蔡天鳳疑遭殺害碎屍案周一（12 日）進行第 14 日審訊，法官向陪審團指，抱歉浪費他們上周五時間，因當時有議題要處理，亦向蔡母張燕花致歉，並表示今天她可繼續作供。
代表鄺港智的大狀安華暉繼續盤問，指張不知道鄺是否營商成功，不知道他在內地有否賺錢？張稱：「根本係廢話！我上大陸都睇過，乜都冇做，啲錢係亂使」。張又指，不知道鄺被警方通緝，亦一再否認鄺曾經為她償還賭債。
Day13｜官指控辯提法律議題需時處理 陪審團下周一再聽審
編按：報道涵蓋庭上描述的案件過程細節，或會引起不安。
訂閱／贊助／購物，支持《法庭線》報道香港，記錄香港。
16:35 休庭 周二續審
16:20 控方傳調查警員作供
控方其後傳召偵緝警員、DPC15399 高恩祺。高確認，他是本案的主要調查人員，負責尋找及調查 CCTV，與蔡天鳳母親張燕花保持聯絡。
主控郭莎樂指，張今年 2 月曾告知高，其私家車被淋紅油及向高傳送有關相片。高指，「我相信佢發俾我嘅原因，係尋求警方協助」，故將消息告知上司，交予其他隊伍處理，列作刑事損壞案，但不知道有否人被捕。
高又指，張稱與另一名女士「有啲金錢上嘅糾紛，但係一啲若干年前嘅事情」。
高翻看他與張燕花今年 2 月 2 日的對話，張在語音訊息提到：「個女人呢，成日喺間打麻雀，叫竹館」、「高sir，以前大家好朋友，佢都經常喺我屋企食飯，以前嗰啲係麻雀數，麻雀數即係今日我打贏佢，咁佢差我嘅，聽日佢打贏我，大家可以麻雀數遲啲畀，但大家 7 年前已經畀咗，互不相欠⋯⋯收到恐嚇電話」。
另外，張燕花在作供首日解釋為何加多利山單位沒有登記在她名下時，稱因她持有黃埔花園的單位。高恩祺指，他在當天審訊後指示同袍就有關地址查冊。
16:10 官就張燕花證供
向陪審團作出說明
張燕花離開法庭後，法官祁彥輝向陪審團指，張的一些證供是她親身經歷，但有一些是她聽別人說的，例如指鄺球曾打蔡天鳳一事，也是張從蔡口中得知，她本人未有目睹。
官續以鄺球打蔡天鳳一事為例，指這是傳聞證供，張認為鄺球有打蔡，僅因為蔡這樣告知她，但這一點不能證明鄺球實際上曾打蔡，官向陪審團解釋，「你（證人）沒有基於自己的觀察，沒有基於親身經歷，而是基於別人告訴你的，這不算證據」。
官強調：「請記住這一點」，如果陪審員確信證人是根據親身經歷作供，那就可以考慮其證供；但如果陪審團認為證人可能只是聽來，那就應忽略有關部分。
另一方面，官指本案有不少蔡天鳳與張燕花於 2022 年 10 月至 2023 年 1 月的對話，蔡告訴張很多事情，例如指鄺球、李瑞香在她背後跟孩子們說她的壞話。
官指，對話只與蔡天鳳當時的心理狀態有關，「也就是說只與蔡當時心情、她認為發生的事情有關，這不能證明有關事情確實發生過」。蔡對於鄺球、李瑞香說壞話感生氣，「證明蔡認為兩人在背後說她壞話，但完全不能證明，兩人真的這麼做」。官再指，控方證據顯示，蔡對鄺球、李瑞香越來越生氣，以及生氣的原因，「但這不能證明他們（實際上有）對蔡做出被指控的事情」。
16:00 張燕花完成作供
認為鄺港智也是不願意賣樓
針對鄺港智與蔡天鳳的關係，主控郭莎樂指鄺球跟蔡天鳳分成兩邊，問張，鄺港智「站在哪一邊」？張燕花指，爭執前仍有每日聊天、吃飯，後來她提及「法庭見」，鄺港智才着鄺球簽委託書。
