蔡天鳳疑遭殺害碎屍案，周一（9 日）踏入第 33 日審訊。辯方案情開始，首被告鄺港傑在辯方主問下開始作供，指在美國留學，原打算繼續在美國生活，但 2015 年母親指鄺港智牽涉盜竊案，他需要回港照顧屋企。他又指，胞弟離港後去了海南島。
Day32｜辯方指蔡或被推向車門手柄致頭傷 法醫：較符合外力撞擊
11:16 小休
11:00 鄺港傑：蔡愛面子着勿告訴他人住居屋
辯方大狀 Trevor Beel 續問及，當鄺港傑於 2015 年從美國回港後，他與蔡天鳳的關係。
鄺指當時胞弟不在港，「我係一個哥哥，我唔想小朋友好似冇咗父愛咁樣，我會花我生活大部分時間，如果我冇約朋友，睇吓佢哋（子女）生活點，返學、放學。久而久之，我每日都會見到 Abby，咁一年一年⋯⋯建立咗屋企人感情」。鄺又提到，當時他是義務照顧家庭，「咁佢（蔡）都好 appreciate 我嘅 ，然後感情就好似親兄妹咁」。
Beel 再問，蔡天鳳與譚方駿交往前，鄺港傑是否認識譚？鄺指「唔知有呢個人」，但鄺及後「多咗時間照顧屋企」，而譚間中亦在場，「時間累積、慢慢好似朋友咁，當然冇 Abby 咁親啦」。鄺指，當時自 2018 年起，與蔡及譚亦經常一同社交。3 人經過相處，「認識緊密咗」，而蔡亦會介紹她與譚的共同朋友予鄺認識，「然後我哋會有個共同朋友圈，如果我同 Abby、Chris 生活，一個禮拜 5 日都會出去食晚飯啦」。
Beel 續問，當時鄺港傑有否告知譚，他住在居屋單位？鄺表示沒有，指是蔡的提議，稱「我本人其實唔喺好介意呢啲住嘅地方，公屋又好、居屋又好，你依家可能冇咁有錢，但之後可能佢有錢、成功㗎嘛。但 Abby 比較愛面子啲，想身邊比較近嘅屋企人，睇落富裕啲，唔好影響佢形象。佢話有人問你住邊，佢話住荃灣 ok 嘅。但唔好話你住居屋喇，話住私樓啦。佢知當時有新屋苑叫海之戀，佢就提議以後如果有人問你，你話住海之戀啦。」
10:40 鄺港傑：母自行搬到海逸豪園照顧兩孫
辯方大狀 Trevor Beel 再問及蔡天鳳與鄺港智兩名子女的居住情況。
鄺港傑表示，當時從黃埔花園搬到海逸豪園，租約過後便搬到維港．星岸，及後維港．星岸亦完成兩年租約。他提到，以其所知，當兩子女住在維港．星岸，當時已購入加多利山物業，但仍在裝修，及後維港．星岸租約完結，他們便搬至加多利山，一直居住至 2023 年。
鄺港傑提到，蔡與胞弟的兩名子女住在海逸豪園時，另有一名印傭與蔡母張燕花聘請的「鄉下嬸嬸」同住。而鄺港傑則與母親李瑞香同住於將軍澳。
鄺港傑指，母親當時得知兩孫住在海逸豪園時，身邊沒有家人，她便自行搬至海逸豪園協助照顧兩名孫兒，「佢開始咗湊小朋友之後就長期喺嗰度住」。
及後兩名子女搬至維港．星岸時，鄺港傑指當時由鄺的父母、一名外傭及一名由張燕花聘請的「嬸嬸」，與兩子女同住，但他不知道當時由誰支付租金。
Beel 再問，由 2015 至 2019 年間，當時由誰供養 兩子女？鄺指「以我所知係 Abby 同 Alex 一齊」，及至 2023 年。鄺港傑提到，當時胞弟及蔡除了在國內賺錢，亦有在香港炒賣名錶，賺取收入。
至於及後一家遷往加多利山，鄺港傑指當時由鄺的父母、兩名外傭及兩名子女同住。而胞弟則於 2022 年中回港，亦住在加多利山。但鄺港傑本人則居於將軍澳，及至 2020 年，鄺指該將軍澳公屋單位成功抽到荃灣的居屋單位，便遷往居屋。而當時單位於父親鄺球名下，由父親申請按揭，但由鄺港傑支付按揭供款。
10:30 鄺港傑：知蔡與譚一起時感驚訝
辯方大狀 Trevor Beel 再問，當鄺港智離港後，由誰照顧兩名子女 W 及 X？鄺港傑指主要由母親李瑞香照顧。
Beel 再問及蔡天鳳當時的收入來源。鄺港傑提到，當時胞弟於大陸發展、尋找機遇，胞弟社交能力佳，在國內認識較富裕的朋友，對方會邀請胞弟參與項目投資，「Alex 本身個 base 嘅錢，係同 Abby 一齊賺嘅，佢同 Abby都會合資，投喺大陸嘅項目」。
鄺港傑補充，當時胞弟與蔡會投資在大陸的中小型發展商、地產商的項目，「 之後有錢分，啲錢經找換店去咗 Abby 度」，他亦有協助到找換店取錢再交予蔡，「呢個係佢其中一個收入」。
