蔡天鳳疑遭殺害碎屍案周四（15 日）進行第 17 日審訊，蔡的丈夫譚方駿繼續接受盤問。代表鄺港傑的大狀 Trevor Beel 展示蔡與鄺一同出席生日會、聚會的相片，問譚，鄺港傑沒有理由襲擊蔡？譚答，「當時係」。
Beel 指鄺現時面對謀殺控罪，譚稱：「我唔知應該點答呢條問題」，指現時回想與鄺一起到大埔尋妻，「收到（警方）電話之後，我依家諗返起，一切都好恐怖」。代表鄺球的大狀戴偉奧、代表鄺港智的大狀安華暉先後開始盤問。
Day16｜譚方駿：事後回想感覺李瑞香想拖延報警 鄺港傑好似呃緊瞞緊我
編按：報道涵蓋庭上描述的案件過程細節，或會引起不安。
訂閱／贊助／購物，支持《法庭線》報道香港，記錄香港。
16:17 休庭 周五續審
15:24 譚：妻指鄺家全家「越嚟越恐怖」
「我太太嘅感受，我會去理解同支持」
辯方大狀安華暉又提到，鄺港智亦支持搬到屯門的決定？譚方駿指不清楚，解釋因為鄺港智並無表明他的立場，「所以我唔會知道佢係咪想搬過去」。
安華暉又指，蔡天鳳曾與鄺港智談及移民英國？譚指未曾聽過。安華暉又指，因為鄺港智被通緝，所以亦處於兩難狀態？譚回答「首先我唔知道通唔通緝呢件事，第二樣嘢佢嘅兩難，其實唔係我依家要去關心嘅事」。
安華暉表示，蔡會經常就子女問題與鄺港智商討。譚形容蔡會通知鄺港智，「咁當然佢作為老豆，佢有畀意見係正常嘅，最後決定係媽媽嘅決定」。安華暉形容，蔡有較強勢的決定？譚形容，「我會話 Abby 會選擇最好嘅嘢畀小朋友，呢個係好正確嘅」。
安華暉再問，比起鄺港智，蔡的性格更強硬？譚指「可以咁講」，又指妻子針對關於子女的事情上，「佢冇得讓步、佢唔會讓步」。安華暉指除了子女方面，蔡對於投資生意方面，她亦想自行處理？譚指「咁佢有能力好正常啫」，但譚同意蔡的性格較鄺港智強勢，「佢會揸緊啲」。
安華暉再指，當鄺港智自 2015 年失蹤時，蔡與他仍一同撫養二人的子女。譚表示不同意。安華暉提及，與鄺港智亦會每天透過訊息溝通？譚確認，指兩人會就子女的問題商討。
安華暉提到，蔡 2022 年 6 月曾懇求鄺港智回港，因為她感到妒忌，鄺港智在國內有另一女友？譚指不清楚。安華暉指，譚曾與鄺港智談及鄺的女友？譚指以其印象並沒有。
安華暉續指，譚作供時提到蔡曾稱鄺家「越嚟越恐怖」，但譚無法講述鄺港智曾對蔡、子女、譚所作的行為，以致鄺變得「恐怖」？譚指「Abby 同我講完，呢個係佢嘅感受⋯⋯係對全家鄺家人嘅感受，我太太嘅感受，我會去理解同支持」。安華暉追問，譚有否看見鄺港智對蔡作出可怕的行為？譚指沒有。
安華暉問及譚與鄺球的關係。譚稱：「我當然識佢啦，你話係咪好熟，唔係」，又同意因發燒事件，認為鄺球是壞脾氣、使用暴力的人。
安華暉指發燒事件後，蔡再因 2023 年農曆新年鄺球帶孫兒見其女友一事而生氣？譚指，不知道鄺球有沒有女友，指蔡不滿子女見爺爺，不僅氣鄺球而是氣鄺家全家，「佢（蔡）搵晒全家人，都搵唔到仔女，全家人瞞住佢、講大話呃佢」。
15:10 譚：鄺港智在鄺家有影響力
鄺球會聽從他的安排