郭莎樂問，鄺港智是否願意賣樓？張指以她認知，鄺港智並不願意，「哇，咁樣嗌交，佢同我都嗌呀」。
就今早代表鄺港智的大狀安華暉向張指出，「玲姐」林美玲（音譯）是鄺港智的生意拍檔，兩人在廣州開設一間餐廳。郭莎樂追問張燕花與「玲姐」的關係，張指，「玲姐」是鄺港智的朋友，「玲姐話（餐廳屬）佢嘅，冇人講話係 Alex，我點知啫？」
郭莎樂問，鄺港智有否向張展示他廣州的生意？張稱沒有，「佢邊有嘢畀我睇啫，佢攞啲錢嚟亂使」。郭莎樂問，但她有否要求鄺港智展示生意？張稱「有，佢淨係話整緊整緊，整邊度又唔講」。
另外，郭莎樂關注廣州開餐廳的「玲姐」，與蔡天鳳失蹤當天往加多利山單位睇樓的「玲姐」是否同一人？張燕花稱不同。
控方完成覆問，張燕花完成作供。法官指感謝張作供，如她想留在法庭繼續聽審或離開也可以，由她決定。張未有留下來聽審，乘車離開。
15:40 控方指張燕花亦會用錢於自己身上
問及隨身首飾價值
主控郭莎樂再就着蔡天鳳的遺產提問。郭莎樂提到，曼克頓山的單位於去年以 3,800 萬元出售？張燕花確認，指款項用作償還女兒於花旗銀行的按揭，餘款與譚方駿商量投資用。郭莎樂再提到，蔡的兩個車位，分別以 240 萬元及 120 萬元出售？張確認。
張曾供稱丈夫蔡楚生每月給她過百萬元生活費，辯方於庭上質疑說法。郭莎樂指，張亦會花錢在自己身上，並逐一問及張身上飾物的價格，包括手袋、手錶、頸鏈，以及耳環等。張指其手袋「呢啲幾萬蚊咋嘛」，指價值約 5 萬元。至於上周她使用的 Birkin 手袋，張指價值約十多萬元，由她付錢，是鄺港智協助她購買。
至於她上周戴的手錶，張指由女兒贈送，「咁個女送嘢，真假（鑽石）都開心啦」。張續指，她戴的鑽石手鍊、頸鍊，耳環均是真鑽石，她又指，是很多年前購買，當時分別價值約 20 至 30 萬元等。
郭莎樂再指，張可花錢在自己及其他人身上？張指她「幾廿年都係幫人」。郭莎樂再問她手上的鑽石戒指及手錶等，張指戒指應有 4 卡鑽石，而手錶則是伯爵 Piaget 牌子。
14:38 控方覆問下
張燕花確認錄口供時有遺漏
主控郭莎樂進行覆問，關注張燕花何時得知蔡天鳳已過身？張指閱讀新聞時便知道。郭莎樂指，相信為 2023 年 2 月 24 日，當時警方有否告知她蔡的屍體情況？張回應，當時有看到新聞，警方亦有提到。張憶述，「當時嗰個一講佢冇咗啦，當時真係⋯⋯個腦都空晒」，形容「根本我當時我都形容唔到我自己，食唔落、瞓唔着」。
張提到，隨後她向警方錄口供，有提到與女兒的關係、女兒背景，亦有配合警方要求提供唾液樣本。郭莎樂追問，當時警方有否提到張要如何配合警方，回答警方的問題？張指沒有，並確認她的證供反映她自己的想法。
辯方盤問時曾質疑，張在錄口供時沒有提到鄺港傑曾稱「Abby 去飲酒」等。郭莎樂指，張錄口供時，她前一天才知道女兒遺體的情況？張提到當時「真係有啲嘢，漏一部分，但我同佢講電話，佢真係實質上咁同我講」。
郭莎樂再指，及後張應警方要求錄取 7 份口供，每次均有不同內容，例如在 CCTV 片段認人、提供電話訊息等。張指當時她盡力協助警方。
針對被潑紅油漆的車輛照片，郭莎樂指，由事發後至審訊期間，均有一名警員持續與張聯絡，問當時張是否把照片傳給同一警員。張確認，指事發於今年 2 月，當時她希望警方「還我清白」，而事件交由另一隊的警員負責，隨後警方已拘捕相關人士。
