南丫海難周日踏入 11 周年，兩名遇難者家屬爭取召開死因研訊勝訴，在追尋真相和公義的路上踏前一大步，審期雖然未定，但有第三名家屬已申請加入研訊，而因家庭原因一直保持低調的難屬 Sally（化名），亦重新聯繫，並首次接受訪問。
Sally 的姐姐在海難中殞命，其時 52 歲，她說「姐姐係姐夫嘅全世界」，而姐夫於海難後不想見人，「我覺得佢都係一個受害者…好想將件事冚埋，唔想人哋知」。直至他去年在家突然離世，Sally 發現姐夫一直保留姐姐的遺物，「你諗下呢 10 年佢係點過？每一日都係折磨」。
Sally 說，覺得勝訴的家屬 Alice 和趙炳全「好犀利」，「佢哋認為係一件啱嘅事，就真係好堅持去做，喺佢哋身上好體現到一句，就係佢哋堅持，所以有希望。」她早前主動聯繫 Alice，希望加入協助，令他們不會覺得孤軍作戰。
另一邊廂，Alice 卻有隱憂，她續以拼圖比喻，覺得能否還原「仍然充滿挑戰」，呼籲涉事各方盡力幫助，「我可能得兩塊（拼圖），但你哋可能每個人手上都有一塊，你攞埋你嗰塊出嚟，嗰個拼圖就會越來越好。」
警方指，正等候死因庭指示作進一步準備。是家屬也是倖存者的趙炳全透露，警方曾聯絡以核實資料。十一在即，今年維港將再現煙花，他稱猶如二次傷害，「唔係話過咗咁耐，（傷痛）就會撫平咗，我覺得最起碼，事情解決咗，先再放煙花，我哋家屬都會心安啲。」
今年 7 月 25 日，高等法院門外傳來「喜訊」，海難家屬獲判勝訴，申請人之一梁淑玲（Alice）在庭外形容，「咁多年唯一一次可以喺鏡頭面前笑」，同時呼籲相關人士出庭作供，並邀請其他家屬加入死因研訊。
「開到死因庭，只係事件嘅開始，今日並不是完結…希望召開死因庭嘅時候，大家嘅協助、參與，可以令到呢件事真正完滿解決。」
與 Alice 素未謀面，在海難中痛失姐姐的 Sally（化名）看到報道後，內心有點掙扎。
「我當時好想搵 Alice，因為睇到佢呼籲，最重要係她喺傳媒報道，呼籲其他家屬，希望可以一齊加入，所以我聽了之後就諗，其實我係咪要做啲嘢呢？」
家屬相隔 11 年重新連繫
自 2012 年發生海難慘劇後，一批遇難者家屬開設了一個 WhatsApp 群組方便通訊，但 Sally 一直不在群組內，因為姐姐的後事，一直由姐夫負責。「姐夫係直系親屬，所以警方或者所有其他聯絡，都係聯絡姐夫。但我哋都知有一個問題，就係姐夫根本就唔想…唔想繼續跟進呢件事。」
Sally 憶述，姐夫與姐姐結婚超過 30 年，非常恩愛，兩人無兒無女，多年來互相依靠。而姐夫較少朋友，生活圈子主要都是姐姐的朋友，「可以講，姐姐就係姐夫嘅全世界」。Sally 又提到，姐夫及姐姐都很喜歡旅行，原本籌劃了很多旅行大計，打算退休後逐一實踐。
結果，一場海難，奪去了姐夫的人生旅伴，與摯愛看世界的夢想，亦頓成泡影。
Sally 指，姐姐的離世，令姐夫大受打擊、失去支柱，自此之後經常哭泣、不想見人。縱使事隔多年，姐夫每次與太太的家人見面，仍會忍不住落淚。所以 Sally 幾兄妹為免打擾，都不敢主動聯絡姐夫。
「我覺得佢都係一個受害者，我哋好想佢面對呢件事，但佢唔想做，好想將件事冚埋，唔想人哋知，所以我哋都尊重佢。」
另一邊廂，Sally 在過去 10 年一直有留意南丫海難的報道，知道有家屬年復年極力爭取公開調查報告、要求召開死因研訊。自己心裡也有疑問，奈何知道姐夫不想高調，她只好默默觀察。「我哋都好想知多啲，成件事就係…有人坐監，有啲人被告，但嗰份報告（政府內部調查報告），一開始係唔攞出嚟嘅，咁你唔公開，我就越有懷疑，越想知道真相。」
Sally 的姐姐遇難時 52 歲，姐夫當時 53 歲，他頓失摯親，唯有寄情工作，至 60 歲退休。直到去年，姐夫突然在家中去世，終年 63 歲。Sally 後來發現，姐姐所有遺物，姐夫多年來一直保留著，一件也沒有棄掉，令她相信姐夫的死，或多或少與姐姐離世有關。
「你諗下呢 10 年佢係點過？每一日都係折磨，我聽到佢走嘅時候，真係好傷心…其實我媽媽都係喺我姐姐走咗一年幾之後中風。你話兩件事有冇關係？我覺得有，都會影響到你嘅健康。」
Sally：入稟家屬體現「堅持先有希望」
姐夫離世後約一年，Sally 在新聞報道中看到南丫海難的新進展。上訴庭認為，就海難召開死因研訊符合公眾利益，家屬一方發現的新證據，亦有需要透過公開聆訊進一步審視，以查找海事處的監管及審批制度，是否有更深層次的系統不足。
當日的報道，之所以吸引 Sally 注視，不僅判詞內容，還有兩位入稟家屬，Alice 與趙炳全站在法院門前的身影。「我覺得佢哋好犀利，佢哋認為係一件啱嘅事，就真係好堅持去做，喺佢哋身上好體現到一句，就係佢哋堅持，所以有希望。」她娓娓道來。