辯方大狀安華暉續就 2022 年中，蔡與鄺的女兒發燒一事的情況提問，指譚供稱是 2022 年 6 月或 7 月發生。安華暉則指，鄺港智則指事件發生於 6 月 13 日，因為他於 6 月 10 日才回港。
安華暉續指在該次事件後，譚、蔡及鄺港智 3 人仍有一同外出，包括到中環燒烤、在大坑吃蒸肉餅。譚確認事後曾一同外出用膳。
安華暉提到，鄺港智會單獨與蔡吃火鍋？譚指不知道。安華暉另提到，在該次事件後，3 人亦不時會到加多利山單位用膳。譚確認。
安華暉又指，鄺港智會和譚及蔡父蔡楚生一起打麻雀，涉款約數千元上落？譚同意。安華暉形容，而鄺球與譚、蔡、張燕花及蔡楚生的關係疏離？譚確認，指鄺球在發燒事件後已沒再到加多利山單位。
至於鄺港智，安華暉指他並無變得疏離，而是繼續一同用膳，鄺港智亦繼續住在加多利山單位？譚確認。安華暉問，譚從未見過鄺港智以暴力對待蔡？譚稱「以我雙眼所見冇」。安華暉追問，譚亦未見過鄺港智對蔡威脅使用武力？譚指沒有。
安華暉又指，在發燒事件上，鄺港智亦有協助阻止鄺球衝向蔡？譚指當時只記得鄺港傑協助分開鄺球，但發生於電光火石，不記得鄺港智有協助分隔兩人。
安華暉再指，在發燒事件後，鄺港智仍是家庭的一份子，有與蔡見面，並無敵意。譚形容，「表面上係」，而他發現加多利山單位並非在蔡的名下，當「你知道啲嘢係你自己嘅時候，你只能夠小心翼翼、一步一步咁攞返自己嘅嘢返嚟，而唔破壞關係」。譚解釋，他不會以「偽君子」形容自己的行為，但指確是「有啲 sneaky（鬼祟）嘅」，因為「本身啲嘢自己嘅，唔係用硬碰硬方法攞返自己嘅嘢」。
安華暉追問，但鄺港智無權處理加多利山單位的情況？譚指「法律上可能係，但喺鄺家，佢嘅說話各樣嘢係有影響力」，令鄺球聽從他的安排，「易過直接嘈」。
15:00 譚：從蔡口中知道
鄺港智祝福他與蔡
代表鄺港智的大狀安華暉再指，譚與蔡的子女出生前，他與鄺港智已是好朋友？譚確認，但「之後佢唔見咗吖嘛」。
安華暉追問，譚曾到海南的海口探望鄺港智，鄺港智、蔡及譚 3 人到酒店用膳？譚確認 3 人曾一同用膳，但反問「我唔明點解叫探，咁我喺海口，點解唔係叫佢『探』我？」
譚憶述，因為蔡母屬海南人，譚到海南後亦不只探親，亦有遊玩，當時妻子告知他「原來 Alex 都喺海口喎」。譚指，「咁跟住之後見面唔出奇，我同 Abby 一齊後，通過 Abby 知道，佢（鄺港智）係祝福我哋嘅，我都知佢同鄺港智嘅事，咁喺海口食餐飯，當時關係 OK 嘅」。
安華暉追問，譚不止一次在內地見鄺港智，曾兩至三次與鄺見面？譚形容當時「我係帶小朋友上去見佢地嘅爸爸」。
安華暉再指，譚從澳洲回港後，他與鄺港智以 Facebook 聯絡，兩人見面，而鄺港智曾在黃埔的平治汽車展場偶遇譚？譚指當時有遇到鄺港智及蔡，隨後以社交媒體聯絡對方。
14:40 辯方：譚曾向鄺港智提出有浪漫關係、性關係？
譚：絕對唔同意
代表鄺港智的辯方大狀安華暉開始盤問譚方駿。
安華暉引述控辯承認事實，提到鄺港智的電話號碼其實屬於譚，而譚把電話卡交予鄺港智。譚解釋，他曾因風水原因而轉電話號碼，所以把舊電話號碼放在雪櫃上，譚相信蔡當時把此舊電話號碼交予鄺港智使用，而非由譚交予鄺使用。
