蔡天鳳疑遭殺害碎屍案周二（6 日）進行第十日審訊，蔡母張燕花供稱鄺球曾說若夠膽賣樓「我殺咗你全家」，而女兒另有海南物業、名車亦登記在鄺球名下。她又指，案發當晚女兒下落不明，她致電司機鄺港傑，他先後稱蔡「醉酒」、「有嘢做」等，不答蔡在哪處落車。她最後與蔡丈夫報警。
張昨供稱，女兒與鄺家「關係好好，有求必應」、「畀好多好多錢呢家人」，購入加多利山單位讓兩名子女居住，為避稅將物業登記在鄺球名下，鄺球曾表示若日後要賣樓「肯定畀，時時都配合」，但賣樓時鄺球「唔肯交層樓出嚟」、「要打要殺」。
Day9｜蔡母：女原與鄺家關係好 鄺球同意借名買樓 賣時卻「要打要殺」
編按：報道涵蓋庭上描述的案件過程細節，或會引起不安。
訂閱／贊助／購物，支持《法庭線》報道香港，記錄香港。
16:28 休庭 周三續審
16:05 辯方質疑如僅為避稅
何不將單位登記在蔡丈夫、蔡母名下
辯方大狀 Trevor Beel 續提到，兩名長孫 2016 年曾與鄺球及李瑞香住在海逸豪園。蔡母張燕花指，該單位主要由李瑞香居住，而鄺球則間中居住。Beel 另指，隨後兩名孫兒、李瑞香、鄺球及外傭搬到維港星岸。張確認，指鄺球較少住在單位。
Beel 續指，及後購入加多利山單位，供兩孫兒居住，而鄺球亦偶爾在該單位。張確認，指當時大家均知道安排，「個個都知買畀細路仔住」。至於鄺港智的情況，Beel 指他於 2022 年 6 至 7 月亦從內地回港，住在加多利山單位，而鄺球亦非經常在單位內。張確認，指「姐姐（蔡天鳳）淨係畀佢嚟睇細路仔，唔係住」。
Beel 再問，張與女兒關係密切？張回應「梗係啦，日日傾電話」。
Beel 指當時購買加多利山的單位，並非以蔡的名義登記，因為蔡不想支付 900 多萬元的印花稅。張同意。Beel 追問，那為何不把單位登記在張的名下？張指當時她亦持有黃埔花園的物業。
Beel 指出，但黃埔花園的單位是登記在其丈夫蔡楚生的名下？張燕花否認，指該單位屬聯名持有。Beel 追問，那為何不把單位登記在譚方駿名下？張指「呢啲當投資咋嘛，大家都商量好」。
Beel 指出，當時以鄺球名義登記單位，是因為鄺家亦有出錢購買。張隨即否認，稱「一切講證據㗎」。Beel關注，既然單位用作投資，為何不使用譚方駿的名義？張回應「即係大家商量就話⋯⋯因為其他嘢都係畀佢，好似海南投資都係畀鄺球」。
Beel 問，所以當時只打算短時間持有，待樓價好便會賣出單位。張確認。Beel 再指蔡欲在 2022 年中疫情期間賣樓，但當時樓市低迷？張指，不是賣樓的好時間，但「嗌交啦嘛，就選擇賣啦嘛」。Beel 再問，當時鄺球不欲賣樓，因為當時樓市低迷？張回應「有咩利益，講明時時可以攞返㗎嘛，唔輪到佢話事」。
15:52 鄺港傑一方開始盤問蔡母
代表蔡天鳳前大伯鄺港傑的大律師 Trevor Beel，開始盤問蔡母張燕花。
Beel 指，鄺港傑曾於美國讀書？張指不太知道，只知道他有讀書，但不知在哪個國家。Beel 再指鄺 2011 至 2015 年曾在海外讀書，他又指，鄺與蔡及譚方駿 3 人是好朋友，3 人一同社交；張確認。Beel 再指，鄺港傑曾與譚一同慶祝蔡的生日。張同意。
