前立法會議員林卓廷與另外 6 名「非白衣人」，被控參與 721 元朗站暴動，周一（11 日）在區院展開第 26 天審訊，林完成 3 日的辯方主問。辯方續播放林 Facebook 的直播片段，顯示他在車廂中受襲的情況。
林供稱，當時林觀良曾於車廂內持棍指罵及追打他，而對方「一開頭由上到下咁打嘅，我把遮一路擋，都扑中個頭，但卸咁啲力，有一下我把遮俾佢打到飛脫咗」，其後對方將棍「打直捅向我」，另有其他白衣人在後面側面施襲，「俾佢哋打到個人都有啲暈」。林指其嘴受傷事後需縫「唔知 16 定 18 支針」。
林重申，當時深信警方「好快到，佢哋一到就安全」，指「我點可以自己走咗去，畀啲市民俾黑社會咁打法，呢個我覺得道德上絕對唔能夠接受呢一件事嚟㗎嘛。」案件周二續，林將接受控方盤問。《法庭線》並整理林連日主問下作供，解釋過的現場發言（見內文表）。
上周四報道：
7.21非白衣人案｜林卓廷：不離開因欲保護市民 「點可以喺佢哋危難之中走咗去？」
本案由法官陳廣池審理，控方由律政司高級檢控官程慧明代表。各被告的代表依次為：大律師黃錦娟、大律師李百秋、資深大律師潘熙、大律師鄭凱霖、大律師周慶澎、大律師黎建華、大律師曾敏怡。
林：身處持傘人群中
因閘外一直有人擲物
辯方播放元朗站的閉路電視片段，顯示閘內有人向外射水的情況，林指當時應身處的位置是持傘人群當中，並指當時閘內人與閘口有一段距離，因「外面一路人有人掉嘢入嚟，見到有人掉嘢，我即刻縮喺把遮後面。」
辯方另播放林 Facebook 的直播片段，畫面顯示林當時已上月台，並有手持長雨傘，問林為何手持雨傘？林指，「因為白衣人開始衝入嚟」，並指觀察到林觀良帶頭及號召白衣人入閘，付費區內的市民隨即爭相逃跑，並指當時閘內人「嗰陣時非常驚，極之惶恐」。
翻查資料，林觀良為首宗 721 白衣人暴動案的其中一被告，他承認暴動罪，被判囚 4 年 8 個月。
片段顯示林在月台時持長傘
林：由市民給予
林稱，他到大堂往月台樓梯的位置時，有年長女士把雨傘給他，她指自己用不著，「我考慮到情況太過凶險，所以我接咗把遮囉。」 辯方播放當時的片段，法官問林，「你跑緊？」林稱，「梗係跑啦，跑慢啲都唔掂！」官追問，即該女士跟著林跑？林稱，「唔係跟我跑，係大家都跑，大家都爭相逃命呀！」
辯方問，從片段聽到當閘內人跑向月台時，不斷聽到啪啪聲，問是甚麼聲音？林稱是樓梯附近的白衣人一直打人，並主要以棍、藤條施襲。
林確認，其後他走入月台的車廂，「當時啲白衣人未上嚟，咁有啲市民頂住咗車門㗎，一味問後面仲有冇人呀，我理解係想等緊未逃跑到嘅市民。」
官遂問，「頂住車門」的人是穿甚麼顏色衫？林稱是雜色。官追問是深色或是雜色？林稱，「趕住逃命，入車廂無留意到咁仔細」，並在追問下指不記得是甚麼顏色。
林解釋步出車廂原因
官：你唔覺危險？
片段其後顯示，林曾步出車廂。辯方問，林當時為何出去？林稱，「因為我相信架車開唔到。」官遂問，「點解咁講？」林稱，「因為我觀察非常之亂嘅情況，車門俾頂住咗啦，咁我相信咁嘅環境下架車開唔到啦，而我擔心樓梯嗰度有冇市民俾人襲擊，所以睇下情況同睇白衣人動向。」
官追問，「你唔覺危險？」林即稱，「梗係好危險㗎啦！」官再問，「你仲行出去？」林答，「當時俾人困住咗，我都要知最新情況係點，所以想行出去睇。」
官指可從車廂走向車頭
林：點睇到出面個情況？
官再指，列車有 8 卡，林可以在車廂內走向車頭，「咁危險你仲出去（車廂外）？」林則稱，「喺車廂行嚟行去點睇到出面個情況？」官則指，「咁保障到你唔使咁危險。」