安華暉又提到，譚與鄺港智 2008 年在協同國際學校認識，兩人屬好朋友？譚回應「當時係」。安華暉再指二人是好友，直至 2023 年？譚回應，「你可以咁睇嘅⋯⋯由 2023 年 2 月 21 日至 24 日我會覺得好大分別」。
安華暉展示 2023 年 2 月 24 日譚的口供，形容鄺港智「他當時就讀中一，我們是好朋友關係」 。譚庭上回應，「我 12、13 歲嗰陣係」。安華暉追問，二人當時不只是好友，而譚曾向鄺提出有浪漫關係、性關係？譚回應「絕對唔同意」。安華暉續指，隨後譚到澳洲讀書，及至 2013 年放暑假回港時，透過鄺港智認識蔡，譚的口供提到「當時我已知道 Abby 同 Alex 結婚，我跟他們都是好朋友」。譚確認。
安華暉追問，譚與鄺港智二人一直是好友，直至 2023 年 2 月 24 日。譚指，當他就讀中學、及後在澳洲留學時，「都可以話係好朋友」，及後譚與蔡交往，鄺港智亦失蹤，「連人都見唔到嘅時候，你同一個人嘅情感會降低」。
安華暉續引述譚的口供，譚提到「我同 Abby 一起生活，同 Alex 關係亦非常好」，並稱會經常到加多利山單位見蔡與鄺的子女。譚稱，當時會帶子女到該單位玩。安華暉強調，譚與鄺港智關係非常好？譚解釋，「我會話絕大部分、極大部分，係小朋友嘅因由，佢哋係兄弟姊妹因由，所以係促使見多咗嘅」。
譚形容，當時二人關係「OK」，但強調「原由係小朋友，最關心係佢哋兄弟姊妹嘅成長，雖然係不同 household，但做父母想促使到呢樣嘢，係最想做到呢樣嘢」。譚又指，當時他會帶子女到加多利山單位玩，蔡與鄺的兩名子女亦有到九龍塘獨立屋玩。
安華暉關注，所以鄺港智、譚及蔡 3 人關係非常密切？譚回應，「我哋嘅小朋友係兄弟姊妹，成日講小朋友嘅嘢，咁密切啲，我覺得都幾 make sense⋯⋯鄺港智嘅仔女同我嘅仔女事實地、生理上咩都好，就係兄弟姊妹，所以你話我哋關係好，係基於小朋友，係我哋最 value 嘅一件事」。
14:30 譚方駿：不知妻將曼克頓山單位抵押借款
代表鄺球的大狀戴偉奧，續就蔡天鳳的財政狀況盤問譚方駿。戴偉奧引述譚 2023 年 3 月 23 日向警方錄取的口供，譚提到父親每月給予蔡 50 萬元、亦曾給予蔡約 4,000 萬元作投資房地產之用，而蔡的父親每年又給予蔡 300 至 400 萬元。蔡本人亦是模特兒及 KOL，另有炒賣名錶，收入不詳。譚庭上確認口供的內容。
戴偉奧追問，但譚日前供稱父親曾給予 7,000 至 8,000 多萬元予蔡，而非 4,000 多萬元？譚指，父親前後均有提供 1,000 萬元的支票予蔡，「1,000 萬我一家知道，800 萬都試過，以我所知加加埋埋 7、8,000 萬畀過佢」。
戴偉奧關注為何當時譚沒有告知警方？譚稱他不是有意隱瞞，因為他當時最深刻是父親給予妻子 4,000 萬元的支票，「1,000 萬、800 萬我係可以交代，但當時我係去錄口供，唔係茶餘飯後同你傾計慢慢講嘅嘢」。
戴偉奧再問，譚是否知道蔡曾以曼克頓山的單位進行按揭？譚指當時不知道，而他作為蔡的遺產管理人，他知道該按揭約 900 萬元。戴偉奧又提到，蔡曾把單位於 2021 年 10 月到靄華押業公司進行二按，於 2022 年 4 月已全數償還 400 萬元。譚指不知道，並確認他現時在庭上才知道。