Beel 又問及張，她與家人的居住安排。Beel 指，張燕花一家曾住在黄埔花園一單位，及至 2008 年鄺港智入住，隨後他與蔡結婚，兩人搬到黃埔花園的另一單位。張確認，指當時兩名長孫（蔡與鄺的子女）與兩名工人亦住在該單位。
Beel 指，2015 年鄺港智及蔡分手，鄺長居內地，蔡與譚方駿交往。蔡及後搬入譚父母的家同住。張確認。Beel 提到，張則由黃埔花園單位遷到譚父送予蔡的曼克頓山單位。張亦確認。
15:14 小休
15:10 有陪審員提出小休
控方就證人張燕花完成主問，有陪審員提出小休，要求看畢蔡天鳳、張燕花的 WeChat 對話，才聽取辯方盤問。官批准。
14:28 蔡母：鄺港智叫唔好報警
當時問是否鄺球父子「攞走」女兒
蔡母張燕花供稱，女兒失蹤當晚，她有致電鄺港智母親李瑞香，但沒致電鄺球。張庭上搖頭道：「（鄺家）冇一個關心㗎」。張又指，不滿意鄺港傑的回答，因為女兒不喝酒、很有交帶，「已經 7、8 個鐘頭失蹤，唔見咗、聯絡唔到」。
張指：「主要係講唔到（蔡）邊度落車⋯⋯一陣間（講）半路（下車），一陣講大埔商場，咁佢喺學校落車先啱㗎」。
張當晚與蔡天鳳丈夫譚方駿抵達警署後，致電鄺港智，表示會就蔡失蹤一事報警，而鄺港智回應：「仆街啦，你報警都唔話畀我知」。張聞言指：「你仆街啦，我個女唔見咗呀，我報警關你咩事？」
此時，公眾席傳來笑聲，主控郭莎樂隨即望向公眾席，指證人失去女兒，警告旁聽人士不得發出笑聲。
張燕花續供述，她當時問鄺港智：「係咪你老竇攞佢去邊度呀？」、「係咪你同你老竇攞走？」而鄺港智回答「點解你咁講呀」、「等佢（蔡）返嚟，唔好咁快報警」。控方問張，為何覺得是兩人捉走蔡？張指，「個女從來冇得罪過人，就係呢排同佢嗌交⋯⋯鄺球，要打要殺，就係佢囉」﹐又指鄺港智不讓她報警「好恐怖」。
控方播放 2023 年 2 月 11 日龍尾村的 CCTV，鏡頭位置在案發單位的對面，片段顯示蔡所購買、車牌為 AA3383 的七人車停泊在村內，其後 3 名男子進入案發單位。張指「3 個我都認得」，指出是鄺球、鄺港智及鄺港傑，而其中行在最後、露出白色衫尾的男子為鄺港智。
14:00 蔡母：案發晚多次問鄺港傑
對方不答蔡哪處落車
午休前，控方播放蔡天鳳遇害當天下午，蔡帶人到加多利山單位睇樓的片段。片段播放約數十秒後，蔡母張燕花突然嚎哭，法庭提早午休。
午休後，暫委法官祈彥輝指很遺憾令張感到不安，會盡力避免同樣情況再發生。主控郭莎樂繼續主問，問張當天持續與女兒聯絡？張燕花指，當天與女兒一直聯絡至下午 2 時左右，而女兒表示要去接孫女。
張燕花憶述，及至晚上蔡的丈夫譚方駿來電，查詢蔡的行蹤，問「媽咪，姐姐（蔡）係咪同你一齊？」張回應沒有，而當時張亦有致電女兒，但均未能接通。張及後又於晚上 10 至 11 時致電鄺港傑。張指，譚方駿亦不知女兒的行蹤，最後她與譚大約 11 時一起到警署報警。
張又提到，她致電鄺港傑，當時問鄺「點解？姐姐去咗邊，姐姐唔係接細路仔咩？」而鄺表示不知道。張供稱，「佢（鄺港傑）話 Abby 好嬲，跟住（Abby）落咗車」。
張及後再致電鄺港傑，鄺稱「佢（蔡）去飲酒啦，約咗朋友」。張亦有追問，「究竟喺邊度落車，究竟係學校落車定大埔落車」。張指，當時鄺回答，「唔使驚啦，你放心啦，佢飲醉酒，聽日會返嚟㗎啦」。當時張聞言即責罵鄺，稱女兒並不會喝酒，亦不懂飲酒。
