2012 年造成 39 人死亡的南丫海難，死因研訊周四（22 日）踏入第二日裁決。死因裁判官周慧珠指，儘管缺少水密門加快南丫四號下沉，但這並非設計出錯，亦沒違反當年任何規例，又指家屬方期望海事處年檢時核對圖則，屬不切實際。（見另稿）
家屬在聽審期間拍枱、集體離場，庭外受訪指對裁決極度失望和不滿。梁淑玲指，追究 13 年換來「不切實際」四字，有愧於離世家人；徐志盛形容，官說法如「手術成功但病人死了」，「法例上面你冇錯，但係死咗 39 個」；趙炳全則指，裁決帶來「十萬個問號」。
政府晚上發稿指，尊重死因庭裁決，會仔細研究和認真跟進判詞，同時向死者家屬致以最深切慰問。發言人又指，局方一直督促海事處努力跟進調查委員會及專家提出的建議，全面落實提升船上安全規範、圖則審批和驗船水平、業界運作安全等五大類措施。
相關報道：
南丫海難死因裁決 官：家屬方要求海事處年檢時核對圖則「不切實際」 遺屬集體離庭
家屬審訊期間集體離場
死因裁判官周慧珠周三裁定水密門非漏裝，周四（22 日）就餘下 5 項議題作出裁決，包括：與南丫四號相撞的「海泰號」船頭有否加裝鋼片、南丫四號艙口圍板高度是否低於標準、海事處是每年抑或隔年檢查南丫四號艙門、涉事海員有否超時工作等。
官裁決指，南丫四號建造時，即使尾半格艙壁不設水密門，亦符合「一艙進水不沉」的標準，又指家屬要求海事處隔年驗船時核對圖則、修正結構屬「不切實際」。
家屬席一度傳來拍枱聲，其後集體離場，有家屬在庭外喊：「侮辱智慧！」，與家人在庭外相擁而哭，之後沒再返回庭內。
家屬：對裁決極度失望和不滿
裁決後，遇難者家屬趙炳全、徐志盛、梁淑玲庭外受訪時，先感謝傳媒多年來跟進、報道，再指對是次裁決，感到極度失望和不滿。梁淑玲指，在庭內聽到死因裁判官分析海事處檢驗一事時，「家屬係嬲到拍枱走人」。
她解釋，法庭結論是海事處每年都要檢驗很多船隻，毋須帶備圖則，「每一次檢驗，用肉眼去睇有冇大改動，例如有冇燒焊，有冇大嘅焊接、冇咗隻門呢啲簡單檢驗，就已經合格⋯驗船係 base on 個（海事處）list 去 tick，咁就已經完結㗎喇。」
梁淑玲：追究 13 年換來「不切實際」四字
她指，官形容家屬方要求海事處兩年檢時「攞齊架撐、攞齊圖則」，是「不切實際」，「對於呢四個字，我只可以講，銘記於心，我唔明點解我哋作為一個乘客，去坐一隻船，大家都有揸車㗎，揸車都要年檢啦，年檢唔係要檢查吓安唔安全咩？點解係不切實際呢？」
她續指，「如果海事處係唔夠人力去做呢件事嘅話，唔該同我哋講，唔該同返你上司講，去理解吓、去審核吓你哋做緊嘅嘢，係咪真係維護緊市民安全，我哋嘅 13 年，係想問究竟邊一個人，應該對呢件事負上責任，到頭嚟換咗呢四隻字『不切實際』，所以係好嬲嘅一件事情。」
就官指，南丫四號符合「一艙進水不沉」標準，亦沒有違反當年的規例，徐志盛形容，這說法「類似『手術成功但病人死咗』，法例上面你冇錯，係成功咗，但係死咗 39 個」。他指，判決不僅向家屬交代，「你咁樣判決係咪可以釋除公眾疑慮呢？」
趙炳全：對裁決「十萬個問號」
就家屬最關注的沒裝水密門議題，官指是船廠有意識的決定、非疏忽，梁淑玲引述專家證人指，如果船隻有裝水密門，或可減慢下沉時間，「呢個係鐵一般嘅事實」。
她質疑，官沒採納專家證人供詞，認為財利船廠「做啱咗隻船」，「嗰隻門係可有可無，係達到基本運作，我覺得係 ridiculous（荒謬），係匪夷所思，冇解答過我哋疑問」，又指「我聽完晒呢兩日（裁決），我都係唔好理解，究竟我應該問邊個嘅責任？冇理解過，冇人答到我」。