13:01 午膳
12:45 鄺球一方質疑
譚處理蔡遺產漏報珠寶
針對蔡天鳳的遺產，戴偉奧指蔡的遺產管理書沒提及珠寶？譚方駿同意，因他不知道珠寶會被列為遺產，又指珠寶放在蔡母住所，「佢可以帶返 Abby 生前嘅嘢，佢可以 pass 畀我哋仔女」。
戴偉奧質疑，譚應點清資產數量？譚同意看過資產列表，但僅「粗略睇」，亦知道管理書賦予他權利處理。
戴偉奧再質疑，譚理應知道資產包括珠寶？譚稱不記得，「我只係一個普通人，我唔係每日要處理白紙黑字嘅嘢，呢個係作為小朋友嘅權利，我作為父親，好多嘢我睇到，亦都睇唔到」。戴偉奧指，但譚在宣誓下申報？譚稱「我係要宣誓，咁我係咪要由第一個字記到最後一個字，係咪每個字都要記得？」
12:30 譚方駿確認借 500 萬玩賭博被追數
原本因賭場倒閉而「覺得唔使還」
就譚方駿借 500 萬賭錢一事，戴偉奧指蔡天鳳是他的擔保人？譚同意。戴偉奧指，譚父為他還債？譚稱，2021 年太陽城（賭場）倒閉，跟蔡商量「都執啦，冇公司喎 ，咁我還咪好傻仔？咁去到有人嚟搵我哋時候，佢自稱嚟幫太陽城收數，公司執咗，你話係就係，我唔想還。但我 Daddy 收到訊息，佢就好想還」。
譚續指，「我想表達，唔好話 500 萬，5 萬，人哋執笠你都唔想畀，佢搵到我哋屋企，我 Daddy 又想解決呢件事，咁最後都還咗」。戴偉奧問，譚何時知悉父親被追債人士騷擾？譚稱，父親被騷擾後即日告訴他。
戴偉奧指，譚不理會賭債，任由父親被騷擾？譚否認，「我只係覺得唔使還，因為呢間公司執笠，我有同 Daddy 分析，佢想息事寧人，咁你輸咗。我正常人覺得，可以唔還唔想還」。
戴偉奧指，「正常人」認為公司破產就不用還？譚稱：「呢個係我角度，父親角度要還，都要搵啱人還，還完你話唔係太陽城，你第二間咁點？」戴偉奧指，所以譚跟蔡都沒還錢？譚稱：「呢個都係家族入面嘅錢，個人嚟講係（沒還），我哋兩個都冇」。
戴偉奧問，譚有否還錢給父親？譚稱「呢個係我哋嘅事，呢個係我哋屋企嘅事，對外嚟講，搞掂咗就係搞掂咗」，承認他跟蔡都沒還錢予譚父。
戴偉奧指，譚父曾找鄺球幫忙？譚同意，因鄺球曾任職警察，「佢識人多，黑白兩道」。戴偉奧指，鄺球幫忙不獲報酬，譚亦沒付錢要求鄺球幫忙？譚同意。
12:16 譚：妻稱炒錶賺錢
其後知道難從鄺港智取回資金
辯方大狀戴偉奧問，譚方駿知否蔡天鳳給錢鄺港智投資鐘錶？譚稱在發燒事件之後，蔡有提及給錢鄺港智做生意、炒賣，亦知道有鐘錶公司戶口。
戴偉奧問，蔡有否提及金額？譚稱沒提及實質數字，指炒錶有浮動價格﹐又指蔡有提及錶的售價，「咁咪係投資咗呢隻錶就幾百萬，我知呢隻錶幾百萬」。戴偉奧指，即蔡沒提及給鄺港智的總額？譚稱「你可以咁講」。
戴偉奧問，譚不感生氣？譚指妻子跟他說（炒錶）有錢賺，而他認為「through 邊個對我嚟講，唔係最重要嘅嘢⋯⋯我唔覺有啲咩咁唔舒服，就算呢個係佢前夫都好」。