張亦有問及是否有人接孫女放學，鄺港傑則指已安排鄺母李瑞香接孫女。張又補充，當她第一次致電鄺港傑時，對方表示「Abby 同人哋打電話嗌交，好嬲落咗車」。當張關注，女兒應要接孫女放學，鄺則稱「Abby 突然間唔得閒，有嘢做」。
張形容當時已感不妥，「一陣間就話大埔落車，一陣間就半路落車」，而且當時鄺港傑的語氣生氣，又斥張「唔好打嚟啦，飲醉酒會返嚟㗎啦，聽日會返嚟㗎啦，都成年人」。張當晚持續致電予鄺港傑，「打到十二點幾」，不斷追問女兒下車的地點，但鄺沒有回答，稱「我要瞓覺啦，唔好再打嚟」。
12:38 午膳
12:25 庭上播案發日蔡帶人睇樓片段
蔡母嚎哭稱不欲看下去
控方提及 2023 年農曆新年，蔡天鳳到法國參加時裝展，但感不開心，因當時鄺家不讓她跟子女談話。當蔡回港後，蔡拒絕鄺球見孫兒。張確認，又指鄺球簽署委託書後、約 2022 年 12 月，已不讓他見孫兒。
張稱，後來有朋友對單位感興趣，有意購買。控方播放 2023 年 2 月 21 日、蔡被殺當日下午 1 時 12 分，加多利山單位的 CCTV，顯示有人上門睇樓，蔡為對方介紹，「呢度總共有 6 層」。
片段播放約數十秒後，張燕花突然嚎哭，稱：「我唔想睇呀，我好後悔。個女真係好好，好孝順好乖㗎真係。佢信錯人、善良畀錯人，呢家人真係恩將仇報。」控方指，不會再播放有關影片。鄺球聞哭聲側身望向張、面無表情；鄺港傑則神情冷靜，手指托着下巴；鄺港智則望向張後低頭。
11:44 蔡母：女兒憂鄺家反口 將單位減價放售
控方繼續問及蔡天鳳、張燕花的對話內容。
2022 年 11 月 12 日，張向蔡傳送語音訊息，當中一把女童聲說：「嫲嫲教我話媽咪發神經，佢好衰㗎」。張向女童說：「係咪一定要錫媽咪，係咪話你媽咪衰」、「你個衰嫲嫲」、「阿 ne（海南話「我」的意思）點教你」，女童回答：「要相親相愛，唔好嗌交」。
張解釋，女童是蔡、鄺 7 歲的女兒，孫女逢周五都會到其住所過夜，蔡晚上會打來聊天。「妹妹聽到話係媽咪把聲，妹妹同 Abby 講，嫲嫲爺爺鬧你神經病」，又指兩人要求孫女「唔好聽媽咪話」。
就賣樓一事，2022 年 11 月 1 日，蔡發訊指：「4 點，佢爸上去簽名，4 點簽不簽名就知道了，已經寫好那封信」。張庭上指，鄺球答應上律師樓，簽署加多利山單位的委託書。
蔡於 11 月 3 日發訊指：「我叫他們明天 5 點去、叫 Alex 明天 5 點帶佢爸去，相信會玩嘢，呢個垃圾球」。蔡兩日後再發訊指：「看星期一佢有沒有帶佢阿爸去簽名囉」。張指，鄺球在 11 月 1 日未有簽署委託書，但強調他最終有簽。
蔡又引述律師指，「佢叫我快賣，他爸病，要是他爸是精神病患者，（鄺妻）有承繼權」。控方問，蔡引述律師指，如鄺球有甚麼事，鄺妻李瑞香有權繼承單位，委託書亦可以隨時註銷？張同意。
蔡在訊息稱：「講真要趕緊賣出，呢 3 個月佢隨時隨地可以註銷」，張回應「花幾百萬轉名」。蔡又稱：「阿媽幫我打聽一下，我已放 5、6 間地產。等一個月，睇有冇人要呢間房子，冇人要，花幾百萬，少幾百萬好過房子俾人騙了」。