郭莎樂另提到，有警員於張開始作供後發訊息與張聯絡，詢問她關於黃埔花園的情況。張確認。
至於代表鄺港智的辯方大狀安華暉盤問時，曾指鄺港智亦願意說服其父親賣樓，協助蔡天鳳及張燕花。而郭莎樂則播出張與蔡的對話，張提到「兩個細路仔好似唔係佢嘅咁，大佬個個月都要開支，都要交學費㗎，唔使錢咩？」張庭上指，當時她在錄音是指鄺港智。
郭莎樂再播出張的錄音，提到「乜嘢都想留低，乜嘢都唔想賣」。張庭上補充，當時鄺港智「乜嘢都唔想賣，當時海南嗰啲唔想賣，車又唔想賣，加多利山又唔肯簽」。張及後澄清，她在訊息指的是鄺球，「呢度都係鬧鄺球，乜都唔想賣」。
郭莎樂另播出一段蔡天鳳的海南話錄音。張庭上稱，當時女兒表示「呢一班賊頭，已經使咗咁多年，使咗咁多錢，海南間屋、加多利山，攞唔返嚟，就要走法律程序」。
14:30 辯方：蔡與鄺球最大爭議是關於孫兒？
張燕花否認
代表鄺港智的辯方大狀安華暉續提到，鄺港智當時於中國內地有投資房地產？張燕花表示不知道。
安華暉再指，鄺港智曾透過貴族錶行給予張 600 萬元，隨後又提供 150 萬元，共 750 萬元？張指「冇呢件事」，形容「呢個錢唔係 Alex 畀我㗎，係我匯錢畀 Alex」。
安華暉續指，2023 年 2 月蔡天鳳與鄺球之間的最大爭議，是關於孫兒？張指不是，是由出售加多利山單位引起，又提到自出售海南物業開始，「姐姐（蔡天鳳）都講到唔睬佢，姐姐打電話佢都唔聽」。安華暉完成盤問。
12:56 午膳
12:35 張否認鄺港智匯款予家庭、蔡及張
指辯方案情「全部講大話」
辯方大狀安華暉問，張燕花知否蔡天鳳、鄺港智之間的投資安排？張指：「錢畀幾多，阿女都話畀我聽，但大家都簽到協議，如果賺錢畀一半個大孫，一半係攞嚟做生活費」。
安華暉問，鄺港智與鐘錶公司 Richard Mille 有聯繫？張稱不知道，「香港錶行我就知⋯⋯總之冇錢攞返嚟」。安華暉問，張知否蔡、鄺港智在貴族鐘錶買錶？張指知道，「我同警察講」。
安華暉指，蔡因張的賭債，不會跟張談及蔡的生意？張不同意。安華暉指，若蔡每次跟張說有一筆大資金，但又要用來還張的賭債，蔡還會跟她說自己的生意嗎？張指：「我話大家鬧交，錢都要攞返嚟，佢（鄺港智）都承認冇賺過，依家又問呢啲嘢」。安華暉指，因鄺港智幫助蔡？張否認。
安華暉提到，張曾到廣州視察鄺港智的生意情況？張反駁指「毛都冇，睇咩生意」？
安華暉續指，當時鄺擁有一間名為「騰」餐廳的股份？張指不知道，「佢冇話畀我聽」。安華暉再提到，當時一個名為「林美玲（音譯）」的人則是鄺港智的生意拍檔？張回應，「玲姐話（餐廳）係佢㗎」。
安華暉續指，張曾帶朋友到餐廳賭錢？張否認指「係食飯，玩吓一次半次啫，玩麻將」。安華暉追問會賭錢？張重複回應，「呢啲玩嚟食飯㗎，好細㗎。就係好細，玩吖嘛，打籌碼，食飯呀」。張強調，「都唔存在咩賭博」，稱當時疫情期間，只是去玩。
安華暉另提到，當時鄺港智在澳門擔任中間人，介紹賭客到賭場？張回應，「從來唔知呢啲嘢」。
安華暉續指，而張亦有轉介朋友予鄺港智，讓鄺再介紹到賭場？張指，「冇冇冇，我介紹朋友佢識」，指當時「廣州嗰度食飯就有呀，從來唔去澳門」。張又重申，「Alex（鄺港智）唔好再吹呀，冇賺過錢，冇攞過一蚊返嚟，唔好再吹啦，明唔明呀」。被告欄內的鄺港智側頭。