林答稱，「我心情一路都矛盾，一邊想盡量幫市民、保護市民，一邊又驚自己危險，下面仲係好嘈，驚市民受襲受傷，我幫到幾多得幾多，做到幾多就幾多…」
官再問，「你諗住點幫人？」林則稱，「見機行事㗎咋」，舉例指有人在樓梯無法走路，會上前扶他入車廂。
官指樓梯位置有男子「想衝落去」
林：佢喝止啲白衣人打人
官又引片段，指可見月台的樓梯位置「似乎無人打緊人」？林則稱，「樓梯底仲有。」
官另稱，從片段可見，月台的樓梯旁有名穿黑褲男子，手持雨傘，問他當時做甚麼？林稱，「我唔知，我估佢同我一樣想睇下面發生咩事。」官追問，「有冇喝住佢『褪後、褪後』？」，林稱無。
官再指，「佢似係想衝落去」。林稱，「我唔覺喎，佢拎住把遮擋。」林在重看片段後稱，「我見到佢喝止啲白衣人打人喎！」
林車廂中喊「大男人頂住係前面」
官：「咁你係咪大男人呀？」
辯方續播放片段，指林其後返回車廂。林確認，亦確認當時曾說「頂住個門口頂住個門口，唔好畀佢入嚟。」辯方問林說此句的原因，林指「感覺到啲白衣人開始衝上嚟。」
官追問，林有何意思，指片段可見樓梯及車廂外面無人。林稱，「同意，但係衝上嚟都要時間㗎，條樓梯好長。」
林續稱，其後有白衣人上月台，故他曾說過「喂，大男人頂住係前面」，因想保護女士及長者。官問，「咁你係咪大男人呀？」林聞言稱，「我梗係啦！」官追問，「你有冇頂住？」林則指，「梗係有啦！」
片段續顯示，林曾持傘再次走出車廂。林解釋，當時白衣人用不同武器襲擊市民，甚至有人倒地，故想出去救他，但其後有白衣人走近，林遂退後返回車廂。
車廂廣播著乘客離開
林：呢個係好荒謬嘅畫面
片段可見，其後有白衣人持棍、傘等物於月台施襲，亦有白衣人在車門位置襲擊車廂內的人；另車廂響起廣播表示「各位乘客請注意，由於本班列車暫停服務，請所有乘客離開車廂，多謝合作。」
辯方問林，「你哋有冇離開？」林稱，「點離開呀？呢個係好荒謬嘅畫面囉。」林其後指，當時曾聽過廣播數次，指「因為係好荒謬訊息，點樣離開車廂呀？」
官問是否同意白衣人「徘徊」
林指白衣人「出出入入咁打」
林又指，片中聽到有市民稱，「返工放工返屋企咋！」他又指，「好多市民哭聲，係成個車廂都係」，他說時聲線稍為顫抖。
法官問，「點解啲人（白衣人）唔衝入嚟車廂？」指看到白衣人在車廂外「徘徊」，並著辯方播相關片段。官再問，「同唔同意佢哋徘徊緊？」林指，「但我哋聽到隔離車門又掉緊嘢又有動作…我同意唔係不間斷咁打，係出出入入咁打嘅，我當時認知都係咁…」
片段另顯示，有男子曾在車廂內跪地，他執起地上的眼鏡交予白衣人後，遭白衣人襲擊。林卓廷在庭上看到片段隨即嘆氣搖頭。
林供稱遭林觀良追打
「把遮俾佢打到飛脫咗」
辯方問，車廂內的人開傘，問有何作用？林稱，「防衛囉、自衛囉，因為佢哋持續掉嘢入車廂入面，啲白衣人用棍呀，藤條嘅武器，打車廂嘅市民…仲走入嚟打。」辯方追問，車內人有否用傘襲擊車廂外的人？林稱，「無喎，仲敢？」
林確認，曾在車廂多次稱「唔好郁手呀！」解釋指當時林觀良在車門位置持棍指罵追打他，他遂用長傘擋，指林觀良「一開頭由上到下咁打嘅，我把遮一路擋，都扑中個頭，但卸咁啲力，有一下我把遮俾佢打到飛脫咗」，又指林觀良曾打中車廂內的扶手「擋咗若干下」。
林續稱，「好記得之後佢將支棍打直捅向我，我個嘴就俾佢打到穿咗…我隻手一路擋，手腕骨裂咗，其他白衣人喺後面側面都向我施襲，唔知打咗幾耐，俾佢哋打到個人都有啲暈，所以坐咗喺地下…」
林指事後需縫 16 或 18 針
頭腫及瘀傷等
林確認，他其後嘴角流血，坐在車廂內。林指，事後需要縫「唔知 16 定 18 支針」，另頭部遭棍打中，有腫傷及瘀傷，手臂、手腕骨裂、嘴部受傷。