張指，蔡當時將單位減價，「賣得出就賣，如果賣唔出就使幾百萬（印花稅轉名），好過俾人呃」。
11:20 小休
10:57 庭上播蔡天鳳錄音
指鄺家「咁嘅生活都不知道多謝我」
控方再播放蔡天鳳、張燕花的語音訊息，夾雜海南話、廣東話，其中一段蔡天鳳提及：「阿駿阿爸阿媽同兩個孫，都瞓同一層，真係個賊老頭」。張燕花在庭上解釋，蔡口中的「賊老頭」是指鄺球。
蔡天鳳在錄音另稱：「要錢請工人服侍，有事冇事搵司機，賊老頭，我養佢仔，我養佢同佢媽⋯⋯佢真係過嚟打我」。張燕花庭上解釋，蔡所講的「仔」是指鄺港傑、鄺港智；而蔡稱「呢個賊老頭，我養他那個仔」，張指「那個仔」是指鄺港智。
張燕花又指，鄺球打蔡天鳳時，自己不在場，是女兒告訴她這件事。
張燕花 2022 年 10 月 21 日向蔡天鳳傳送一段錄音。張指她當時向女兒稱：「鄺球攞咗呢啲嘢，呢層樓時間長咗，佢更加唔肯改（指不願交樓）」。
而就蔡稱：「我同你講肯定免不了合法操作，拿回來都一點良心，如果唔肯拿回來，唔係人係鬼」。張指，女兒是形容鄺球不願賣加多利山單位。
張燕花 2022 年 10 月 30 日向蔡稱：「媽咪返大陸嗰次坐呢架」、「女呀，需要媽叫人把他開回來嗎，需要就講」。張庭上解釋，她所指的車輛是勞斯萊斯，「想攞返嚟香港畀阿女，賣又得，坐又得」。不過蔡回覆：「不用開回了，直接賣出去」。
同日，張向蔡傳語音訊息：「如果係佢個名，佢可以報失㗎」，而蔡回覆「如果佢簽就可以賣」。張指，當時與女兒談及要求鄺球簽署加多利山單位的委託書。
10 月 31 日，蔡天鳳在對話提及「佢阿媽」，張庭上稱是指鄺港智母親李瑞香；就「個仔要敗到完了」，張稱「個仔」是指鄺港智。蔡另稱：「做埋啲小動作，又唔珍惜，佢小孩一毛錢都唔會賺唔會算」，張庭上稱，「佢小孩」是指鄺港智、鄺港傑。
蔡又稱兩人不感恩，「正常人都會多謝，咁嘅生活都不知道多謝我」。張形容是「事實」，指鄺家初時與後期的生活不同，「（後期）又兩個工人服侍，有專人司機，靚衫靚手袋，又有錢養佢」。
蔡天鳳稱「同我養兩個孩子，阿媽真係好，工作，如果咁教我孩子，我養佢都值，呢種人唔知感恩」。張庭上指，蔡的意思是鄺球一家「教到啲女（孫兒）唔好」，而蔡認為「如果啲細路仔，話阿媽辛苦賺錢，養佢都值」，但鄺母李瑞香常向兩個長孫說蔡的壞話，例如指「媽咪神經病」。
10:45 蔡母：一輛勞斯萊斯亦在鄺球名下
官追問原因
就蔡天鳳在語音對話提及：「我依家慢慢想返，大陸屋，車、錶都畀咗佢」，蔡母張燕花庭上解釋，鄺球名下亦有兩輛車，其中一輛是勞斯萊斯，一輛是黑色七人車，後者已售出，勞斯萊斯仍在深圳；手錶則屬鄺港智。
控方問，為何鄺球名下有兩輛車？張指，鄺港智說要做生意，「畀佢攞去賣，值錢就賣出去」。控方問，但為何要登記在鄺球名下？張稱「不嬲習慣大家咁好，攞佢個名，照顧佢，大家都好好」。
控方追問，登記在鄺球名下有何好處？張指「有着數，咁投資呢啲嗰啲，咁賺錢就要賣，佢賣得到佢就攞去賣，錢就畀阿女」。
暫委法官祁彥輝聞言表示不解，問若要讓鄺港智做生意，為何車輛不是登記在他名下？