Sally 看到報道後深受感動，「我都想做啲嘢」，於是跟哥哥及妹妹商討。三人都一致希望為姐姐追尋事實真相，同時亦希望他們的加入，令仍在堅持的家屬，不會覺得孤軍作戰。
「好多謝佢哋可以咁樣跟咗 10 年、義務去做呢件事，所以當佢哋呼籲，家屬可以嚟開會或者幫忙，我都舉咗手，如果可以嘅話，我都好想幫手。」
徐志盛：加入死因研訊是責任
除了 Sally 有意為死因研訊出一分力，另一位遇難者家屬徐志盛（Ryan），早前亦正式為逝去的哥哥及侄女，入紙申請加入死因研訊。
「我覺得入紙呢個動作，對於我嚟講，係一個表態、一個態度嚟，話畀屋企人知，我從來冇放棄過。」
事實上，Ryan 的名字，在過往的南丫海難報道，幾乎由第 1 年到第 11 年，從不缺席。去年 6 月 3 位家屬入稟高等法院，要求法庭下令召開死因研訊，Ryan 都是申請人之一。不過高院同年 11 月駁回申請，家屬決定再入稟提上訴之時，Ryan 因公務不在港，難以處理法庭文件，故名義上暫時退出申請。
「由事件一開始發生，到喺所有傳媒見到我個名開始，其實我抱守嘅信念係無變過，我需要一個真相。嗰個係我親大佬、親侄女，我唔可以畀佢哋死得不明不白。我最希望做到嘅係，召開死因研訊，將所有嘢都攤出嚟，出晒報紙，然後我攞住份報紙，喺佢哋嘅靈前朗讀一次，將結果話畀佢哋聽。」
上訴庭早前在判詞總結提到，死因研訊「遺憾地姍姍來遲」，但希望對家屬而言，可令事件告一段落。 「我希望死因研訊真係可以貫徹呢個宗旨，去搵清楚呢件事嘅真相，畀到我哋屋企人一個交代。由發生當日到而家，我都冇辦法接受，你話係意外，呢個世界冇乜純粹嘅意外，其實當中係牽涉咗好多好多嘅人為錯誤。」Ryan 說。
死因研訊暫未有審期
警方陸續聯絡家屬
另一位申請人趙炳全則透露，警方早前曾聯絡他，核實死者直系親屬的資料，並通知他有機會出庭，作為家屬代表在庭上發問。另一方面，趙炳全同時是船上的生還者，所以亦有機會以證人身分出庭作供。據他所知，其他家屬亦陸續收到警方電話，詢問他們是否有意加入研訊。至於審期，則暫時未有定案。
警方回覆《法庭線》查詢指，已經根據死因裁判法庭的指引，呈上與案件相關的文件，等候指示作進一步的準備工作。司法機構則不評論個別個案，但指一般而言，死因裁判法庭會在考慮每個個案的所有情況，包括複雜程度、各方時間表、法庭運作需要等，盡早安排進行死因研訊。
家屬經過多年爭取，屢度碰壁，到事發將近 11 年，迎來少許曙光，本應可稍為鬆一口氣。但趙炳全心底裡仍然有隱憂，因為他知道，死因研訊能否完整還原真相，取決於很多不確定因素，包括有多少人出庭作供？海事處、船公司、驗船公司、造船公司等持份者會否全面配合？庭上又會公開多少文件？
「涉事嘅人離開咗香港，或者移咗民嘅人，希望佢哋會返嚟作供。如果佢哋唔作供，呢個死因研訊得個空殼。」
曾經形容死因研訊，可將拼圖還原的 Alice，亦不敢低估箇中難度，特別提到警方 2015 年提交死因庭的調查報告披露，有船公司管理層曾拒絕警方邀請會面。
「我希望作出一個呼籲，無論你當年有冇被調查，或者叫你落口供都好，希望你都可以知無不言，言無不盡，哪怕你覺得嗰件事，唔知對警方有冇幫助，我都好鼓勵你同警方交代一下，可能都會幫助到呢件事推進一小步。而家終於畀我開綠燈去砌嗰個拼圖，我可能得兩塊，但你哋可能每個人手上都有一塊，你攞埋你嗰塊出嚟，嗰個拼圖就會越來越好。」
維港夜空煙花再現
家屬指心結未解難接受
今年十一，家屬百感交集，除了因為死因研訊充滿變數，還有另一個心結，就是煙花匯演相隔 4 年，將再次在維港夜空出現。
香港自 1997 年回歸後，每年 10 月 1 日都會在維港舉行國慶煙花匯演。直至 2013 年，政府因 2012 年南丫海難取消國慶煙花，翌年再因佔領運動取消。2015 年一度復辦，至 2019 年因為反修例運動，政府稱基於公眾安全考慮，再度取消國慶煙花。其後 3 年，政府則以疫情為由停辦煙花匯演。
Alice 慨嘆：「今年行前咗一小步（獲准召開死因研訊），本身都係令人鼓舞嘅事，但我覺得有啲諷刺，我睇廣告，香港加碼去搞煙花匯演，再配合「夜繽紛」，我真係好想講，我明白大家想搞㷫個 market（市道），但其實都要花啲時間，去解決一啲以往嘅事情。」
趙炳全亦指，海難疑團至今未釐清，政府仍未履行承諾全面公開內部調查報告，就決定復辦煙花匯演，對家屬而言無疑是二次傷害，「唔係話過咗咁耐，（傷痛）就會撫平咗，我覺得最起碼，事情解決咗，先再放煙花，我哋家屬都會心安啲。」
記者：陳婉婷