戴偉奧指，譚對蔡的財政狀況不感興趣？譚同意，「因為呢啲嘢都幾煩」。戴偉奧指，譚常稱蔡懂投資，其中一項賺錢的項目是甚麼？譚指錶。戴偉奧指，但蔡難以從鄺港智身上取回資金？譚稱，發燒事件後亦知道此事。戴偉奧指，所以鐘錶投資非成功投資？譚稱「我今日角度絕對係」。
12:00 譚：曾與妻設想 與 4 子女同住屯門
辯方大狀戴偉奧指，譚方駿早前供稱蔡天鳳為了 4 名子女平等，而將鄺家包裝成過得不錯的假象。譚重申「我相信當時係佢意圖」，指妻子當時是隱瞞他。
戴偉奧問，這個假象說法是蔡提出，還是他自己猜測？譚稱，「佢作為離婚嘅婦人，我作為第二任丈夫，我明白點解佢會咁做，係一直佢畀到大家嘅印象，由始至終呢個係我見到嘅，都係我見到嘅感覺」。
戴偉奧問，所以蔡從沒提及假象的說法？譚指蔡沒實際說過，「但都有指向返話，佢哋邊有錢買呢，考慮到佢哋工作上，好似冇工作」。戴偉奧問，蔡是發燒事件當晚告訴他？譚稱是當晚之後。
法官問，在發燒事件之前，譚方駿知否蔡天鳳有意將子女搬出加多利山單位？譚稱知道，因為妹妹要跟哥哥讀同一間學校。戴偉奧問，譚是否同意子女搬往屯門？譚稱「同意又唔同意」，同意是方便子女上學，不同意是「輸少少錢，好過俾人呃埋成層樓」。
戴偉奧關注時間線，譚解釋，他知道加多利山單位屬蔡之前，已知道蔡欲搬到屯門。後來他知道加多利山單位屬蔡，蔡指「呢家人越嚟越恐怖」，有計劃售出加多利山單位，「佢同我講完，我知佢賣呢層樓」。
戴偉奧問，搬屋後仍計劃由李瑞香照顧子女？譚稱設想過不同方案，包括譚、蔡及 4 名小朋友一同住在屯門。戴偉奧指，另一方案是買較小的屯門單位，由李瑞香繼續照顧子女？譚同意。
11:40 譚方駿：得知加多利山單位屬妻後
向妻指「要盡快攞返」
就長女發燒事件後續，譚方駿指鄺球與蔡天鳳爭執後，鄺仍是憤怒狀態、被眾人勸告離開，李瑞香繼續照顧孫兒，譚則跟蔡回家，「係好正常嘅事，我太太遇到呢啲事，我會返去同佢傾談、安撫佢呀」。
辯方大狀戴偉奧問，蔡有否跟鄺球說，不讓他上加多利山單位見小朋友？譚指，蔡跟鄺球爭執時有說過。譚又指，以他所知，蔡沒直接跟鄺球說「你唔可以點點點」，但她有跟鄺家說過，不讓鄺球跟小朋友見面。
譚早前供稱，他在發燒事件當晚才知道加多利山單位是屬於蔡；譚庭上補充，蔡當時生氣、不開心，說：「老公呀，我有啲嘢同你講，但你唔好嬲」。譚自然地問發生甚麼事，蔡稱「幾年前投資嗰筆錢，就係呢層樓」。譚當時聞言十分驚訝，「我同佢講，咁唔得㗎喎大佬，屋企嘢、自己嘢嚟㗎喎，要盡快攞返」。
戴偉奧問，當時距離蔡買加多利山單位已有 3 年，譚 3 年來從不過問投資事宜？譚稱，對於投資沒能力、沒基本認知，均是由蔡「揸數」，「我自己好多嘢都穩定，我每日生活基本上好一樣、好舒服，反而覺得要同我交代呢樣嗰樣，先係煩惱」。
戴偉奧指，但譚曾在加多利山禮賓部見過鄺球名字？譚同意指，正是他周二供稱的「包裝」，指發燒事件前，認為鄺球「有環境嘛，買呢度住呢度」，故當妻子說單位是由她購入時，他感十分驚訝，因與其認知不同。
11:18 小休
鄺球舉手要求去洗手間。
11:03 鄺球一方：鄺球見妻被罵
大聲責罵蔡的反應屬正常