張燕花稱，「Alex（鄺港智）指定寫鄺球，Alex 話用佢老豆個名，因為佢用唔到自己名」。控方問，為何不能登記在鄺港智名下？張稱「我又冇問咁多」。張供稱，初時贊成女兒協助鄺家，但後來女兒與鄺球爭執，「搞到要埋呢間屋，呢啲嘢，嘈起嚟，又話要殺又要斬」，故她着女兒「該收嘅嘢就收返嚟」，而女兒亦有聽她的意見。
10:35 蔡母：女兒海南物業亦登記鄺球名下
同樣要求鄺委託出售
控方播放張燕花與蔡天鳳 2022 年 10 月 17 日的語音訊息，一把女聲提及「落地獄」，張確認是女兒的說話。控方問，蔡稱「我依家慢慢想返，大陸屋，車、錶都畀咗佢」，當中的「大陸屋」是指甚麼？張指是在海南的物業。
張稱，該物業是蔡天鳳購買，同樣登記在鄺球名下，後來鄺球、蔡天鳳因加多利山單位爭執，蔡亦打算出售海南的物業。鄺、蔡再次爭執，指鄺球不願賣海南物業，張跟鄺說：「我話唔輪到你唔肯㗎」。
張指，當時稱「呢啲講明，大家都知道，啲嘢係阿女」，鄺球終簽署委託書，由張胞兄的女婿售出物業。
控方指，即鄺球簽署了海南物業及加多利山單位的委託書？張確認，指鄺球先簽海南物業的委託書，後來她稱要上法庭，鄺球才簽署加多利山單位的委託書。
控方問，為何鄺球會改變主意，簽署海南物業的委託書？張指，「一路咁嗌交，阿女想收返所有嘢⋯⋯唔簽我就要告佢嘛」。
10:14 開庭 張燕花續作供
張燕花周二盤髮、穿白色外套、黑褲抵達法庭，坐下時脫口罩、向主控微笑。
控方繼續問及蔡天鳳為避稅，將加多利山單位登記在鄺球名下，而當 2022 年 6 月擬賣物業時鄺球不願配合一事。
張燕花指，當時女兒要求鄺球簽委託書，授權她賣樓，但鄺球不肯，又指「（鄺球）講起賣樓就『殺死你』咁樣講」、「佢要打要殺，佢真係有打阿女」。
主控、資深大狀郭莎樂問，張有否親耳聽過鄺球所言？張稱沒有，是女兒告訴她，又指自己曾致電鄺港智、鄺球，其中在 2022 年 9 月致電鄺球，「我同佢講話，『你哋全家都知道，呢啲嘢係阿女嘅』」，指鄺聽到女兒要賣樓「就係講打講殺嗰隻」。在被告欄的鄺球一度皺眉。
郭莎樂問，其實鄺球是跟蔡天鳳抑或張燕花提及「要打要殺」？
張澄清，鄺球曾向她及她的女兒說過，形容鄺球「好惡囉，（說）你夠膽（賣樓）我殺咗你全家」。鄺球聞言冷笑。張指，10 月底她向鄺球稱：「上法庭見，要反面啦，我話要上法庭見，佢先同意（簽署委託書）。」
3 人被控謀殺、阻止合法埋葬
被告依次為鄺港傑（31 歲，司機）、鄺球（65 歲，退休人士）及鄺港智（28 歲，無業）。鄺港傑由大狀 Trevor Beel、劉奕勤、李宣儀代表；鄺球由大狀戴奧偉（Oliver Davies）及羅天祺代表；鄺港智由大狀安華暉（Andrew J. Raffell）、劉皚淇及鄧樂齊代表。
控方由外聘資深大狀郭莎樂（Charlotte Draycott）、高級助理刑事檢控專員梁育珩、高級檢控官林曉敏、吳希樂與檢控官尹培軒代表。案件由暫委法官祁彥輝（Brian Keith）審理。
3 人否認謀殺罪；鄺港傑、鄺港智承認阻止合法埋葬屍體罪，鄺球則不認罪。謀殺罪指，3 人在 2023 年 2 月 21 日，在大埔龍尾村 56B 地下謀殺蔡天鳳；阻止合法埋葬屍體指，3 人於 2 月 21 日至 23 日期間，在香港阻止蔡天鳳的屍體被合法埋葬。
HCCC198/2025