當日在船上的趙炳全憶述，當日船隻很快沉沒，「我都感覺到好唔尋常，我僥倖執返條命、死過返生⋯我作為南丫四號一個乘客，好慶幸我仍然生存，今日我好想問，如果咁都可以話係不切實際，我想問，39 條人命就係換嚟呢四隻字呢？」
趙說，對裁決極度不滿和失望，「其實心中問緊，安全何價？係咪就係要咁樣判決呢？」他又指有「十萬個問號」，「冇咗水密門，令到隻船咁快沉，呢個問號已經好大，點解可以以你作為一個法官，判嘅係咩嘢呢﹐可以咁大聲講話，判出嚟（水密門與海難）係冇關係呢？呢個問號我哋家屬係解唔開」。
徐志盛：汲取教訓係我哋屋企人
至於官最後表示，罹難者的家屬及摯愛因而承受的沉重損失，任何裁決或建議，均無法抹去，惟希望是次死因研訊的裁斷，可以為各方提供一定程度的理解，並確保已汲取應有的教訓。
徐志盛指，「唔好再講嗰啲『大家要向前看』，廢話嚟㗎」﹐又反問「汲取教訓係我哋 39 個屋企人喎，好似同其他人無關喎，受教訓嗰個係我哋喎，有咩好教訓呀？睇唔到喎，依家我哋仲俾人指住，我哋係多餘喎、不設實際喎」。
梁淑玲指，官指海事處驗船工作繁重，有太多船要檢驗，「你哋家屬唔可以要佢哋不停諗咁多嘢去驗你隻船，係不切實際，我想問，我要體恤所有海事處人員，邊個體恤家屬呀？我哋 13 年前冇咗摯愛，你覺得我哋冇咗就係冇咗呀？呢個烙印係一世⋯我期望係可以喺佢哋面前，講畀佢聽，我行咗 13 年喇，我終於今日可以停落嚟喇，但原來我講唔到⋯所以我好嬲」。
她指，是次研訊絕對不是完結，「我哋係過五關斬六將，呢個已經差唔多係終極中嘅終極啦嘛，跟住點知原來你話我聽，你睇唔到個真相喎，我都唔知可以做啲乜嘢。但係我相信，家屬係唔會放棄，我追咗 13 年，你畀一個咁嘅答案我，我覺得我有愧於我死去嘅家屬。」
不具名家屬：難以跟去世女兒交代
在海難中痛失女兒、其中一位入稟要求召開死因研訊的遺屬表示，「點解要有死因庭啫，係希望對呢個水密門，（找出）係邊個負責啫，開完之後，除咗冇人負責之外，仲要係話佢哋船廠係做得啱嘅，符合法例，水密門唔重要㗎」。
他說，是次結果也難以跟女兒交代，「唔通我同佢講，你死得啱呀，鬼叫你坐隻船咩？隻船合法㗎、啱法例㗎，不過你唔好彩上咗架船咋嘛，咁講呀？」
至於後續行動，梁淑玲指「要同律師團隊諗一諗」，又指「其實我唔希望香港再有慘劇發生，但如果真係有慘劇發生，係唔好拖延，盡快去搵個真相，香港先可以 move on，先可以進步。」
政府：一直督促海事處跟進建議
政府晚上發稿指，尊重死因庭裁決，會仔細研究和認真跟進判詞，同時向死者家屬致以最深切慰問。發言人指，局方一直督促海事處努力跟進調查委員會及專家提出的建議，全面落實五大類措施，避免類似事故發生，例如規定所有載客船隻的水密門須裝設警報器；就本地船隻增設專責圖則審批小組、引入標準化驗船及圖則審批程式；推出成人和兒童兩用救生衣；加強海事處職員的專業培訓等。
發言人指，海事處將認真研究跟進死因裁判官建議，又指已實施本地安全管理系統，以主動風險管理的方針，加強與業界就海上安全相關事宜上的溝通；積極籌備在目前驗船制度下，要求船東在驗船前，確定船舶沒有作未獲允許的改裝；政府會檢視本地船隻海員的工作環境及情況，並會充分諮詢相關持分者意見。
港燈：已據調查委員會建議落實多項措施
港燈公司表示，尊重死因庭裁決，事故對公司極為沉痛，再一次向已離世的同事和其他罹難者的家屬致以最深切慰問。發言人又指，事故後已根據調查委員會建議，檢討及落實多項措施，會仔細審視死因庭的建議及判詞內容，並評估任何可以進一步提升安全及管理水平的空間，在可行情況下予以落實。
CCDI-1075-1113/2012(MC)