安華暉再問，張事實上不知道鄺港智有否匯錢到香港？張即反駁指「冇，從來都冇，我（孫兒）一歲養到 8 歲，佢哋食嘅嘢都係我帶去屋企，連李瑞香、鄺球全家電器都係我買畀佢哋」。
至於庭上稍早提及鄺港智透過兌換店給張的 37 萬元，張庭上指，當時以 37 萬元將車輛售予玲姐，而女兒到兌換店取錢，再通知張。安華暉追問，兌換店並無紀錄？張稱，「冇紀錄，但係阿女話畀我聽，呢度有語音話呢個車錢，Alex 畀咗佢喇」，而且當時 Alex 亦表示已把錢交予女兒。
安華暉另指，鄺港智定時會匯款給家庭、蔡及張？張回答「哇！咁嘅大話都可以講，係咪人嚟㗎，仲講呢啲大話」。
法官提醒張毋須攻擊律師，指律師只是說出當事人的案情。張則回應「佢全部講大話」。
12:12 張：不知鄺港智被通緝
辯方大狀安華暉問，就蔡天鳳失蹤當日，張燕花曾跟鄺港智對話？張指「去報警就打畀佢呀嘛」，當日應該致電他兩次。
安華暉指，鄺港智不滿張報警，是因為他因盜竊罪被通緝？張稱不知道，「冇講過通緝嘛，之前講搞掂咗嘛」。
安華暉指，雖然已還款予事主，但警方仍通緝他？張稱「你唔好迫我，我真係唔知」。安華暉問，為何張不着鄺港智返回內地？張稱「我點解要問佢返唔返大陸，關我咩事啫，我點解要問」。
官指，明白張被問及有關問題感生氣。張稱「佢重複問」。官指，如果辯方問太多遍，官會叫停。
安華暉問及蔡天鳳讀港大金融課程，有否證書或文憑？張稱：「佢喺佐敦嗰度補習，個老師都知道，佢係讀金融同嗰啲外國啲學校，港大入面讀嗰啲課程」。
安華暉再問，有否證書或文憑？張稱「嗰個老師有見證囉」。另外，安華暉問張知否本案有甚麼證人？張指「譚爸爸、媽媽同阿駿（蔡丈夫譚方駿）」，但不知道他們作供內容。安華暉指，張早前提到一名司機都會作供，問她如何得知？張稱：「聽到佢哋講吓嘅啫，阿駿講話呢啲需要（作供），咪嚟囉」。
12:00 張燕花：依家係阿女俾人害咗
同我打麻雀有咩關係呢？
張燕花曾在與女兒的對話向蔡稱：「媽欠你的，這輩子都讓不完，只要是你想要吃，你想要買的，媽都買給你，明唔明」、「這種吃的是小事，只要你想吃，我這輩子都還不完」。
辯方大狀安華暉問，張在對話所指的是賭債？張否認，「阿女買咩我都買，我哋母女唔計」。
張燕花另在對話向蔡天鳳稱：「有時打麻雀，天亮才來會睡，媽不能及時回來，媽永遠感恩我的女」。
安華暉問，張有打麻雀賭博？張稱：「我唔認同，打麻雀唔係賭博係娛樂囉」。安華暉兩次追問涉及金錢？張指「娛樂吓囉就係」、「依家係阿女俾人害咗，同我打麻雀有咩關係呢？」
法官指，張未有回答辯方問題，她所打的麻雀，是輸家要給贏家錢，還是不涉金錢？張稱「好細嘅啫」。
安華暉問有多細？張指每次「10 萬、8 萬上落囉」。安華暉指，張每周打兩次麻雀，都會輸 16 萬元？張指「打麻雀有輸有贏㗎嘛，點可以日日輸㗎？」
安華暉指，張輸很大銀碼，令蔡天鳳擔心？張稱沒有，「佢細細個，我都有時打吓麻雀㗎嘛，唔係依家先打」，又指會在雀館打麻雀，「淨係呢啲有牌、冇犯法，畀人娛樂㗎嘛」。
安華暉指張在對話承認打麻雀一整晚、輸很多？張否認，「我話打麻雀有時攰，你做乜嘢話畀媽咪聽，阿女好多時食嘅嘢，都係我安排㗎嘛」。
