47 名民主派被控「串謀顛覆國家政權」罪一案，周四（17 日）展開第 108 天審訊，初選參選超區的李予信開始作供，稱修讀中大社工學系，2019 年成為社工，有志做社會、青年工作。 控方開案稱李有份出席 2020 年 3 月公民黨記者會，而楊岳橋發言提及否決每個政府議案、財政撥款。李供稱，發言者當時表達「混合訊息」，他聽到楊岳橋等人否決所有撥款的說法，但郭家麒的說法又似乎不會否決所有撥款。 李又供稱，2016 年因協助公民黨立會選舉而認識鄭達鴻等人，後獲鄭遊說入黨並出選區議會，並當選東區區議員。鄭曾提出 2020 年立會選舉時，李排其名單第二，惟李拒絕，李其後響應黨內「徵召機制」出選超區。案件周五續。 周五實時報道： 【實時更新】47人案｜第108日審訊 李予信開始作供 47人案審訊報道一覽
李予信：獲鄭達鴻遊說選區議員
為參選加入公民黨
李予信在其代表大狀關文渭主問下，確認生於 1993 年，2020 年案發時為 26 歲，而本周五將屆 30 歲。李又指，2014 年首接觸政治，於街工實習，翌年轉讀中大社工學系，而於 2016 年在公關公司兼職期間，亦參與過公民黨港島區立法會選舉的工作。
李解釋，該公關公司當時承辦公民黨競選宣傳工作，他則被指派協助港島參選人陳淑莊及鄭達鴻，其後他與公民黨員大時大節「傾兩句嘅說話都有嘅」。至 2018 年底臨近畢業，接到鄭達鴻電話，遊說他加入公民黨並出選區議會。
李稱，他當時有志做社會、青年工作，鄭其後邀他出席有陳淑莊、賴仁彪等公民黨執委的飯局，探討出選可能。李最後選擇在鄭的鄰區、北角錦屏選區出選，並在 2018 年 11 月獲確認「支部會員」身份，再以地區發展主任身份接受地區工作等培訓，另亦有做陳淑莊立法會議員兼職議助，轉介地區事務予立法會。
李表示，按公民黨架構，入黨第一步是成為「支部會員」，「係最基本嘅一個成員身份」，主力處理地區事務，但權力受限，包括不具會員大會投票權，亦不能參選執委或出任黨魁、司庫、秘書長等要職。另要做滿一年支部才可申請當「普通黨員」。
關問，李予信在社會事件發生期間成為社工？李稱，「無錯，我喺 2019 年 7 月 21 號收到社工證。」而李同年擊敗民建聯蔡素玉，勝出區選，成為東區錦屏選區的區議員。
李：公民黨記者會上就否決預算案
得到「混合訊息」
李亦解釋對 2020 年 3 月 25 日公民黨記者會的認知。控方於開案指，記者會有鄭達鴻、李予信等人，其中時任黨魁楊岳橋發言指，若政府未能回應「五大訴求」，往後每個政府法案、財政撥款申請，公民黨都會否決。
據早前庭上展示記者會謄本，出席者的部分發言：
楊岳橋：立法會嘅職能，民主派職員一定要過半先有效發揮，包括要求政府聆聽市民訴求，即係五大訴求.. 作為個別議員我哋好難做到…但作為整體，當成個陣營有足夠決定，先可以係憲制上發揮功能，要再清楚強調，公民黨願意…係否決每一個方案，每一個，包括而家終審法院首席法官法官嘅任命…公民黨亦都會有如其他法案一樣，一併否決。 郭家麒：…佢係一個高官嚟，佢無理由唔知鄧小平寫《基本法》係原有制度不變，就算立法會過半可以否決，都係《基本法》容許同埋…政府受約制、受監管…政策得到市民接納，坐喺度嘅立法會議員，哪怕係 30、40 個議員，點解唔係支持呀？…胡亂增加政府開支…有責任將民意反映出嚟，直至政府交出合理政策，呢個係最重要嘅一樣嘢。
關問，李當時聽到出席者的發言後，得出甚麼訊息？李答，「我當其時得到嘅係一個混合嘅訊息嚟嘅…郭榮鏗、楊岳橋同譚文豪有講過…《基本法》否決財政預算案之後嘅安排同埋規定出嚟，咁佢哋當時係用反對議案、法案、撥款等等嘅描述嘅。」
李續說，「而郭家麒嘅發言入面呢，有好強調到個否決《財政預算案》嘅合理性…但係…如果個預算案係合理、得到市民嘅支持嘅話呢，無論（民主派）選到 30 席定係 40 席呢，都係支持嘅…」
李再指，「總括而言，我係聽到一啲否決所有撥款嘅講法，但係似乎郭家麒又唔會否決所有撥款嘅講法，而林瑞華亦都爭取緊一啲（飲食）業界嘅支持（反對禁酒令）…所以我會形容，當日嘅記者會嘅訊息係混合嘅…」
李：前一日獲秘書處邀出席
理解為呼籲選民登記
被問出席記者會原因，李稱記招舉行的一日前，黨內秘書處幹事通知他出席，對方指記招是呼籲選民登記，因當時即將截止、有逼切性，「咁我當時聽到呢一個介紹呢，我又覺得好理所當然係要幫手嘅」。