片段顯示列車其後駛離元朗站，有男子告知林曾多次著車長開門但不果，林確認曾稱「過咗元朗先好落」，因覺得元朗「極之危險」，「喺元朗唔知咩地方講得上安全」。
林指到場後通知市民已報警
若自行離開「道德上絕對唔能夠接受」
辯方問及，林當日到達元朗站後，為何不離開付費區？林指，正如早前述，他一心想去元朗保護市民，亦感到白衣人想衝入閘內打人，故感擔心，並指「出去付費區外係送死」，而白衣人衝入閘追打是「極之危險」，他亦擔心「落單」。
林續稱，「我報咗警嘛，深信警方會好快到，佢哋一到就安全」，又指當時「認知無安全路經俾市民同我一齊離開」。他到場時亦告知市民已報警，著大家不要出閘，「我點可以自己走咗去，畀啲市民俾黑社會咁打法，呢個我覺得道德上絕對唔能夠接受呢一件事嚟㗎嘛。」
林續指，曾多次著市民「唔好郁手」、「企後啲」，「希望捱到警察嚟到，我無所求啦」，「我都叫大家頂住佢先啦，點可以叫大家頂住，係危難關頭自己走咗去呢？呢個我唔能夠接受。」林又指，當時正進行直播，為日後警方調查的重要證據，直播片段亦可監察其一言一行。
林：要阻止白衣人衝入閘
「我已經心力交瘁、極之極之惶恐」
辯方續問，白衣人曾稍為離開閘機，問林有否想走或上月台？林指，當時「局勢無清晰轉變」，白衣人「一過嚟都唔使 3 秒鐘」。林在追問又指，白衣人多次開輪椅通道閘門，擔心他們衝入閘，「我第一個諗法係阻止佢哋衝入嚟…拖到警察嚟，我就功成身退。」
被問及對列車運作有何了解，林稱當時無心神了解，「又要拉住企得前嘅市民，又要諗點樣處理，又要睇白衣人舉動」，「如果佢衝入嚟走避不及，如果真係落單，我命都無」，又指白衣人「絕大部分非常之有組織」，指他們為精壯男子、持棍，且絕大部分有紋身，「要阻止佢哋衝入嚟，我已經心力交瘁，我係極之極之惶恐，喺現場要盡僅餘一份力去做，我係做得幾多得幾多囉。」
辯方又問，林當時所作的行為目的為何？林答是想阻止、警告白衣人不要襲擊付費區內的人，稱「企後啲」是想提醒市民不要企太近遇襲受傷；「唔好郁手」則是希望局勢不要惡化， 「緩和到就最好」，另「唔好打人停手」是想阻嚇白衣人不要衝入閘內。
否認有參與暴動
林：係啲白衣人打人咋嘛
林同意，片段其後有交給警方調查，指是由同事冼卓嵐交，而他都同意。林解釋，因片段是當日事件的重要證據，「雖然我對警察遲遲未到係好憤怒」，但指其私人憤怒不應阻止處理公眾事件，又指自己曾協助警方作認人手續及曾錄取 4 份證人口供。
辯方總結案情時問，林乘西鐵入元朗時，有否打算參與暴動？林稱，「當然無啦，元朗點會有暴動呀？」辯方續問，入到元朗時有否打算參與暴動？林答，「唔會囉，點會有暴動呀？係啲白衣人打人咋嘛。」
林完成主問
將接受控方盤問
辯方其後完成主問，辯方僅有被告楊朗一方有盤問。代表楊的大律師曾敏怡問，當林到達元朗站時，有男子向林稱，白衣人「有木刀，刀仔」，問林是否認識該男子？林稱不認識，並同意當時視該人為市民。案件周二續，由控方開始盤問林。
林卓廷在主問作供時，確認現場說過的不同說話，並解釋原因。《法庭線》整理如下：
7 人被控在元朗站參與暴動
被告依次為，時任立法會議員林卓廷（43 歲）及另外 6 人，包括庾家豪（35 歲）、陳永晞（37 歲）、葉鑫昇（31 歲）、鄺浩林（26 歲）、尹仲明（48 歲）及楊朗（26 歲），7 人被控一項暴動罪。
控罪指，7 人於 2019 年 7 月 21 日在港鐵元朗站大堂，及其他身分不詳的人參與暴動。
DCCC1106/2020