安華暉指，蔡為張還賭債？張指：「咩都要講證據，阿女又冇過過一萬蚊落我戶口」。安華暉指，蔡直接還給債主，又指鄺港智都為張還賭債。張一概否認，「鄺家呢個禽獸冇可能，佢幫我還債？佢都唔知要還幾錢畀我呀，呢十幾年咁樣使呀」。
11:45 辯方指張燕花有欠債、車遭淋紅油
張否認 又指警曾調查
辯方大狀安華暉指，蔡天鳳不將加多利山單位登記在張燕花名下，是因為張有賭債，蔡不願使自己的單位冒險？法官指，這裡是幾個問題。安華暉再問，蔡天鳳不時要為張還賭債？張否認。
安華暉指，蔡將曼克頓山單位二按，是替張還賭債？張否認。安華暉再指，鄺港智都有替張還賭債？張稱：「哇！你 15 歲嚟到我屋企，拍拖、生仔、結婚、離婚，我當你仔咁，你自己摸摸吓你個良心呀，畜生，你幫我還賭債？你咁都可以講呀畜生！」
安華暉指，所以張的答案是沒有？張稱「冇呢啲事呀，抹黑呀」。
官問，所以張有否賭博或賭債？張燕花稱「我有時打吓麻雀咋嘛，又唔係成日打」。
安華暉指，張的一輛私家車曾被人潑紅漆追數？張稱是被冤枉、抹黑，「都冇講出差邊個，警方查，嗰個人都被拉咗，佢都講唔出咩事」。安華暉指，蔡將曼克頓山單位二按，是為張還賭債？張稱：「我唔同意，畜生（指鄺港智）乜都屈得我」。
安華暉問，鄺港智在囚怎樣「屈她」？張指：「咁佢依家問呢個問題，咪就係囉，呢個車查都係冤枉㗎啦，有警方佐證㗎」，又指「人哋要整死我，我點知啫？警方查，冇人講話我差佢錢」。
安華暉指，那警方未能查出，可能是在澳門或內地？張反問：「你做一個律師點可以講可能可能，你做乜都講證據」，重申「咁我解釋咗我係俾人搞㗎嘛，咁查出嚟，真係我冇差人邊個錢呀嘛」。
11:18 小休
10:55 辯方：張因憎恨鄺球，將鄺港智「扯落水」？
張燕花不同意
就鄺球簽委託書一事，蔡天鳳在 2022 年 11 月 3 日在對話向張燕花稱：「這個臭頭子，我叫 Alex 明天 5 點帶他爸去，這個臭頭子，明天會玩嘢」。而張燕花兩日後跟蔡稱：「我相信佢會簽，我相信佢會簽」、「他那樣說，我相信佢會簽的」。
辯方大狀安華暉指，張依賴鄺港智遊說鄺球賣樓？張回答：「佢老豆冇權話事，Alex 同意就可以去⋯⋯佢老豆係廢嘅，冇權話事」。安華暉指，他是問鄺港智做了甚麼，不是問張的想法。張回應：「講真，如果佢真係咁有誠意，我哋今日就唔會喺呢個法庭見」。
安華暉指，張剪裁證供配合控方說法。張稱「你千祈唔好冤枉 ，咩叫剪裁，我配合警方調查、咩叫剪裁」，重申鄺家由頭到尾不願賣樓，「你都未睇得清楚呀？」
安華暉指，張根本不清楚蔡天鳳與鄺港智就賣樓發生甚麼事？張指「佢溝通我係唔知，但我睇到嘅溝通，架車同海南層樓佢都唔肯㗎」，何況是幾千萬。
安華暉指，蔡天鳳與鄺球起爭執是 2023 年初。張燕花否認，指起源是蔡「收返啲嘢」。安華暉指，蔡感非常生氣，在 2023 年的農曆新年未能聯絡子女？張稱「係呀，玩嘢吖嘛，呢一家真係冇良心㗎」。
安華暉續指，張因憎恨鄺球，將鄺港智「扯落水」？張不同意，「鄺球係咩權利都冇，借佢個名，Alex 叫佢點做就點做，到鄺球話事咩？」張又指，鄺家後期「教啲孫唔使聽媽咪講嘢，媽咪神經病」。
安華暉指，令蔡天鳳生氣的是鄺球帶女友見孫兒？張稱不知道﹐指之前大家關係好時，「爺爺前爺爺後，好好㗎，阿女成日都畀錢爺爺（鄺球）」。