李其後指沒人解釋邀他出席原因，秘書處曾指他毋須發言，他最終亦沒發言。法官陳慶偉其後問，李以為記招為選民登記，難道不會對記招變成如此感驚訝？李答「其實唔會好愕然…黨好多時有一啲活動呢…佢都係會邀請啲成員去撐場咁嘅」。
被問到出席者參選意欲，李表示當時他「從來無表達過，或者諗過，參與該屆嘅立法會選舉」。
獲邀出席「心戰室核心小組」會議
李：區議員有機會為「樁腳」
關文渭另展示公民黨題為「立法會選舉 心戰室核心小組 」第三次會議紀錄文件，該會於 2020 年 3 月 31 日舉行。李予信確認有出席，指獲黨秘書處人員邀請，指記者會後有些檢討工作。李又指，當日為他第一次出席會議，其後亦曾出席，但已忘記是哪次。
李指他理解該小組是「關於立法會選舉籌備討論或者係一啲論述上思考嘅小組會議，但係當其時喺我嘅理解，係同我距離有啲遠嘅，因為我只係一個上任 3 個月嘅區議員。」
李運騰問，李予信是否知悉被邀請加入核心小組的原因？李予信稱有兩個理解，首先楊岳橋記者上曾稱「佢身後嘅一啲新嘅區議員…係可以幫大家做選民登記嘅。」至於第二個理解，李稱區議員有機會做「樁腳」角色，咁我有機會需要喺選舉嘅時候做一啲嘅支持」。
李又形容當日的會議，「係好似一間公司新入職嘅員工入左一間高層嘅房咁樣」，李續說，「會上面就有啲立法會議員講緊立法會層次嘅事喇，咁我當其時就真係其實坐喺度㗎啫」。
官質疑會議紀錄無提選民登記
李：非百分百準確
法官連番質疑會議紀錄沒有提過選民登記，李予信則指「口頭上應該有講過」，並指「依個係一個未百分百準確嘅一個 record」。李運騰問，選民登記似乎不屬議程內，問李予信事前有否收到文件？李表示不記得。
李追問下解釋，「論述係對選民登記好重要嘅一環」，指因為每區關注的事務不同，因此該會議的存在意義，「我會理解為就係要傾下有啲乜嘢嘅重點嘅論述呢，可以喺地區政策解釋返畀公眾聽」。
陳慶偉又一度提高語氣，模仿以往選民登記的經驗，指有人會說「先生，登記做選民呀！」，途人只會給予 5 秒鐘，質疑難以闡述更多內容。李則稱，在傳統政黨眼中，被吸引的選民，「其實好有機會係將來嘅選舉係投返畀我哋嘅」，追問下補充稱，開街站做選民登記，亦是服務選民的工作。
李運騰指，不是每名區議員都有出席會議，且會上沒有提及選民登記的後勤工作安排，質疑為何李會被邀請出席？李予信則表示，無人詳細向他提過原因。
辯方引林瑞華、郭家麒等發言提問
指會上提經濟復蘇的議題
關續引述該「核心小組」會議紀錄，提到林瑞華的發言提及「支援飲食界」，另郭家麒指疫情至少會歷時 一至一年半。關問，即是會包括同年 9 月的立法會選舉及其後的《財政預算案》？李同意。
關問，郭亦提到疫情放緩後刺激經濟？李同意，並指「好深刻印象」，因他在該部分唯一一次發言，而其發言關於幫助「被遺忘嘅業界」，想政府認清該些的業界規模及經濟貢獻。
關其後欲引文件內容再追問時，陳慶偉指不了解有何相關性。李運騰指，明白辯方的意思是欲展示證人提出的方案需要政府支持，想與政府合作，而不是提出反對，指法庭已明白，著關問其他問題。
李稱獲鄭達鴻邀請 任其排名第二
李指拒絕因欲專注地區工作
另關亦問及，李予信為鄭達鴻名單第二人選的議題，並展示題為「香港島 鄭達鴻 李予信 立法會選舉工程 工作計劃」的文件。李稱，「無一個協議，只係一個可能性嘅探討」，並指「最尾我無同意做佢第二」。
李予信又供稱，在 2020 年 4 月至 5 月中，有討論過在鄭達鴻的立法會選舉名單排名第二，並由鄭達鴻向他提出。
李指在 5 月中「咁我就同鄭達鴻講呢，其實我就唔想做第二」，指自己剛上任需要處理很多地區、抗疫支援工作，且當時只有李及另一名全職助理，「其實都好吃力，如果我仲要好頻密地去做一啲落區派傳單嘅工作呢，其實係啲工作理念上唔係好發揮得到我當時關注既議題」，故退出鄭的選舉預備工程。
李確認拒絕鄭後 2 至 3 周
改為想參選超區
李又稱，5 月尾時知悉黃文萱不參選超區的消息。關其後展示題為「2020 年立法會換屆選舉 啟動徵召機制」的電郵，李同意，電郵邀請公民黨區議員參選超區，而有意參選人士需要得到 5 名區議員支持、需要出席諮詢會議介紹政綱、參選宣言，另需要有 10 個區議員書面支持；李又同意截止日期「係好緊逼」。
李稱有回覆電郵，並表明有意參選，「我係（2020 年）6 月 2 號有交到一個 5 位區議員嘅一個 list，就表示我有興趣參與呢個徵召機制。」
李運騰問，李予信在 2 至 3 星期前向鄭達鴻稱想專注區議會事務，但突然改想參選，著李解釋。陳慶偉則下令先休庭，著李周五解釋。
HCCC69/2022