辯方大狀戴偉奧問及 2022 年 7 月，蔡天鳳就長女發燒與鄺球爭執一事，譚方駿指「我會形容為最激烈嗰次」，又指蔡跟鄺家對於管教小朋友的意見不同，一直都有相關問題，「啲分歧一次我明，去到 10 次都算，但去到 100 次，你永遠都唔會聽我指引」，他指發燒爭執事件是引發點。
戴偉奧指，發燒爭執事件在疫情期間發生？譚稱不記得疫情何時完結。戴偉奧指，每人在疫情期間都是小心？譚同意。
戴偉奧指，當時李瑞香照顧發燒的孫兒？譚同意。戴偉奧指，李瑞香指小朋友發燒，着鄺港智不要入房，令到蔡生氣？譚指是因李的態度令蔡勃然大怒，指她「嫌棄自己個孫」，「唔好惹到自己個仔，佢作為一個母親聽到，火都嚟」。
戴偉奧問，是李的態度令蔡感生氣？譚指是「佢重男輕女嘅舉動」。戴偉奧指，但對話沒提及重男輕女，只是提及小朋友發燒？譚稱「OK」。
戴偉奧問，譚在客廳已聽到蔡跟李爭執？譚同意，指自己是聽到兩人大聲爭執才入房間。
戴偉奧問，鄺球用粗口罵蔡，是想跟蔡說「不要這樣跟我太太說話」？譚稱不知道是否此意思，「但當時我見到嘅，佢完全俾憤怒遮蓋一切，係控制唔到」﹐又指「佢（鄺球）太太只係俾人鬧，言語上，我唔覺得應該受到攻擊」。
戴偉奧指，鄺球的妻子犧牲生活照顧孫兒卻被罵，鄺球見狀大聲責罵，反應屬正常？譚稱：「佢只係睇到佢太太被鬧，佢睇唔到點解佢個孫嘅媽咪（蔡），對住佢太太（李）咁嬲？」
戴偉奧指，譚供稱鄺球第一次衝向蔡並碰到她，此部分是譚庭上首次提及？譚同意。
戴偉奧續指，譚在 2023 年 3 月 23 日錄口供提及此事，僅稱鄺球向蔡發脾氣 ，衝向蔡想打佢，故譚即時擋開鄺球，鄺球便離開單位？譚解釋，口供較簡短，亦沒提及鄺球講粗口、指蔡是「生仔機器」，因當時電光火石之間，只能大概交代，現在才詳細描述當時發生過的事情。
戴偉奧又指，譚在口供指，鄺球沒接觸蔡，因被他擋開？譚稱：「我係有講過佢衝埋嚟，我係最後有擋住佢，你話口供冇寫，我白紙黑字冇，我冇講過，係咪代表佢冇講過（粗口、指蔡是「生仔機器」）？」
10:37 鄺球一方開始盤問
代表鄺球的大狀戴偉奧（Oliver Davies）開始盤問。譚方駿在盤問下確認，他 2019 年沒持有物業，在港亦從未持有物業。
戴偉奧指，曼克頓山單位是譚、蔡的結婚禮物？譚同意。戴偉奧指，但禮物在他們婚後兩年、2018 年才予蔡？譚解釋，當時譚家居於曼克頓山單位，答應蔡會「送層樓畀佢」，直到 2018 年舉家搬往九龍塘海棠路獨立屋，便將單位轉予蔡的名下。
戴偉奧指，蔡與鄺港智的兩名子女未有搬到九龍塘，而是由鄺母李瑞香照顧？譚稱，「當時唔覺得佢係 supervision，我係覺得佢係久唔久上嚟」。戴偉奧指，李瑞香是主要照顧者？譚稱「佢有份照顧」，但指李當時並非跟蔡的子女同住。
戴偉奧指，蔡的兩名子女搬到維港·星岸後，李瑞香是主要照顧者？譚稱「生活上係」，但強調是蔡訂立照顧指引，李再安排家傭工作。戴偉奧指，當時蔡 90% 不在場？譚不同意，指蔡會接放學，自己亦跟蔡哄兩名子女睡覺，才返回九龍塘住所。
戴偉奧指，李瑞香住在維港·星岸後，全時間照顧兩名孫兒，直至 2023 年 2 月？譚稱李是一名照顧者，「佢係長時間喺嗰度，因為佢同佢哋一齊住嘅嫲嫲，正常」。