安華暉問，蔡不想子女跟鄺球聯絡？張指「咁嬲尾要賣樓，要打要殺，就係想斬斷吖嘛」。
安華暉再指，令到蔡與鄺球關係變差的事情，是鄺球帶女友見孫兒？張稱「我唔認同囉」，又指「根本嗌交都嗌幾個月」。安華暉問，蔡看重子女多於金錢？張稱「阿女係最愛錫（子女），太愛錫細路仔先去到咁」。
10:42 辯方：鄺港智同意賣樓？
張燕花：我鬧佢先肯
辯方大狀安華暉指，鄺港智曾予 37 萬元張燕花。張庭上解釋是賣車的錢，「海南嗰層樓又係 300 幾萬，又係落咗鄺球戶口，全部攞出嚟畀姐姐（蔡天鳳）」。
安華暉問，賣車錢怎樣處理？張指：「兌換店落到嚟，跟住攞現金畀姐姐，呢啲冇得假」。安華暉問，為何張會稱予 10 萬元譚方駿？張稱：「呢啲錢都係阿駿攞出嚟，呢啲錢佢兩公婆，我話同姐姐買嘢，咪扣 27 萬囉⋯⋯依筆錢係我指定入戶口，畀姐姐，呢啲嘢阿駿都知㗎」。
辯方指，張燕花亦曾在對話向蔡天鳳稱：「呢個東西他要是有誠意做，他今晚就會聯絡他爸，旺角那裡都有律師的」、「呢個係阿哥已跟他講，明午已約買家，他說 okok 他自己會聯絡他爸」。
張庭上解釋：「我同 Alex（鄺港智）溝通，我同 Alex 講要有誠意，你帶老豆做個委託書去旺角，好容易咋嘛」、「呢幾句，鄺球咩權利都冇，佢只係掛個名啫」。
安華暉指，鄺港智在 2022 年 10 月 24 日曾帶鄺球上律師樓，但因法律意見而未有簽委託書？張稱：「咁最尾都係落實咗呀」。安華暉指，可見鄺港智願意賣樓？張指「我鬧佢先肯」。
安華暉指，但鄺港智聽張意思？張指，女兒曾叫鄺港智賣樓但他不肯，「我話我對你（鄺港智）咁多年，你憑良心做嘢，如果咁樣，就反面㗎啦」。
安華暉續指，鄺港智曾向蔡提議，讓子女居住屯門黃金海岸、滿名山。張先稱「買邊度都唔到佢話事㗎」，後指不知道此事，「佢講我真係聽唔到呢啲，佢有咁好死？」
10:30 張曾經向蔡提及欠鄺港智 15 萬元
庭上解釋是代購物品的費用
辯方大狀安華暉指，張燕花供稱蔡天鳳聰明、懂做生意？張同意。
安華暉指，但張亦供稱，蔡天鳳將 7,000 萬「投入黑洞」（意指給予鄺港智）？張稱「7000 幾（萬），佢全家都知道，全部一蚊都冇攞返嚟過」。
安華暉質疑，若蔡天鳳懂做生意，「這盤生意不是太好」？安華暉又指以上說法，只是張的猜測？張否認，指幾乎每日跟鄺港智聊電話，「佢咩新鮮蘿蔔皮，啲錢全部都係阿女畀佢」。
就張燕花在與女兒的對話稱：「佢爸良心喪盡」，張庭上解釋她是指鄺球，其後又指是鄺球、鄺港智、鄺港傑、李瑞香，「就係佢哋幾個，阿駿都知」。
張又在與女兒的對話稱：「媽今時今日欠他 15 萬元，但他在媽身上付出也大，這個媽也看見」。張庭上解釋：「我呢段話我鬧佢，阿女付出咁多，我幫佢睇細路仔 7、8 年，多謝都冇講聲」。
安華暉問，但為何張會稱欠鄺港智錢？張指，「我爭佢 15 萬，佢同我買嘢，呢 15 萬佢都收，我買咁多嘢畀佢，我都未計過，呢十幾年我都未計過」、「就係話佢冇良心」。安華暉指，但張稱「他在媽身上付出也大，這個媽也看見」？張指：「冇可能，呢啲真係唔會，佢喺我身上真係一蚊都冇付出」。
10:20 辯方：不知鄺港智是否營商成功？
張燕花：我上大陸都睇過，乜都冇做，啲錢係亂使
辯方大狀安華暉展示，張燕花與女兒蔡天鳳在 2022 年 10 月至 2023 年 1 月的對話。張稱：「昨晚 Alex 上呢個數 37 萬 370 元，知道不？」