Beel 再問及鄺何時得知蔡天鳳與譚方駿的關係。鄺港傑回應，當胞弟前往大陸後，他亦有協助照顧胞弟的子女，不久後蔡便「介紹咗個朋友叫阿 Chris（譚） 」，而譚亦是蔡及胞弟的舊同學，「都識咗好多年，啲小朋友都稱呼 Chris 做契爺」，「我以為 Chris 係 Abby 朋友，因為 Chris 係 Alex 朋友」。
鄺港傑憶述，不久後發現蔡「肚腩越嚟越大」，曾問她「係咪肥咗」，鄺指蔡「佢初頭冇答嘅，過咗一個禮拜左右啦，佢話佢有咗小朋友，我仲以為係細佬嘅添」，當天他才得知蔡懷有譚的子女。
鄺港傑指，他不知道蔡何時與胞弟分手，所以當他得知情況時感驚訝。而父母比他早幾個月得知胞弟與蔡分手一事。
10:20 鄺港傑：胞弟離港後到了海南島
辯方大狀 Trevor Beel 問及鄺港智與蔡天鳳的關係，指兩人於 2013 年結婚，問鄺港傑當時有否參加婚禮？鄺港傑表示有，指當時他原本身在美國，「我唔知 Abby 本身有咗同生咗 BB，直到一日，我媽媽突然 send 咗張 BB 相畀我，問我得唔得意」，並告知他，「你細佬同 Abby 已經生咗個仔，出咗世喇，佢都通知我嚟緊兩個月後，有個婚禮嘅」，鄺遂向學校請假，回港參加婚禮。
鄺港傑續在 Beel 主問下指，鄺港智與蔡約於 14 歲時開始交往，不久後胞弟便搬到蔡的家中，兩人在蔡父母的黃埔花園單位同居，亦另外租用一單位，但他不知道由誰支付租金。
Beel 續問及鄺港傑 2015 年回港前，對蔡天鳳的了解程度。
鄺港傑回答指，當時知蔡與胞弟拍拖，但他在美國就學時，每年回港一至兩次，每次約兩周，所以每年與蔡見面數次，雙方並不熟悉，「淨係知屋企多咗個細佬老婆」。Beel 再問，鄺是否知道胞弟離港後的去向。鄺回應指，當時胞弟前往海南島，又指胞弟曾與蔡及蔡母張燕花同住，而蔡家以海南話交談，所以胞弟久而久之亦懂海南話。
10:08 鄺港傑出庭作供
代表鄺港傑的大狀 Trevor Beel 表示，鄺港傑將開始作供。鄺港傑在懲教人員陪同下步出被告欄，走到證人台，以廣東話作出非宗教宣誓，法官書記予他一杯水。
Beel 問，鄺港傑有兩個英文名，一個是 Anthony，另一個是 Damon，哪個才是他實際使用？鄺港傑指是 Damon。鄺在提問下表示今年 35 歲、在香港出生，與胞弟鄺港智年齡相差 3 年多。他就讀聖若瑟英文中學，其後前往美國讀大學。
鄺港傑指，學費基礎來自爸爸的退休金，母親「經營一個幾好生意嘅時裝店」，因此之後的學費由母親支付。鄺港傑指，讀大學時有做兼職，例如在中餐館送外賣，2015 年 9 月返回香港，而鄺港智則於同年 6 月左右離港。
他指，原本計劃在美國繼續生活或工作，2015 年 2 至 3 月左右，「我媽媽突然打畀我，屋企發生咗事，佢冇講咩事，話好嚴重嘅，你快啲返嚟香港先」。他續指，鄺港傑回港後，母親指「你細佬牽涉一單盜竊案要處理」，當時鄺港智的小孩剛出生一兩年，「仲係好細個，如果細佬唔喺香港，或者走咗嘅話，就冇人 take care 呢個屋企，所以需要我去幫手睇住屋企，因為爸爸媽媽都老喇」。
3 人被控謀殺、阻止合法埋葬
被告依次為鄺港傑（31 歲，司機）、鄺球（65 歲，退休人士）及鄺港智（28 歲，無業）。鄺港傑由大狀 Trevor Beel、劉奕勤、李宣儀代表；鄺球由大狀戴偉奧（Oliver Davies）及羅天祺代表；鄺港智由大狀安華暉（Andrew J. Raffell）、劉皚淇及鄧樂齊代表。
控方由外聘資深大狀郭莎樂（Charlotte Draycott）、高級助理刑事檢控專員梁育珩、高級檢控官林曉敏、吳希樂與檢控官尹培軒代表。案件由暫委法官祁彥輝（Brian Keith）審理。
3 人承認阻止合法埋葬屍體罪，否認謀殺罪。阻止合法埋葬屍體指，3 人於 2 月 21 日至 23 日期間，在香港阻止蔡天鳳的屍體被合法埋葬；謀殺罪指，3 人在 2023 年 2 月 21 日，在大埔龍尾村 56B 地下謀殺蔡天鳳。
HCCC198/2025