戴偉奧指，當蔡及譚往澳門、廣州數周，以及兩人往巴黎時裝展，都未有帶子女？譚同意，期間均由李瑞香照顧。
戴偉奧問，李跟孫兒的關係親密？譚稱生活上是，「但關係係唔係好親密，我眼中睇唔係，要問返 X 同 W（蔡、鄺港智的子女）」。譚重申，蔡是非常盡責的母親，「佢對小朋友非常嚴謹，佢想李瑞香幫佢做到，但（李）永遠做唔到 100% ，做到 50% 都好好喇」。
戴偉奧指，婆媳之間就小朋友的事情爭執是平常？譚同意雙方有分歧很平常，但指「小朋友面前 Daddy 媽咪先係真正角色，尤其是媽咪」。
10:00 辯方：鄺港傑沒理由襲擊蔡？
代表鄺港傑的大律師 Trevor Beel 繼續盤問譚方駿。Beel 周三表示會有 39 張鄺港傑、蔡天鳳的合照或照片向譚展示。
Beel 周四繼續展示照片，包括鄺港傑 2022 年 7 月 15 日在加多利山單位為蔡慶祝生日。譚確認。Beel 指，生日蛋糕上插有「18」的蠟燭？譚稱：「氹佢囉，個個女仔都鍾意俾人嗌 18 歲㗎啦」。
Beel 指，同月發生蔡因長女發燒一事與鄺球爭執一事，鄺港傑為蔡慶生日，是在衝突事件的前或後？譚稱不記得。
Beel 展示 2022 年 8 月至 11 月蔡跟鄺港傑的自拍照，兩人出席朋友生日會、主題派對及聚會的相片。Beel 再展示，鄺港傑跟蔡於 2023 年 1 月 17 日的自拍照，譚閱畢稱「OK」。暫委法官祁彥輝問，譚是同意照片在該日拍攝？譚同意。
Beel 指，從兩人衣着可見是 2023 年拍攝？譚稱，因為背景簡單、也是兩人平時衣着，「睇唔出個地點或者 occasion 係乜嘢」。Beel 問，譚 2023 年 1 月 17 日前往法國？譚指大約是該段時間，但不記得實際日子。
Beel 指，以譚的認知，蔡從未給鄺港傑大筆金錢？譚指不清楚。Beel 指，鄺港傑與蔡當時沒有爭執？譚稱「以我所知，大爭拗係冇」。Beel 指，譚現在回想，鄺港傑沒有理由襲擊蔡？譚稱「當時係」。
Beel 指，鄺港傑面對的是謀殺罪。譚稱：「我唔知應該點答呢條問題，我知道佢依家俾人告，咁依家咪咁諗，同埋嗰日同佢去完大埔之後，同失蹤人口調查組去完，收到（警方）電話之後，我依家諗返起，一切都好恐怖」。
3 人被控謀殺、阻止合法埋葬
被告依次為鄺港傑（31 歲，司機）、鄺球（65 歲，退休人士）及鄺港智（28 歲，無業）。鄺港傑由大狀 Trevor Beel、劉奕勤、李宣儀代表；鄺球由大狀戴奧偉（Oliver Davies）及羅天祺代表；鄺港智由大狀安華暉（Andrew J. Raffell）、劉皚淇及鄧樂齊代表。
控方由外聘資深大狀郭莎樂（Charlotte Draycott）、高級助理刑事檢控專員梁育珩、高級檢控官林曉敏、吳希樂與檢控官尹培軒代表。案件由暫委法官祁彥輝（Brian Keith）審理。
3 人否認謀殺罪；鄺港傑、鄺港智承認阻止合法埋葬屍體罪，鄺球則不認罪。謀殺罪指，3 人在 2023 年 2 月 21 日，在大埔龍尾村 56B 地下謀殺蔡天鳳；阻止合法埋葬屍體指，3 人於 2 月 21 日至 23 日期間，在香港阻止蔡天鳳的屍體被合法埋葬。
HCCC198/2025