址重建無望。「好多人希望原址重建啦，呢個係我哋嘅幻想嚟嘅，睇佢個樣都唔肯㗎啦，點都唔會肯㗎啦。我哋就諗話，如果可以起兩三座，有啲人想返嚟住咪喺度住囉，啲人想走咪走囉，但佢都冇呢個選擇畀我哋，咁我哋都冇辦法。」
莊小姐：業權你唔賣都唔得
莊小姐指，已收到政府的收購建議信，「睇都費時睇，諗住最 last 先諗，因為咁多嘢都處理唔到，嗰封信係掛號寄嚟，好似驚死你唔要咁囉。」
她說：「業權你唔賣都唔得㗎啦，我哋冇得選擇，唯有話自己唔好彩啦，咁多人做錯咗咁多嘢，唔肯好好地做好自己嘅本分，呢個又唔理想，嗰個又唔理想，咪搞成咁，都冇辦法⋯⋯人哋有啲成座得一間燒咗咋嘛，都冇得返去住，唯有嘆自己唔好彩。」
宏建秦小姐：最好安置方案為回遷
至於住在宏建閣的秦小姐，則改期至今日上樓，指單位完整，「冇可能兩次執得晒」，希望能第三次上樓。秦小姐指嫁入宏福苑、自己不是業主，「你問我，我鍾意呢個地方嘅，我覺得好好住嘅，所以想繼續留喺度。」
秦小姐指，重置方案不清楚，「本身我諗住喺度住一世㗎嘛，點知會咁樣嘅啫，你依家好似強逼我哋去賣咗佢咁樣，唉總之好多嘢諗，好多嘢煩。」她認為，最好的選項是回遷，「因為我唔使諗咁多嘢，如果可以返嚟，我緊係返嚟啦，但係依家，佢哋好似畀好多選擇我，但其實又好似冇選擇咁。
宏仁外傭與僱主上樓
住在宏仁閣 31 樓的印傭 Sholikah 與僱主一家上樓，她指照顧婆婆 11 年，「睇呢啲嘢（大火）好似好痛苦，因為喺呢度 11 年呢，好似唔捨得都有，唔捨得都一定要捨得，有嗰啲回憶嘛，婆婆都有啲回憶，都心痛，有啲講唔出口。」
Sholikah 說，第一次上樓已取回證件等重要物品，但因不記得物品擺放位置，未能完全找到，今次記起物品位置就可以取回。她指，以為上次上樓是最後一次，「上次 bye bye 屋企，下次冇機會嚟，結果又有機會，我多謝上天有第二次機會，可以 bye bye 多一次。」
她現時與婆婆居在元朗過渡性房屋江夏圍村，指「婆婆依家麻麻地」，會回憶在宏福苑感舒服、方便，兩人經常散步的畫面。
宏新居民回家綁絲帶：紀念宏福美好日子 之後要過得更好
住宏新閣 20 幾樓的 Ada，今天與弟弟和母親上樓，她的單位幾乎完全燒毀，窗口用橙色膠網圍起。她在膠網綁上絲帶紀念，「想紀念大家一齊喺宏福苑裡面生活過嘅一段美好日子，即係呢個已經係⋯⋯唔會再返轉頭，冇咗就冇咗喇呢樣嘢，即係嗰啲人情啊、街坊啊，你冇咗、冇晒㗎喇」。
她說今天上樓天氣很好，坐在家門前涼風習習，想起自己在宏福長大，「我哋鄰舍關係係好好，全部人都打開晒門」，即使夏天都有涼風對流，她坐在門口回憶這段記憶，「去到第二度，其實唔會再有呢一種嘅感覺、同埋呢一種嘅享受，咁就靜靜地坐喺度，吹咗一陣風，又望住自己間屋，希望將最好嘅一面記喺腦裏面」。
Ada 上次忙於執拾，她說這次可以靜下來，「嗰 3 個鐘真係快樂到，咁又過咗 3 個鐘，唔經唔覺咁，我暫時呢一刻我覺得都係圓滿嘅，真係可能自己都有咗心理準備，呢次可能、可能會係最後一次（回家）」。
她帶走了上次沒拿走的半套頌砵，希望整套頌砵「齊齊整整」，還有外婆留下的裙掛，上次因損毀太嚴重而沒帶走，這次也一併拿走，再研究能否復修。