張庭上回答：「呢個係 2022 年賣車呀嘛？」安華暉指不是，是鄺港智給錢張還賭債。張搖頭否認。安華暉問，這筆錢關於甚麼？張指是「匯錢返大陸」，「應該係海南賣屋啲錢」。
安華暉重複，是鄺港智予錢給她還賭債？張聞言稱：「冇冇冇冇冇，冇可能，佢有錢畀我？」、「從來佢都冇可能幫我還錢，佢買嘅嘢都係我出錢」。安華暉再問，那麼這筆錢關於甚麼？張指，是在內地賣車、海南物業的錢。
安華暉質疑，但沒有提及車及物業？張指「賣嗰架車係 70 幾萬呀嘛，係千真萬確㗎嘛」。安華暉指，不清楚賣車的錢，但可見這筆錢是鄺港智予張？張稱：「冇可能！佢去邊度畀錢畀我？一直用姐姐（蔡）嘅錢，咁嘅大話都講得出？」
安華暉指，張燕花不知道鄺港智是否營商成功，指張再次剪裁證供，以符合控方說法？張稱：「冇剪裁過，千祈唔好咁冤枉我」。
官指，張還未回答她知否鄺港智是否「營商成功」。安華暉遂向張指出，張不知道鄺港智在內地有否賺錢？張稱：「根本係廢話！我上大陸都睇過，乜都冇做，啲錢係亂使」。
10:00 開庭 張燕花繼續作供
暫委法官祁彥輝向陪審團指，抱歉浪費他們上周五時間，因當時有議題要處理。法官亦向證人席的張燕花致歉，指她上周五到庭但毋須她作供。官表示今日可以繼續。
代表鄺港智的大狀安華暉（Andrew J. Raffell）繼續盤問張。
安華暉問，鄺港智有否對蔡天鳳使用暴力？張燕花指「平時之前就冇」。安華暉問，鄺港智有否對蔡威脅使用暴力？張指 2022 年後有，聽到蔡與鄺港智聊電話，鄺「唔畀賣樓」，兩人經常爭執。
安華暉問，鄺港智不反對賣加多利山單位？張指，他最初反對，「嬲尾唔輪到佢話事㗎喇⋯⋯就係大家反面、走法律程序、法庭見，就改變（立場）啦」。
安華暉指，蔡天鳳遊說鄺港智，說服鄺球簽委託書？張指「我講咗無數次，開頭全家（鄺家）個個都唔同意（賣樓）」。安華暉指，鄺港智在 2022 年 10 月 24 日帶父親鄺球簽委託書？張指，「我都話後尾我同 Alex（鄺港智）講電話『法庭見』，後尾佢就帶佢爸爸去簽」。
安華暉指，鄺球最終在 2022 年 11 月 7 日簽署委託書？張稱不清楚實際日子，只記得是 10 月至 11 月之間。官指，文件顯示鄺球在 11 月 7 日簽署，張稱「係」。
3 人被控謀殺、阻止合法埋葬
被告依次為鄺港傑（31 歲，司機）、鄺球（65 歲，退休人士）及鄺港智（28 歲，無業）。鄺港傑由大狀 Trevor Beel、劉奕勤、李宣儀代表；鄺球由大狀戴奧偉（Oliver Davies）及羅天祺代表；鄺港智由大狀安華暉（Andrew J. Raffell）、劉皚淇及鄧樂齊代表。
控方由外聘資深大狀郭莎樂（Charlotte Draycott）、高級助理刑事檢控專員梁育珩、高級檢控官林曉敏、吳希樂與檢控官尹培軒代表。案件由暫委法官祁彥輝（Brian Keith）審理。
3 人否認謀殺罪；鄺港傑、鄺港智承認阻止合法埋葬屍體罪，鄺球則不認罪。謀殺罪指，3 人在 2023 年 2 月 21 日，在大埔龍尾村 56B 地下謀殺蔡天鳳；阻止合法埋葬屍體指，3 人於 2 月 21 日至 23 日期間，在香港阻止蔡天鳳的屍體被合法埋葬。
HCCC198/2025