已被剔除註冊的支聯會，與前正、副主席李卓人、何俊仁及鄒幸彤，2021 年 9 月被控《港區國安法》下「煽動顛覆國家政權」罪，案件周五（2 日）應鄒幸彤要求，在西九龍裁判法院進行初級偵訊，由署理主任裁判官香淑嫻審理。 鄒幸彤表明擬不認罪，「無可能認罪，追求民主無罪，不認罪」。她在辯方主問下指，支聯會源自八九民運，終極訴求是建設民主國家，而其倡議的五大綱領是組織的「靈魂所在，身份所繫」，是「存在的理由」。 她又供稱，2018 年中國修憲將「黨領導加入憲法」，有聲音指「結束一黨專政」口號違憲，但指五大綱領「係社會嘅道德底線」，指支聯會「沒受威嚇而放棄理念」。案件下周四（8 日）續，將由辯方就案件不應交付高院審訊陳詞。
辯方另播放 9 段控方的呈堂影片，包括多年六四晚會不同環節，指印證支聯會從未煽動暴力。（見另稿）
鄒幸彤初級偵訊作供：
小學時首參與六四集會
鄒幸彤早上約 11 時親自作供，由其代表大律師梁麗幗引導。鄒幸彤表示，她首次接觸支聯會，「應該要去到 90 年代初，我作為一個小學生，跟我媽媽去參與燭光晚會嘅時候」。鄒稱，她不似李卓人、何俊仁，在支聯會成立之初就參與，「調轉嚟講，我係受支聯會影響而長大嘅一代人」。
鄒稱，她的經歷也反映「支聯會點影響呢個城市嘅人」。鄒幸彤回憶，她當年參與微不足道，「我只係幾萬燭光其中一個」，其時未必認識支聯會「五大綱領」，「但知道好多哥哥姐姐為咗國家企出嚟，但俾政權屠殺，仲要抹黑佢哋存在」。
鄒：維園入面見到香港人最美好嘅一面
參與者出於「對國家、對真理嘅愛」
她形容，當時氣氛令她觸動，「係細路仔第一次感受到，咁多人共同嘅悲傷、咁多共同憤怒，好想去明白，係咩可以令咁多嘅人連為一體」。
鄒接着說，「其實喺維園入面，我覺得我係見到香港人最美好嘅一面」，「即係維園每年見到都係最友善、最樂於助人嘅人」，稱他們不介意現場擠逼、幫忙設置場地，「燭光集會本身係完全無私利可言嘅場合，嚟嘅人都係出於愛而嚟，對國家、對真理嘅愛」。
鄒又指，「堅持尋找真相嘅天安門母親，或者每一個喺維園度去企出嚟，為其他人苦難感同身受嘅香港人…都係示範咗俾我睇，點樣做一個大寫嘅人」。
鄒：支聯會源於八九民運
民運終極訴求建民主制度、國家
鄒續指，她先後在 2014、15 年當選為支聯會常委及副主席，此前曾在支聯會兼職、義工，「一直去到支聯會舊年俾政府強制解散」。
梁麗幗問，為何鄒會競逐常委。鄒表示，「你問一個人要唔要參與一個組織有好多原因，但最起碼，一定係認同呢個組織宗旨同綱領，即係五大綱領」。鄒指，五大綱領共有 30 個字，即「釋放民運人士、平反八九民運、追究屠城責任、結束一黨專政、建設民主中國」。
鄒解釋，支聯會源起自八九民運，「個終極訴求係咩？係希望建立民主制度、民主國家。生於嗰個運動嘅團體，唔可能忘記初心，有責任為呢個目標犧牲咗嘅同路人堅持落去」。
鄒：一黨專政不結束 悲劇將繼續重演
鄒作供指，八九民運、六四屠城，「其實係最清楚講咗畀世界聽，一黨專政嘅危害」，「我哋嘅立場係，一黨專政唔結束嘅話，其實類似嘅悲劇，只會不斷咁重演。而且事實上，亦已經重演咗太多次」。
鄒又稱，「擋喺呢個目標前最大障礙係咩？就係呢個黨國不分嘅混帳邏輯。任何真係真心追求民主嘅人，點可能去容忍到一黨專政嘅存在呢？」
鄒：2018 年修憲加入「黨領導」
支聯會不受威嚇棄理念
辯方播放鄒幸彤在 2018 年六四集會上，曾就「結束一黨專政」的意思發言，稱「不就（是）要求政黨輪替，權力還返畀人民，要求真正民主」，她當時形容要求「卑微而根本」。
播片後，鄒作供解釋，當年中國剛修憲，「將（共產）黨領導加入憲法」，其時新上任的全國人大常委譚耀宗公開指，誰再叫「結束一黨專政」口號即等同違憲，會取消立法會資格。鄒此時笑稱「而家睇返（後果）真係輕擎」。
鄒續供稱，支聯會其後發聲明，指該訴求「係香港人咁多年嘅共同期盼，支聯會絕不會俾呢啲人嚇怕，立場上唔會有任何退縮」，亦在六四集會上重申，「支聯會仍然係支聯會，唔會因為當權者任何威嚇，而放棄理念」，又稱五大綱領「係呢個社會嘅道德底線」。
鄒：以和平、非暴力原則推動不同工作
鄒又表示，支聯會以和平、非暴力為原則，推動不同工作，包括發聲明、遊行集會，並引其中「零八憲章」已故發起人劉曉波的妻子劉霞，最終能出國為例，「無人知係點樣促致呢個結果，但如果連講出訴求空間都消失埋，咁所有呢啲訴求，更加無可能係實現到」。
鄒最後表示，「結束一黨專政，係要每個人做起，打破呢個恐懼，去挺直腰骨做人，去打破呢個思想嘅牢籠…呢個咪係支聯會一直以嚟所做嘅事情，亦都係我而家喺呢個法庭上，要做嘅事情」。
報道限制已解除 初級偵訊公開進行
案件在裁判法院處理交付高院程序。8 月 17 日，《國安法》指定法官、主任裁判官羅德泉按高等法院命令，下令撤銷《裁判官條例》第 87A 條交付程序的報道限制，傳媒自此可報道內容。
鄒幸彤隨即要求初級偵訊公開進行，控方反對，指鄒的證供「好大機會喺社會上有廣泛討論」，必會影響公平審訊。羅德泉指，「如果畀你報道，而唔畀你入嚟，會唔會變咗一個好奇怪現象」，最終批准初偵公開進行。
3 被告僅何俊仁獲保釋
本案被告依次為已被剔除註冊的支聯會、前主席李卓人（64 歲），以及兩名前副主席何俊仁（69 歲）和鄒幸彤（36 歲）。4 被告同被控於 2020 年 7 月 1 日至翌年 9 月 8 日違反《港區國安法》下一項「煽動顛覆國家政權」罪。
李卓人、何俊仁和鄒幸彤一直還押，何 8 月 22 日成功在高院申請保釋獲批准。據其民主黨黨友劉慧卿指，何俊仁最近驗身發現肺部有陰影、肝及牙齒有問題，會盡快安排作全身檢查。
WKCC 3632/2021