她希望對宏福街坊說，「我哋既然係已經冇咗 40 年，咁我哋餘下落嚟嘅日子，其實就更加要過得好，我哋要過得比其他人都好，能夠擁有呢個經歷嘅人，其實係得我哋⋯⋯佢係一個烙印，但係、係讓我哋去睇清楚自己究竟喺邊度嚟，我哋嘅過去係點樣，我哋嘅動力其實就係，可能就係喺呢度嚟」。
起初 Ada 覺得發生了史無前例的大事，政府會協助居民，但半年過去，「到到呢一刻，我都真係唔覺得政府會再有啲乜嘢，真係出於善心，去幫宏福苑嘅人。總之就係呢個 moment 係，你一定、都係講賣樓、賣業權，你賣啦」，情況令她更感無助、失望、傷心，亦覺得政府沒有顧及居民感受。
她明白街坊或有不同想法，有人想回遷、有人想重建、也有人想離開，「其實我哋成班街坊係一群人嚟，我哋唔係一個個體，所以點解唔可以有好多種選擇呢？咁而家你淨係叫我哋賣，其實係得一個選擇」。
窗前貼流淚心心畫作 施小姐：真係好唔捨得 笑中有淚
連日來都有上樓居民在窗戶貼字句表達心情、意見，周六（23 日）就有居民貼上「多謝你 伴我成長」、「宏福苑 是我家」，亦有人在窗外繫上白絲帶。
其中宏仁閣高層住戶施小姐，得悉可以再次回家，就預備了數張手繪彩虹畫作，打算貼在家中的窗戶上，展示對宏福苑的愛，「我真係好唔捨得，好唔捨得 ！而家嘅心情就好似（畫作）其中一個心心咁，笑中有淚！好無助，好崩潰⋯⋯只有我哋宏福苑嘅人先至會明白。」
施小姐說，「我非常之愛我屋企！」，猶記得從前時不時可在屋內看到雙彩虹，夏天和冬天景色各有不同，但均是「靚到犯規！」她說再有機會上樓，很怕做得不足會後悔，所以這次都執了「廿幾大袋嘢」下樓，但仍然有些物品未能尋回。
臨走前，施小姐在家中的床睡了一會。她指，原想著安樂窩會陪伴住自己一世，指「無論去到天涯海角，喺出面幾唔開心都好，一見到呢個咁靚嘅風景，乜嘢情緒都冇晒！」沒想到如今，回家會有「限期」、要申請，她不希望是次是最後一次，「間屋係我嘅！幾多次都上。」
施小姐亦提到，自己單位完好，只是廚房情況較多熏黑及燒毀，希望可以保留業權，「可以維修住返」。
宏新胡生考慮接受收購業權
住在宏新閣 26 樓的黃先生指，單位「燒到七七八八」，希望盡量搬走物品，「都冇話可唔可惜，煮到埋嚟咪食囉」，亦未有時間考慮收購業權一事，「睇吓點先啦，問吓啲人先啦。」
同樣住在宏新閣高層、不上鏡的胡先生指，上次已取回重要物件，指廚房燒毀、單位熏黑，考慮到居住環境不太好，「都應該會接受（收購業權）」。
宏新高層麥生：帶不走玩具只好拍照留念
麥生是宏新高層住戶，其單位未受大火波及，屋內仍有大批藏品倖存，當中不少是「BE@RBRICK 庫柏力克熊」。4 月底第一輪上樓，他只及帶走重要物品，包括其中一隻愛貓的骨灰，當時仍剩下不少庫柏力克熊。
第二輪上樓，麥生說只能帶走大約七成左右的物品，「基本要攞落嚟嘅都攞咗，但就無影到了，主要影咗啲留喺度、執唔到嘅嘢」。
對照麥生提供的兩輪照片，這次他帶走了不少庫柏力克熊，但仍餘下一堆 Labubu、Keroro、高達、蒙面超人藏品。
麥生預計就算再有多一輪上樓，也未必回來。帶不走的藏品，只能拍照留念。
